ភ្នំពេញ៖ លោករដ្ឋមន្ត្រីក្រសួងធម្មការនិងសាសនា បានជំរុញឱ្យថ្នាក់ដឹកនាំ និងបរិស័ទគ្រប់សាសនា ធ្វើយ៉ាងណាជួយគ្នាក្នុងការទប់ស្កាត់ការប្រើប្រាស់គ្រឿងញៀននៅក្នុងសហគមន៍ ក៏ដូចជាការចូលរួមគោរពច្បាប់ចរាចរណ៍ទាំងអស់គ្នា ក្នុងគោលបំណងដើម្បីកាត់បន្ថយគ្រោះថ្នាក់ចរាចរណ៍ឲ្យបានក្នុងកម្រិតខ្ពស់បំផុត។
ក្នុងឱកាសបិទសិក្ខាសាលាស្ដីពីកិច្ចសន្ទនាអន្តរជំនឿសាសនាដើម្បីពង្រឹងសុខដុមណីយកម្មសាសនានៅព្រះរាជាណាចក្រកម្ពុជាលើកទី ៨ រោមប្រធានបទ “សាសនិកគ្មានគ្រឿងញៀន និងការគោរពច្បាប់ចរាចរណ៍ផ្លូវគោក ” រសៀលថ្ងៃសុក្រ ទី ១៥ខែវិច្ឆិកា ឆ្នាំ ២០១៩ នៅសាលសន្និសីទចតុម្មុខ លោកហ៊ឹម ឆែម ទេសរដ្ឋមន្ត្រីរដ្ឋមន្ត្រីក្រសួងធម្មការនិងសាសនា បានថ្លែងថា តាមរយៈអង្គសិក្ខាសាលានេះ បានធ្វើឲ្យសាសនាទាំងអស់នៅកម្ពុជាអាចរស់នៅជាមួយគ្នាដោយសន្តិភាពក្នុងសហគមន៍ ចេះយោគយល់អធ្យាស្រ័យ និងជួយគ្នាទៅវិញទៅមកធ្វើឲ្យមានសុខដុមនីយកម្មសាសនានៅកម្ពុជា ដែលជាគោលបំណងប្រាថ្នាធំបំផុតរបស់រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជាប្រមុខដឹកនាំ។
ទន្ទឹមនឹងនោះដែរ លោកទេសរដ្ឋមន្ត្រី ក៏បានមានប្រសាសន៍បញ្ជាក់ជូន អំពីគោលនយោបាយឈ្នះឈ្នះរបស់ សម្តេចអគ្គមហាសេនាបតីតេជោ ហ៊ុន សែន បាននាំមកឲ្យប្រទេស និងប្រជាជនកម្ពុជា នូវសន្តិភាព និងការអភិវឌ្ឍន៍គ្រប់វិស័យ និងសូមចងចាំថារាជរដ្ឋាភិបាលគោរពសិទ្ធិសេរីភាពខាងជំនឿនិងសាសនាលើកស្ទួយព្រះពុទ្ធសាសនាដែលជាសាសនារបស់រដ្ឋនិងបង្កលក្ខណៈសម្បត្តិល្អដល់សកម្មភាពនៃសាសនាផ្សេងៗទៀតដោយផ្អែកលើមូលដ្ឋានថែរក្សាសាមគ្គីរវាងប្រជាជន ស្ថិរភាពនយោបាយនិងសណ្តាប់ធ្នាប់សង្គមដោយរារាំងការរើសអើងនិងការបែងចែកក្នុងសង្គមដែលបណ្តាលមកពីភាពខុសគ្នាខាងជំនឿនិងសាសនា។
លោកទេសរដ្ឋមន្ត្រី បានផ្ដល់អនុសាសន៍មួយចំនួនដល់ថ្នាក់ដឹកនាំ និងបរិសុទ្ធគ្រប់សាសនាទាំងអស់ ដើម្បីរួមគ្នាចូលរួមពង្រឹង និងពង្រីកវិស័យសាសនានៅក្នុងសង្គមកម្ពុជាមានសុខដុមនីយកម្ម និងការអភិវឌ្ឍរីកចំរើនជាលំដាប់ដូចខាងក្រោម÷
១-សូមថ្នាក់ដឹកនាំ និងបរិស័ទគ្រប់សាសនាទាំងអស់បន្តគាំទ្រការដឹកនាំរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីរក្សានូវសុខសន្តិភាព និងការរីកចម្រើនបន្តទៅទៀត ជាពិសេសរក្សាបាននូវសុខដុមនីយកម្មនៅគ្រប់សាសនាទាំងអស់ដែលប្រតិបត្តិគោលលទ្ធិសាសនានៅព្រះជាណាចក្រកម្ពុជា។
២-សូមថ្នាក់ដឹកនាំនិងបរិស័ទគ្រប់សាសនាទាំងអស់ ចូលរួមផ្សព្វផ្សាយដល់សាសនិករបស់ខ្លួនអំពីគុណវិបត្តិនៃគ្រឿងញៀន នឹងបញ្ហាការគោរពច្បាប់ចរាចរណ៍ និងច្បាប់ផ្សេងៗទៀតរបស់រដ្ឋតាមរយៈការទេសនាអប់រំ សិក្ខាសាលា វគ្គបណ្ដុះបណ្ដាល និងវិធីសាស្ត្រផ្សេងៗទៀត តាមគ្រប់រូបភាពដែលអាចធ្វើទៅបានប្រកបដោយប្រសិទ្ធភាព។
៣-ជំរុញឱ្យថ្នាក់ដឹកនាំ និងបរិស័ទគ្រប់សាសនាធ្វើយ៉ាងណាជួយគ្នាក្នុងការទប់ស្កាត់ការប្រើប្រាស់គ្រឿងញៀននៅក្នុងសហគមន៍ ក៏ដូចជាការចូលរួមគោរពច្បាប់ចរាចរណ៍ទាំងអស់គ្នា ក្នុងគោលបំណងដើម្បីកាត់បន្ថយគ្រោះថ្នាក់ចរាចរណ៍ឲ្យបានក្នុងកម្រិតខ្ពស់បំផុត។
៤-ជំរុញឱ្យថ្នាក់ដឹកនាំនិងបរិស័ទគ្រប់សាសនាទាំងអស់រួមសហការគ្នា សាមគ្គីគ្នា និងត្រូវមានឯកភាពផ្ទៃក្នុងក្នុងសហគមន៍តែមួយ។
៥-ជំរុញ និងគាំទ្រឱ្យមានការរៀបចំការជួបជុំបែបនេះឱ្យបានទៀងទាត់ ដើម្បីបង្ហាញពីសាមគ្គីភាព ការចេះយោគយល និងអធ្យាស្រ័យគ្នារវាងសហគមន៍សាសនាផ្សេងៗគ្នា។
៦-សូមចាត់ទុកសេចក្តីប្រកាសរួម ជាគោលការណ៍សម្រាប់អនុវត្តរួមគ្នា ដើម្បីសុខុមនីយកម្មសាសនានៅកម្ពុជា និងរួមចំណែកអនុវត្តកម្មវិធីនយោបាយរបស់រាជរដ្ឋាភិបាល៕ដោយ៖កូឡាប
