ខេត្តព្រះសីហនុ៖ អភិបាលខេត្តព្រះសីហនុ លោក យន្ត មីន មានប្រសាសន៍ថា ស្ពានដែកឆ្លងដៃ សមុទ្រឬឆ្នេរសមុទ្ររាម មានទីតាំងនៅភូមិអុង ឃុំរាម ស្រុកព្រៃនប់ ដែលពេលបច្ចុប្បន្នមានសភាពទ្រុឌទ្រោមខ្លាំង នឹងត្រូវស្ថាបនាជាថ្មី ជំនួសដោយស្ពានថ្មវិញ។
ផ្តល់សម្ភាសឲ្យអ្នកយកព័ត៌មាន cen.com.kh ប្រចាំខេត្តព្រះសីហនុដឹង នៅព្រឹកថ្ងៃពុធ ទី១០ ខែមករា ឆ្នាំ២០១៨ លោក យន្ត មីន អះអាងថា ស្ពានដែកឆ្លងដៃសមុទ្រ មានទីតាំងនៅភូមិអុង ឃុំរាម និងត្រូវស្ថាបនាថ្មីជំនួសវិញដោយស្ពានថ្ម។ លោកបន្តថា ស្ពានថ្មីនេះ នឹងចាប់ផ្តើមស្ថាបនា ដាក់ជូនប្រជាពលរដ្ឋក្នុងមូលដ្ឋាន ពិសេសភ្ញៀវទេសចរជាតិ-អន្តរជាតិ ប្រើប្រាស់ក្នុងពេលដ៏ឆាប់ខាងមុខ។
លោក យន្ត មីន បានអះអាងដូច្នេះ គឺបានកើតឡើងបន្ទាប់ពី ប្រជាពលរដ្ឋរស់នៅ ភូមិអុង ឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ និងភ្ញៀវទេសចរមួយចំនួន បានរអ៊ូរទាំ និងព្រួយបារម្ភចំពោះសុវត្ថិភាពពេលធ្វើដំណើរឆ្លងកាត់ស្ពានដែកឆ្លងកាត់ដៃសមុទ្រ នៃឆ្នេរសមុទ្ររាម ដែលមានសភាពទ្រុឌទ្រោមខ្លាំង មិនអាចអោយយានជំនិះគ្រប់ប្រភេទ ពិសេសយន្តតូចធំ បើកឆ្លងកាត់បានទៀតទេ។
លោក យន្ត មីន សង្កត់ធ្ងន់ថា «មិនមែនតែស្ពាននៅភូមិអុង ឆ្នេរសមុទ្ររាមមួយទេ ដែលនឹងត្រូវបើកការរដ្ឋានស្ថាបនាក្នុងពេលខាងមុខ ប៉ុន្តែ ផ្លូវភ្លោះ បំពាក់ភ្លើងបំភ្លឺ និងមានសួនច្បារចម្រុះពណ៌ជាច្រើនខ្សែ ឬជាច្រើនទីតាំងទៀត ក៏នឹងត្រូវបើកការរដ្ឋានស្ថាបនាអភិវឌ្ឍមូលដ្ឋាន ខេត្តព្រះសីហនុឲ្យបានកាន់តែប្រសើរនាថ្ងៃអនាគត។
លោកមានមោទនៈភាពថា ក្រោមការដឹកនាំ របស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងការផ្តល់ទំនុកចិត្តពីសំណាក់ប្រមុខដឹកនាំព្រមទាំងថ្នាក់ដឹកនាំថ្នាក់ជាតិគ្រប់ស្ថាប័ន ដែលផ្តល់ឱកាសដល់រូបលោក បានមកដឹកនាំអភិវឌ្ឍខេត្តព្រះសីហនុ លោកនឹងខិតខំនាំយកចំណេះដឹង និងចំណេះធ្វើ ដែលមានទាំងប៉ុន្មាន ពិសេសនឹងកែនគរផ្នែកពាក់ព័ន្ធទាំងរដ្ឋ និងវិស័យឯកជន ឲ្យរួមគ្នាជាមួយរដ្ឋបាល ខេត្តព្រះសីហនុ ដើម្បីជម្រុញឲ្យមូលដ្ឋាននេះ មានការអភិវឌ្ឍ បានប្រសើរថែមទៀតនាថ្ងៃខាងមុខ ដើម្បីបំរើសសេចក្តីត្រូវការ របស់ប្រជាពលរដ្ឋ ក្នុងមូលដ្ឋាន ក៏ដូចជាភ្ញៀវទេសចរជាតិអន្តរជាតិ ដែលចូលមកទស្សនាខេត្តនេះ ឲ្យមានភាពកក់ក្តៅ និងមានសុវត្ថិភាព។
កាលពីសប្តាហ៍មុននេះ ប្រជាពលរដ្ឋភូមិអុង ឃុំរាម ពិសេសភ្ញៀវទេសចរ បានរអ៊ូរទាំថា ស្ពានដែកឆ្នេរសមុទ្ររាម អាចឆ្លងកាត់ត្រឹមអ្នកដំណើរថ្មើជើង ម៉ូតូ និងកង់តែប៉ុណ្ណោះ ព្រោះកំរាលស្ពានដែក បានពុកផុយ ឬធ្លុះធ្លាយស្ទើទាំងស្រុងអស់ទៅហើយៗគ្មានការជួសជុលទេ។
