ភ្នំពេញ៖ គណៈបញ្ជាការឯកភាពខណ្ឌទួលគោកដឹកនាំដោយលោក ប៉ាង លីដា ជាអភិបាលរងខណ្ឌបាន ចុះត្រួតពិនិត្យ កុងស៊ីបញ្ចាំជាច្រើនកន្លែងនៅសង្កាត់ទឹកល្អក់៣ ដើម្បីស្វែងរកភាពត្រឹមត្រូវ ស្របទៅនឹងច្បាប់ដែលបានកំណត់ជុំវិញការបើកអាជីវកម្មរបស់បងប្អូនអាជីវករ។
ប្រតិបត្តិការនេះបានធ្វើឡើងកាល ពីរសៀលថ្ងៃទីច័ន្ទ ៧រោច ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៨ ខែមករា ឆ្នាំ២០១៨ នៅចំណុចកុងស៊ីបញ្ជាំជាច្រើនកន្លែងនៅតាមបណ្តោយផ្លូវ១៩២ ផ្លូវ១៨៦ ផ្លូវ២០២ ផ្លូវ២៤៧ ផ្លូវ២៥៣ ស្ថិតនៅក្នុងសង្កាត់ទឹកល្អក់៣ ខណ្ឌទួលគោក រាជធានីភ្នំពេញ ពោលគឺក្រោយពីលោក ឃួង ស្រេង អភិបាលរាជធានីភ្នំពេញ បានបញ្ជាអោយហាងបញ្ចាំទាំងអស់ គោរពច្បាប់ ដោយបើកដំណើរចាប់ពីម៉ោង៦ព្រឹករហូតដល់ម៉ោង៦ល្ងាច ដែលមានរយះពេល១២ម៉ោង ដើម្បីដំណើរការអាជីវកម្មសេវាទទួលប្រាតិភោគដោយអនុប្បទាន (ទទួលបញ្ចាំ) ជាថ្មីម្តងទៀត ។ ក្រោយការពិនិត្យ កុងស៊ីបញ្ចាំទាំងនេះឃើញថា មានភាពត្រឹមត្រូវតាមច្បាប់ ដោយពួកគាត់បានអនុវត្តតាមគោលការណ៍របស់សាលារាជធានីភ្នំពេញ ។
បើតាមម្ចាស់ហាងបញ្ចាំបានប្រាប់អោយដឹងថា គាត់មានចិត្តសប្បាយរីករាយ ដែលឃើញអាជ្ញាធរខណ្ឌបានចុះមកណែនាំអោយអនុវត្តបើកការរកស៊ីសេវាទទួលបញ្ចាំចាប់ពីម៉ោង៦ព្រឹករហូតដល់ម៉ោង៦ល្ងាច ដើម្បីកាត់បន្ថយអាជីវករមួយចំនួនដែលមិនគោរពច្បាប់និងផ្តល់ភាពងាយស្រួលដល់ជនល្មើស ។
ប្រភពបន្តទៀតថា ចំពោះអាជីវកររកស៊ីសេវាទទួលបញ្ចាំ ឬសេវាទទួលប្រាតិភោគដោយអនុប្បទាន ស្របច្បាប់ត្រឹមត្រូវ តែងតែចូលរួមអនុវត្តទៅតាមបទបញ្ជានិងគោលការណ៍របស់រាជរដ្ឋាភិបាល និងជួយសម្រួលភាពខ្វះខាតបងប្អូនប្រជាពលរដ្ឋដែលត្រូវការថវិកាបន្ទាន់ ជាការដោះទាល់ម្តងការនោះ ។
ប្រតិបត្តិការចុះត្រួតពិនិត្យកន្លែងហាងបញ្ចាំទាំងនេះ អោយបងប្អូនប្រកបមុខរបរទទួលបញ្ចាំចូលរួមគោរពច្បាប់ និងផ្តល់ព័ត៌មានជូនសមត្ថកិច្ចមូលដ្ឋាននូវព័ត៌មានពីជនសង្ស័យ លេចមុខយកម៉ូតូ រថយន្ត ទ្រព្យសម្បត្តិផ្សេងៗ មកទទួសេវាបញ្ចាំផង ដើម្បីអាជ្ញាធរទប់ស្កាត់ បង្ការ បង្ក្រាបជាក់ស្តែង រក្សាសន្តិសុខ ជូនពលរដ្ឋទាំងគ្នា ៕ ដោយ៖បញ្ញាស័ក្តិ
