ភ្នំពេញ ៖ បុរសម្នាក់ បើករថយន្តឡិចស៊ីស RX300 មួយគ្រឿង បត់ឆ្លងផ្លូវមិនប្រយ័ត្ន ជ្រុលទៅបុកម៉ូតូមួយគ្រឿង បណ្តាលឲ្យបុរសម្នាក់ ផ្លោងបោកទៅនឹងខឿនផ្លូវបែកក្បាលស្លាប់នៅនឹងកន្លែង កាលពីវេលាម៉ោង១និង៣៥នាទីយប់ ឈានចូលថ្ងៃទី៣០ ខែតុលា ឆ្នាំ២០១៩ ស្ថិតនៅចំណុចមុខក្រុមហ៊ុនលក់រថយន្ត TOYOTA តាមបណ្តោយផ្លូវសហព័ន្ធរុស្ស៊ី ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
តាមរបាយការណ៍បានឲ្យដឹងថា អ្នកបើករថយន្តឡិចស៊ីស RX-300 មួយគ្រឿង ពណ៌ស ពាក់ផ្លាកលេខ ភ្នំពេញ 2AN-5652 ធ្វើដំណើរតាមបណ្តោយផ្លូវសហព័ន្ធរុស្ស៊ី ទិសដៅពីលិចទៅកើត លុះមកដល់ចំណុចកើតហេតុខាងលើ បានបត់ឆ្វេងដៃឆ្លងទៅផ្លូវបេតុងម្ខាងទៀត ក្នុងល្បឿនលឿន ក៏ជ្រុលទៅបុកម៉ូតូមួយគ្រឿង ម៉ាកស្មាស់វី ពណ៌ខ្មៅ ពាក់ស្លាកលេខ ភ្នំពេញ 1AW-9959 ជិះដោយបុរសម្នាក់បញ្ច្រាសទិសដៅគ្នា ពីកើតទៅលិច បណ្តាលឲ្យជនគ្រោះធ្វើផ្លោងទៅបោកនឹងខឿនផ្លូវបែកក្បាលស្លាប់ភ្លាមៗ នៅនឹងកន្លែងកើតហេតុ ។ ភ្លាមៗនោះ ម្ចាស់រថយន្តបង្ក ត្រូវបានប្រជាពលរដ្ឋធ្វើការឃាត់ខ្លួន ប្រគល់ជូនសមត្ថកិច្ចមូលដ្ឋានភ្លាមៗ។
តាមរបាយការណ៍បានឲ្យដឹងទៀតថា សពជនរងគ្រោះមានឈ្មោះ លៀង លីហុង ភេទប្រុស អាយុ៣៣ឆ្នាំ មុខរបរដឹកអីវ៉ាន់ ស្នាក់នៅក្នុងបុរីចំការដូងសង្កាត់ដង្កោ ខណ្ឌដង្កោ រាជធានីភ្នំពេញ។
ក្រោយកើតហេតុ សមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញ ចុះមកធ្វើការវាស់វែងយកម៉ូតូ និងរថយន្តទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំធ្វើការដោះស្រាយគ្នាទៅតាមផ្លូវច្បាប់។ ដោយឡែកសពជនរងគ្រោះ សមត្ថកិច្ចធ្វើកំណត់ហេតុ ប្រគល់ជូនសាច់ញាតិយកទៅធ្វើបុណ្យតាមប្រពៃណី៕ដោយ៖កូឡាប
