ភ្នំពេញ៖ ការអភិវឌ្ឍន៍ធនធានមនុស្ស ដែលជាចំណុចស្នូលនៃជីវិតអាជីវកម្ម និងចូលរួមដល់ការអភិវឌ្ឍន៍សេដ្ឋកិច្ចជាតិ។ បញ្ហាកង្វះកម្លាំងពលកម្មប្រកបដោយជំនាញ គឺជាកត្តាប្រឈមមួយដែលទាមទារចាំបាច់នូវដំណោះស្រាយដ៏សមស្រប។ លោកឧកញ៉ា ងួន ម៉េងតិច ក៏បានអញ្ជើញគ្រូបង្គោល មកពីប្រទេសសឹង្ហបូរី ដ៏មានបទពិសោធន៍ក្នុងវិស័យនីមួយៗ មកបណ្តុះបណ្តាលកម្លាំងពលកម្មនៅកម្ពុជា។
ថ្ងៃចន្ទ ទី ១៨ ខែវិច្ឆិកា ឆ្នាំ២០១៩ លោកឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា បានប្រកាសបើកសិក្ខាស្តីពីការអភិវឌ្ឍន៍ធនធានមនុស្សនៅកម្ពុជា ដែលសហការរៀបចំដោយសភាពាណិជ្ជកម្មកម្ពុជា និងក្រុមហ៊ុនសឹង្ហបូរី ដោយមានការចូលរួមចែករំលែកបទពិសោធន៍ ពីវាគ្មិនអន្តរជាតិដ៏ល្បីៗ មកពីសឹង្ហបូរី ចក្រភពអង់គ្លេស និងវាគ្មិនក្នុងស្រុកផងដែរ។ សិក្ខាសាលានេះ មានការចូលរួមពីម្ចាស់អាជីវកម្ម ថ្នាក់ដឹកនាំ និងបុគ្គលិកក្រុមហ៊ុន ជាង១០០ នាក់។
ថ្លែងក្នុងឱកាសបើកសិក្ខាលាសានេះ ឧកញ៉ា ងួន ម៉េងតិច បានគូសបញ្ជាក់ពីសារសំខាន់នៃការអភិវឌ្ឍន៍ធនធានមនុស្ស ដែលជាចំណុចស្នូលនៃជីវិតអាជីវកម្ម និងចូលរួមដល់ការអភិវឌ្ឍន៍សេដ្ឋកិច្ចជាតិ។ បញ្ហាកង្វះកម្លាំងពលកម្មប្រកបដោយជំនាញ គឺជាកត្តាប្រឈមមួយដែលទាមទារចាំបាច់នូវដំណោះស្រាយដ៏សមស្រប។ សភាពាណិជ្ជកម្មកម្ពុជា ដែលជាស្ថាប័នតំណាងឲ្យវិស័យឯកជន តែងខិតខំប្រឹងប្រែងចូលរួមចំណែក បំពេញតម្រូវការកម្លាំងពលកម្មជំនាញ តាមរយៈការសហការរៀបចំវគ្គបណ្តុះបណ្តាលជាមួយដៃគូបរទេស ក៏ដូចជារៀបចំសិក្ខាសាលាទៅតាមវិស័យនីមួយៗ។
លោកឧកញ៉ា ងួន ម៉េងតិច មានប្រសាសន៍ថា សភាពាណិជ្ជកម្មកម្ពុជា នឹងសហការជាមួយដៃគូសឹង្ហបូរី អញ្ជើញគ្រូបង្គោល ដ៏មានបទពិសោធន៍ក្នុងវិស័យនីមួយៗ មកបណ្តុះបណ្តាលកម្លាំងពលកម្មនៅកម្ពុជា ជាបន្តបន្ទាប់ ស្របតាមស្តង់ដារអន្តរជាតិ៕ ដោយ ៖ បញ្ញាស័ក្តិ
