ខេត្តស្វាយរៀងៈ លោក ម៉ែន វិបុល អភិបាលខេត្តស្វាយរៀងនាព្រឹកថ្ងៃពុធ ទី១៦ ខែតុលា ឆ្នាំ២០១៩នេះ បានអញ្ជើញជាអធិបតីបើកកិច្ចប្រជុំពិនិត្យ និងផ្តល់យោបល់គណៈអភិបាលខេត្ត លើសេចក្តីព្រាងក្របខ័ណ្ឌអភិវឌ្ឍន៍ និងកម្មវិធីអភិវឌ្ឍន៍រយៈពេលប្រាំឆ្នាំ (២០២០-២០២៤)។
អញ្ជើញចូលរួមក្នុងកិច្ចប្រជុំនេះ មានអស់លោកជាអភិបាលរងខេត្ត លោកនាយកទីចាត់ទាំង៥ សាលាខេត្ត លោកប្រធានមន្ទីរផែនការខេត្ត និងលោក លោកស្រីអនុប្រធានមន្ទីរនានាក្នុងខេត្ត ព្រមទាំងលោកអភិបាលរងក្រុង/ស្រុកទាំង៨។
លោកអភិបាលខេត្តបានមានប្រសាសន៍ថា យោងទៅតាមប្រតិទិននៃការរៀបចំ និងការកសាងផែនការអភិវឌ្ឍន៍រយៈពេល៥ឆ្នាំ ២០២០-២០២៤ របស់ខេត្តស្វាយរៀង ទីចាត់ការផែនការ និងវិនិយោគសាលាខេត្ត និងមន្ទីរផែនការខេត្ត បានសហការគ្នា ដើម្បីរៀបចំកិច្ចប្រជុំពិនិត្យ និងផ្តល់យោបល់របស់គណៈអភិបាលខេត្ត លើសេចក្តីព្រៀងក្របខ័ណ្ឌអភិវឌ្ឍន៍ និងកម្មវិធីអភិវឌ្ឍន៍មូលដ្ឋាន រយៈពេល៥ឆ្នាំ ដែលមានគោលបំណងដូចខាងក្រោម៖ ចក្ខុវិស័យអភិវឌ្ឍន៍ បង្ហាញអំពីទស្សនៈដែលក្រុមប្រឹក្សាខេត្ត ចង់បានការប្រែប្រួលជីវភាពរបស់ ប្រជាពលរដ្ឋឱ្យស្របតាមចក្ខុវិស័យរបស់រាជរដ្ឋាភិបាល។ គោលបំណងអភិវឌ្ឍន៍ បង្ហាញអំពីលទ្ធផលនានា ដែលក្រុមប្រឹក្សាខេត្តចង់បានតាមរយៈផែនការអភិវឌ្ឍ ។ គោលដៅអភិវឌ្ឍន៍ បង្ហាញអំពីលទ្ធផលនានា ដែលក្រុមប្រឹក្សាខេត្តចង់បានតាមវិស័យនីមួយៗ តាមរយៈការអនុវត្តតាមផែនការអភិវឌ្ឍន៍ដើម្បីរួមចំណែកសម្រេចគោល បំណងអភិវឌ្ឍន៍។ យុទ្ធសាស្ត្រអភិវឌ្ឍន៍ បង្ហាញអំពីយុទ្ធសាស្ត្រ ឬសកម្មភាពដែលត្រូវអនុវត្តន៍ ដើម្បីសម្រេចបានតាមគោលដៅអភិវឌ្ឍនីមួយៗរួមមាន យុទ្ធសាស្រ្តអភិវឌ្ឍន៍សេដ្ឋកិច្ច សង្គមកិច្ច គ្រប់គ្រងធនធានធម្មជាតិ បរិស្ថាន និងបន្សាំការប្រែប្រួលអាកាសធាតុ រួមទាំងការគ្រប់គ្រងរដ្ឋបាល និងសន្តិសុខសណ្តាប់ធ្នាប់សាធារណៈ។
លោកអភិបាលខេត្តបានបញ្ជាក់ថា កម្មវិអភិវឌ្ឍន៍មូលដ្ឋានរយៈពេលប្រាំឆ្នាំ គឺជារបៀបវរៈដែលក្រុមប្រឹក្សាខេត្តចង់សម្រេចឱ្យបានក្នុងអាណត្តិរបស់ខ្លួនសម្រាប់បង្ហាញពីគណនេយ្យភាព ចំពោះប្រជាពលរដ្ឋ និងរាជរដ្ឋាភិបាល៕ដោយ៖ វ៉ៃកូ
