កំពង់ឆ្នាំង៖ ស្លាប់ម្នាក់និងរបួសធ្ងន់២នាក់ ក្នុងករណីគ្រោះថ្នាក់ចរាចរណ៍រវាងម៉ូតូ និងរថយន្ត នៅយប់ថ្ងៃទី១១ ខែវិច្ឆិកា ឆ្នាំ២០១៩ វេលាម៉ោង ១១ និង៤៥នាទី នៅលើផ្លូវជាតិលេខ៥ ចន្លោះបង្គោលគីឡូម៉ែត្រលេខ ៨៨-៨៩ ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង។
សមត្ថកិច្ច បានឲ្យដឹងថា ករណីគ្រោះថ្នាក់ចរាចរណ៍នេះកើតឡើងរវាង រថយន្តសណ្ដោង (កុងតឺន័រ) និង ម៉ូតូ ម៉ាកហុងដា C125 ជិះឌុបគ្នា សរុប 3នាក់ ។ ករណីនេះបានបណ្ដាលឲ្យស្លាប់អ្នកបើក ម៉ូតូ ១នាក់ ឈ្មោះ ប៉ិត សាវិត ភេទប្រុស អាយុ ២៣ឆ្នាំ មានទីលំនៅភូមិក្រាំងស្គា ឃុំក្រាំងស្គា ស្រុកទឹកផុស ខេត្តកំពង់ឆ្នាំង។ របួសអ្នកជិះពីក្រោយ ២នាក់ ប្រុស របួស(ធ្ងន់) ។
សមត្ថកិច្ច បានឲ្យដឹងទៀតថា ក្រោយពេលកើតហេតុអ្នកបើកបររថយន្តបានរត់គេចខ្លួន រីឯរថយន្តត្រូវបានឃាត់ទុក និងបញ្ជូនទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង អនុវត្តតាមនីតិវិធី ៕ដោយ៖កូឡាប