សហរដ្ឋអាមេរិចបានដាក់ទណ្ឌកម្មលើរដ្ឋមន្រ្តីតួកគីចំនួន ២រូប និងមន្រ្តីជាន់ខ្ពស់រដ្ឋាភិបាល ៣រូប ដើម្បីឆ្លើយតបទៅនឹងការធ្វើការវាយប្រហារយោធារបស់តួកគី ក្នុងប្រទេសស៊ីរី។
ប្រធានាធិបតីអាមេរិច ដូណាល់ ត្រាំ ក៏បានទូរស័ព្ទទៅកាន់ប្រធានាធិបតីតួកគី Recep Tayyip Erdogan ដើម្បីទាមទារឲ្យតួកគីបញ្ឈប់សង្រ្គាមជាបន្ទាន់នៅភាគខាងជើងស៊ីរី។ នេះបើតាមការបញ្ជាក់របស់អនុប្រធានាធិបតីអាមេរិចលោក Mike Pence ដែលនឹងធ្វើដំណើរទៅកាន់តំបន់ភ្លាមតាមដែរអាចធ្វើបាន។
តួកគីបាននិយាយថា ប្រតិបត្តិការយោធារបស់ខ្លួននៅក្នុងស៊ីរី គឺដើម្បីដេញកងកម្លាំង Kurd ចេញពីតំបន់ព្រំដែន ដើម្បីបង្កើតតំបន់សុវត្ថិភាព។ កងកម្លាំង Kurd គឺជាសម្ព័ន្ធមិត្តរបស់អាមេរិច ដែលបានជួយអាមេរិចក្នុងការប្រយុទ្ធប្រឆាំងនឹងក្រុមរដ្ឋអ៊ីស្លាម IS ក្នុងប្រទេសស៊ីរី ប៉ុន្តែតួកគីហៅក្រុមនោះថាជាភេរវករ។
រដ្ឋមន្រ្តីរតនាគារអាមេរិច លោក Steven Mnuchin បានថ្លែងថា ទណ្ឌកម្មប្រឆាំងនឹងតួកគីគឺខ្លាំងណាស់ ហើយនឹងធ្វើឲ្យមានផលប៉ះពាល់ខ្លាំងទៅលើសេដ្ឋកិច្ចប្រទេសនេះ។
ចំណែកលោក Mike Pence បានធ្វើការព្រមានថា “ទណ្ឌកម្មនឹងនៅតែបន្ត និងកាន់តែខ្លាំងឡើង ប្រសិន និងរហូតដល់តួកគីបញ្ឈប់សង្រ្គាមភ្លាម និងយល់ព្រមចរចាបញ្ហាព្រំដែនរវាងតួកគី និងស៊ីរី”៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
