ភ្នំពេញ៖ អនុប្រធានអចិន្ត្រៃយ៍គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC) លោក ថោង ខុន បានលើកឡើងនូវការកំណត់យកជាគោលការណ៍ថា សម្រាប់ SEA Games លើកទី៣០ ឆ្នាំ២០១៩ នៅហ្វីលីពីន និង SEA Games លើកទី៣១ ឆ្នាំ២០២១ នៅទីក្រុងហាណូយ ប្រទេសវៀតណាម គឺជា Games យុទ្ធសាស្រ្ត ក្នុងការវាយតម្លៃ និងវាស់ស្ទង់សមត្ថភាពគុណផលកីឡា (Performance) របស់កីឡាករ កីឡាការិនី គ្រូបង្វឹក មន្ត្រីកីឡា ដើម្បីកែលម្អចំណុចខ្វះខាត និងបង្កើនគុណភាព សមត្ថភាព ធានាភាពសក្តិសិទ្ធគ្រប់មុខសញ្ញាធនធានមនុស្ស ក្នុងវិស័យកីឡា ដើម្បីសម្រួចគោលដៅឲ្យកាន់តែមុតស្រួច ក្នុងដំណើរឆ្ពោះទៅទទួលរៀបចំធ្វើជាម្ចាស់ផ្ទះព្រឹត្តិការណ៍កីឡា SEA Games លើកទី៣២ ឆ្នាំ២០២៣ នៅកម្ពុជាឲ្យទទួលបានជោគជ័យ។
លោក ថោង ខុន មានប្រសាសន៍ទៀតថា ក្រោមការដឹកនាំដោយសម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC បានអនុវត្តការងារតាមផែនការមេ និងផែនទីបង្ហាញផ្លូវយ៉ាងរលូន និងបានអនុវត្តរបបប្រជុំប្រចាំត្រីមាស រៀងរាល់បីខែម្ដងជាទៀងទាត់ ដើម្បីពិនិត្យរបាយការណ៍វឌ្ឍនភាពពន្លឿនការអនុវត្តការងារបន្ត និងដោះស្រាយបញ្ហាប្រឈមនានាឲ្យបានទាន់ពេលវេលា ពិសេសបានធ្វើរបាយការណ៍ជូនរាជរដ្ឋាភិបាលរៀងរាល់ត្រីមាស។ CAMSOC បានផ្ដោតការយកចិត្តទុកដាក់ខ្ពស់ លើការបណ្តុះបណ្ដាលធនធានមនុស្ស ពិសេសធនធានកីឡាករ កីឡាការិនីជំនាញ ទាំងការបញ្ជូនទៅហ្វឹកហាត់ក្រៅប្រទេស និងការប្រកួតជាលក្ខណៈអន្តរជាតិញឹកញាប់។ ជាមួយគ្នានោះ ការរៀបចំហេដ្ឋារចនាសម្ព័ន្ធកីឡាត្រៀម SEA Games ឆ្នាំ២០២៣ ក៏បានប្រព្រឹត្តទៅយ៉ាងរលូនតាមផែនការកំណត់ ខណៈភូមិកីឡាក៏បានចាប់ផ្ដើមការដ្ឋានសាងសង់ផងដែរ។ ដើម្បីសម្រេចនូវបេសកកម្មដ៏ធំជាប្រវត្តិសាស្ត្ររបស់ព្រះរាជាណាចក្រកម្ពុជា ក្នុងដំណើរឆ្ពោះទៅទទួលរៀបចំធ្វើជាម្ចាស់ផ្ទះព្រឹត្តិការណ៍កីឡា SEA Games លើកទី៣២ ឆ្នាំ២០២៣ ឲ្យទទួលបានជោគជ័យនោះ CAMSOC នឹងបញ្ជូនមន្ត្រីកីឡាជំនាញរបស់ខ្លួន ចុះធ្វើកម្មសិក្សាដកស្រង់បទពិសោធន៍ ការគ្រប់គ្រង ដឹកនាំ SEA Games ចំនួន៥៧នាក់ នៅក្នុងចំណោមប្រតិភូកីឡាកម្ពុជា សរុបចំនួន៤៤៧នាក់ សម្រាប់ស៊ីហ្គេម លើកទី៣០ នៅប្រទេហ្វីលីពីន ឆ្នាំ២០១៩ ខាងមុខឆាប់ៗនេះ។
ក្នុងនាមប្រតិភូកីឡាកម្ពុជា លោកអនុប្រធានអចិន្ត្រៃយ៍ ក៏សម្តែងនូវអំណរគុណចំពោះក្រសួងអប់រំ យុវជន និងកីឡា សហព័ន្ធកីឡាជាតិ និងគ្រប់ក្រសួងស្ថាប័ន អង្គភាព វិស័យឯកជនពាក់ព័ន្ធ ដែលបានផ្ដល់ភាពកក់ក្ដៅ ក្នុងកិច្ចសហការជួយឧបត្ថម្ភគាំទ្រដល់វិស័យកីឡាជាតិ ក៏ដូចជាចលនាអូឡាំពិកនៅកម្ពុជា ឲ្យទទួលបាននូវឧត្ដមភាពកីឡាលើឆាកអន្ដជាតិ។
សូមបញ្ជាក់ថា សម្រាប់ព្រឹត្តិការណ៍កីឡាស៊ីហ្គេម ដែលត្រូវបានប្រារព្ធធ្វើឡើងរៀងរាល់២ឆ្នាំម្តងនេះ គឺឆ្នាំ២០១៩នៅហ្វីលីពីន ឆ្នាំ២០២១ នៅទីក្រុងហាណូយ ប្រទេសវៀតណាម ឆ្នាំ២០២៣ នៅរាជធានីភ្នំពេញ នៃព្រះរាជាណាចក្រកម្ពុជា និងស៊ីហ្គេម ឆ្នាំ២០២៥ នៅប្រទេសថៃ៕ដោយ៖កូឡាប