ប្រជាពលរដ្ឋ បានអះអាងថា ស្ពានទ្រុឌទ្រោមនេះ ក៏ធ្លាប់បង្កគ្រោះថ្នាក់ដល់អ្នកបើកបរម៉ូតូ ឆ្លងកាត់ជាច្រើនករណីរួចមកហើយដែរ ដោយកង់ ឬម៉ូតូ បានបើកផុងកំរាលស្ពាន ឬធ្លាក់កង់ម៉ូតូ ស្ទើធ្លាក់ចូលទៅក្នុងទឹកសមុទ្រ ដោយសារសភាពទ្រុឌទ្រោម របស់ស្ពានដែក ដែលមិនមានអាជ្ញាធរពីស្ថាប័នពាក់ព័ន្ធស្ថាប័នណាមួយចេញមុខជួសជុលកន្លងមក។ ពិសេសជាងនេះ ស្ពានដែក សមុទ្ររាមនេះ ក៏ធ្លាប់បង្កគ្រោះថ្នាក់ដល់ភ្ញៀងទេសចរ ដែលបើកបរឆ្លងកាត់ស្ពាន ដោយមិនបានដឹងថា ស្ពាននេះមានសភាពទ្រុឌទ្រោមខ្លាំង ជាពិសេសការបើកបរនៅពេលយប់ ដែលមិនមានភ្លើងបំភ្លឺ ហើយរថយន្តមិនអាចបើកឆ្លងកាត់បានដូចពេលមុនទៀតទេ។
ផ្តើមពីបញ្ហានេះ ប្រជាពលរដ្ឋមួយចំនួនរស់នៅឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ បានសំណូមពរដល់ លោក យន្ត មីន អភិបាលខេត្តព្រះសីហនុ ជួយជួសជុល ឬស្ថាបនាស្ពានដែកឆ្លងដៃសមុទ្រ ឆ្នេរសមុទ្ររាម អោយបានទាន់ពេល ដើម្បីបញ្ជៀសគ្រោះថ្នាក់ពីការធ្វើដំណើរឆ្លងកាត់ស្ពានដែក ដែលមានសភាពទ្រុឌទ្រោមនេះ។
បន្ថែមលើនេះ ភ្ញៀវទេសចរមួយក្រុម ដែលបាននាំក្រុមគ្រួសារប្រពន្ធកូន និងសង្សា មកកម្សាន្តតាមឆ្នេរសមុទ្ររាម នៅថ្ងៃឈប់សំរាកថ្ងៃបុណ្យ ៧មករា ឆ្នាំ២០១៨ ថ្លែងថា ពួកគេបិះនឹងត្រូវគ្រោះថ្នាក់ផុងកំរាលស្ពាន ដោយសារមិនដឹងថាស្ពានដែកឆ្លងដៃសមុទ្រឆ្នេររាម មិនអាចអោយរថយន្តបើកឆ្លងកាត់បាននៅពេលនេះ។
ត្រង់ចំណុចនេះ ទាំងប្រជាពលរដ្ឋ និងភ្ញៀវទេសចរ បានសំណូមពរថា មុននឹងស្ពានដែកឆ្នេរសមុទ្ររាមទ្រុឌទ្រោមនេះ ត្រូវស្ថាបនាថ្មីឡើងវិញនាពេលខាងមុខ ពួកគេបានស្នើដល់អាជ្ញាធរស្ថាប័នពាក់ព័ន្ធ នៃរដ្ឋបាលខេត្តព្រះសីហនុ អោយជួយដាក់ស្លាកសញ្ញាគ្រោះថ្នាក់ បញ្ជាក់ពីសភាពទ្រុឌទ្រោម របស់ស្ពានដែកឆ្នេរសមុទ្ររាម ដើម្បីជាសញ្ញាសម្គាល់ដល់អ្នកធ្វើដំណើរឆ្លងកាត់ ព្រោះរាល់ថ្ងៃនេះ មិនមានដាក់សញ្ញាបង្ហាញពីគ្រោះថ្នាក់នេះទេ។
ព័ត៌មានជុំវិញការត្រៀមស្ថាបនាស្ពានឆ្នេរសមុទ្ររាមជាថ្មីឡើងវិញនេះ ប្រជាពលរដ្ឋ ខេត្តព្រះសីហនុ និងភ្ញៀវទេសចរ បង្ហាញការគាំទ្រទៅលើសកម្មភាពដឹកនាំ របស់ លោក យន្ត មីន អភិបាលខេត្តព្រះសីហនុ ពិសេសសម្តេចអគ្គមហាសេនាបតីតេជោ ហ៊ុន សែន ដែលបានយកចិត្តទុកដាក់ដល់សុខទុក្ខ និងការលំបាក របស់ប្រជាពលរដ្ឋ និងជម្រុញការដឹកនាំប្រទេស ឲ្យមានការរីកចំរើន និងមានសុខសន្តិភាពរហូតមកដល់សព្វថ្ងៃនេះ។
បន្ថែមលើនេះ ភ្ញៀវទេសចរ និងពលរដ្ឋខេត្តព្រះសីហនុ ក៏នឹងទន្ទឹងរង់ចាំស្ពានថ្មីឆ្លងដៃសមុទ្រ នៃឆ្នេរសមុទ្ររាម ឲ្យមានសុវត្ថិភាពឡើងវិញនាថ្ងៃខាងមុខ និងស្នើដល់រដ្ឋបាលខេត្តព្រះសីហនុ ជួយជម្រុញសកម្មភាពស្ថាបនាស្ពានដែកសមុទ្ររាម ដែលចាស់ទ្រុឌទ្រោមនេះ ឲ្យបានឆាប់ ដើម្បីអាចឲ្យយានយន្តគ្រប់ប្រភេទ អាចធ្វើដំណើរបើកឆ្លងកាត់ ឲ្យមានសុវត្ថិភាពដូចដើមឡើងវិញ៕ ដែន សីមា