តាកែវ ៖ រដ្ឋលេខាធិការក្រសួងការងារនិងបណ្ដុះបណ្ដាលវិជ្ជាជីវៈឯកឧត្តមបណ្ឌិត ពេជ សោភ័ន បានធ្វើការអះអាងថាចំនួនសិស្សនិស្សិតដែលចាប់ផ្ដើមចូលសិក្សាមុខជំនាញបណ្ដុះបណ្ដាលបច្ចេកទេសវិជ្ជាជីវៈពីមួយឆ្នាំទៅមួយឆ្នាំកាន់តែមានការកើនឡើង ខណៈពេលដែលមុខជំនាញបច្ចេកទេសនេះកំពុងតែមានតម្រូវការទីផ្សារការងារខ្ពស់នៅក្នុងប្រទេសកម្ពុជា។
ថ្លែងនៅក្នុងឱកាស់អញ្ជើញចូលរួមផ្សព្វផ្សាយស្តីពីការអប់រំបណ្តុះបណ្តាលបច្ចេកទេស វិជ្ជាជីវៈនឹងព័ត៌មានអាហារូបករណ៍ នៅស្រុកព្រៃកប្បាស់ ខេត្តតាកែវ នៅព្រឹកថ្ងៃ អង្គារ៏ ទី ២២ ខែ តុលា ឆ្នាំ ២០១៩នេះ ឯកឧត្តមបណ្ឌិត ពេជ សោភ័ណ បានថ្លែងថា បច្ចុប្បន្នសិស្សនិស្សិតជាពិសេសសិស្សដែលទើបប្រឡងបាក់ឌុបហើយមានការចាប់អារម្មណ៏ខ្លាំងទៅលើមុខជំនាញបច្ចេកទេស ព្រោះការបណ្ដុះបណ្ដាលបច្ចេកទេសវិជ្ជាជីវៈនាពេលបច្ចុប្បន្នគឺខុសពីមុន ពោលយើងបានធ្វើការបណ្ដុះបណ្ដាលដោយឆ្លើយតបទៅនិងសម័យកាលថ្មីនៃបដិវត្តន៏ឧស្សាហកម្មជំនាន់ទី៤។
ឯកឧត្តមបណ្ឌិត ពេជ សោភ័ន បានមានប្រសាសន៏បន្ថែមថា សាលាបណ្ដុះបណ្ដាលបច្ចេកទេសវិជ្ជាជីវៈដែលស្ថិតក្រោមការគ្របគ្រងរបស់ក្រសួងការងារបានចាត់ទុកសម័យកាលថ្មីនៃបដិវត្តន៏ឧស្សាហកម្មទី៤បានធ្វើការប្លាស់ប្ដូសេដ្ឋកិច្ចនិងប្លាស់ប្ដូអ្វីៗទាំងអស់ ដូច្នោះសាលាបានធ្វើការបណ្ដុះបណ្ដាលមុខជំនាញបច្ចេកវិជ្ជាជីវៈដល់និស្សិតតាមរយៈការបង្កើតទីក្រុងឆ្លាតវៃ ភូមិឆ្លាតវៃ ដើម្បីបង្ហាញដល់សិស្សនិស្សិតពីការបច្ចេកទេសដែលសាលាបានបង្រៀនជាពិសេសការបង្ហាញពីការប្រើបញ្ញាសិប្បនិមឹត្តតាមរយៈការប្រើរ៉ូបូត«មនុស្សយន្តជាដើម»។
និស្សិតវិទ្យាស្ថានបណ្ដុះបណ្ដាលបច្ចេកទេសវិជ្ជាជីវៈភូមិភាគតេជោសែនតាកែវ យុវនារី ប៊ុន មួយលី ដែលសិក្សាជំនាញបច្ចេកទេសអេឡិចត្រូនិចបានថ្លែងឲ្យដឹងថា ការសិក្សាបច្ចេកទេសអេឡិចត្រូនិចមិនមែនតែប្រុសៗអាចរៀនបាននោះទេ សិស្សស្រីក៏អាចរៀនបានដែរ ហើយការសិក្សាជំនាញបច្ចេកទេសអេឡិចត្រូនិចនេះមានទីផ្សារធំទូលាយដែលអាចឲ្យសិស្សងាយស្រួលក្នុងការស្វែងរកការងារធ្វើបាន៕ ដោយ ៖ តាកែវ
