មេដឹកនាំហុងកុង អ្នកស្រី Carrie Lam បាននិយាយនៅថ្ងៃចន្ទនេះថា រដ្ឋាភិបាលអ្នកស្រីនឹងធ្វើការស្តាប់មតិសាធារណៈ ក្រោយពេលគណបក្សប្រជាធិបតេយ្យ បានឈ្នះកៅអីក្រុមប្រឹក្សាស្រុកភាគច្រើន។
នៅថ្ងៃចន្ទ ប្រព័ន្ធផ្សព្វផ្សាយក្នុងស្រុក បានឲ្យដឹងថា គណបក្សគាំទ្រប្រជាធិបតេយ្យហុងកុងជាច្រើន បានឈ្នះកៅអីក្រុមប្រឹក្សាស្រុកចំនួន ៣៩០ ក្នុងចំណោមកៅអីចំនួន ៤៥២ ដែលស្មើនឹងជិត ៩០ភាគរយ។
ការឈ្នះយ៉ាងភ្លូកទឹកភ្លូកដីនេះកើតឡើង ក្រោយពេលពលរដ្ឋហុងកុងចំនួនយ៉ាងច្រើនបានទៅធ្វើការបោះឆ្នោត ក្រោយពេលមានការតវ៉ាប្រឆាំងនឹងរដ្ឋាភិបាលអស់រយៈពេល ៦ខែ។
អ្នកស្រី Carrie Lam បានថ្លែងនៅក្នុងសេចក្តីប្រកាសថា ”រដ្ឋាភិបាលនឹងធ្វើការស្តាប់មតិរបស់ប្រជាពលរដ្ឋ និងគិតពីពួកគេយ៉ាងស្មោះត្រង់”។
អ្នកស្រីបន្តទៀតថា “រដ្ឋាភិបាលគោរពតាមលទ្ធផលបោះឆ្នោត”។
អ្នកស្រីក៏បានទទួលស្គាល់ថា លទ្ធផលបោះឆ្នោតបានបង្ហាញពីភាពពិតថា ពលរដ្ឋមិនពេញចិត្តនឹងស្ថានភាពសង្គមបច្ចុប្បន្ននោះទេ។
សូមបញ្ជាក់ថា ទីក្រុងហុងកុងបានត្រូវញាំញីដោយបាតុកម្មអស់រយៈពេលជាង ៥ខែមកហើយ ដែលការផ្ទុះបាតុកម្មដំបូងកើតឡើងដោយសារតែ ច្បាប់ធ្វើបត្យាប័នដែលមានការអនុញ្ញាតិឲ្យមានការបញ្ជូលជនសង្ស័យទៅធ្វើការកាត់ទោសនៅចិនបាន។
ទោះបីច្បាប់នេះ ត្រូវបានមេដឹកនាំហុងកុង គឺអ្នកស្រី Carrie Lam ប្រកាសបោះបង់ចោលក្តី ក៏ក្រុមបាតុករនៅមិនទាន់សុខចិត្ត ព្រោះពួកគេនៅទាមទារឲ្យរដ្ឋាភិបាលអនុវត្តចំណុចមួយចំនួនទៀត។
ហុងកុង ត្រូវបានអង់គ្លេសប្រគល់ឲ្យចិនកានកាប់វិញក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
