លោក Jeff Bezos ស្ថាបនិកគេហទំព័រអនឡាយយក្ស Amazon កំពុងខិតទៅរកការបាត់បង់តំណែងមហាសេដ្ឋីលេខ ១ ពិភពលោក ទៅឲ្យលោក Bill Gate ដោយសារតែភាគហ៊ុនក្រុមហ៊ុនរបស់លោកធ្លាក់ចុះ។
ទ្រព្យសម្បត្តិរបស់លោកភាគច្រើនគឺស្ថិតនៅលើភាគហ៊ុនរបស់ Amazon។ គាត់មានភាគហ៊ុនចំនួន ៥៧លាន ឬ ១២ភាគរយនៅអាម៉ាហ្សូន។
លោកខាតបាត់បង់ទ្រព្យសម្បតិ្តចំនួន ៣ពាន់លានដុល្លារ ក្រោយពេលភាគហ៊ុនរបស់អាម៉ាហ្សូនធ្លាក់ចុះប្រហែល ២ភាគរយនៅក្នុងការជួញដូរកាលពីថ្ងៃសុក្រ។ ភាគហ៊ុននេះបានលោតឡើងបន្តិចវិញ បើធៀបទៅនឹងថ្ងៃព្រហស្បតិ៍ ដែលវាធ្លាក់ចុះរហូតដល់ ៩ភាគរយ។
សូមបញ្ជាក់ថា លោក Jeff Bezos គឺជាមហាសេដ្ឋីលេខ ១ ពិភពលោក។ បច្ចុប្បន្ន លោកមានទ្រព្យសម្បតិ្តសរុបចំនួន ១០៩,៦ពាន់លានដុល្លារ។ នេះបើតាមបញ្ជីឈ្មោះមហាសេដ្ឋី របស់ទស្សនាវដ្ឋី Forbes។ ចំណែកសេដ្ឋីលេខ ២ ពិភពលោកគឺ លោក Bill Gate ស្ថាបនិកក្រុមហ៊ុន Microsoft។ លោក Bill Gate មានទ្រព្យសម្បតិសរុបចំនួន ១០៦ពាន់លានដុល្លារ។
លោក Jeff Bezos កាន់កាប់តំណែងជាមហាសេដ្ឋីលេខ ១ ពិភពលោកចាប់តាំងពីឆ្នាំ ២០១៧មក៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
