ខេត្តស្វាយរៀងៈលោកស្រី ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា រួមជាមួយលោកស្រីភួង សារី លេខាធិការគណៈកម្មាធិការសាខាកាកបាទក្រហមកម្ពុជាខេត្តស្វាយរៀង និងលោក Ludovic ARNOUT មន្ត្រីសម្របសម្រួលផ្នែកអនាម័យទឹកស្អាត សហព័ន្ធអន្តរជាតិប្រចាំតំបន់អាស៊ី-ប៉ាស៊ីហ្វិក នៅព្រឹកថ្ងៃទី ២៧ ខែវិច្ឆិកា ឆ្នាំ ២០១៩ នេះ បាន អញ្ជើញបើកសិក្ខាសាលាបូកសរុបលទ្ធផលការងារ និងបទពិសោធន៍ រយៈពេល ៥ ឆ្នាំ (២០១៥-២០១៩) នៃ គម្រោងបង្កើននិរន្តរភាព ការប្រើប្រាស់ទឹកស្អាត និងការអនុវត្តអនាម័យ ដែលអនុវត្ត នៅក្នុងភូមិគោលដៅចំនួន ២៣ ឃុំចំនួន ៧ និងស្រុក-ក្រុងចំនួន ៤ របស់សាខាកាកបាទក្រហមកម្ពុជាខេត្តក្រចេះ ខេត្តស្វាយរៀង និង ខេត្តបន្ទាយមានជ័យ ដោយមានការគាំទ្រហិរញ្ញវត្ថុពីមូលនិធិសប្បុរសធម៌ កាទ្យេ តាមរយៈ សហព័ន្ធអន្តរជាតិ នៃសមាគមកាកបាទក្រហម និងអឌ្ឍចន្ទក្រហម ។
លោកស្រី អគ្គលេខាធិការរងទី ១ បានសម្តែងនូវក្តីសោមនស្សរីករាយ និងពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ចំពោះសមាជិក-សមាជិកា នៃអង្គសិក្ខាសាលា ទាំងមូល ជាពិសេស សូមថ្លែងអំណរគុណដ៏ជ្រាលជ្រៅចំពោះ សហព័ន្ធអន្តរជាតិ ដែលជាដៃគូកិច្ចសហប្រតិបត្តិការដ៏ជិតស្និទ្ធ ក្នុងការស្វែងរកសប្បុរសជន ជួយឧបត្ថម្ភគាំទ្រផ្នែកហិរញ្ញវត្ថុ និងបច្ចេកទេស ដល់កាកបាទក្រហមកម្ពុជា ជារៀងរហូតមក ។
លោកស្រីក៏បានថ្លែងអំណរគុណ ចំពោះមូលនិធិ សប្បុរសធម៌កាទ្យេ (Cartier Charitable Foundation) ដែលបានជួយឧបត្ថម្ភថវិកាតាមរយៈសហព័ន្ធអន្តរជាតិ ដល់កាកបាទក្រហមកម្ពុជា សម្រាប់អនុវត្តគម្រោង រយៈពេល ៥ ឆ្នាំ (២០១៥-២០១៩) ក្នុងការជួយរួមចំណែក ធ្វើឱ្យប្រសើរឡើងនូវស្ថានភាពសុខភាពរបស់ ប្រជាពលរដ្ឋងាយរងគ្រោះបំផុត តាមរយៈការផ្គត់ផ្គង់ទឹកស្អាត អនាម័យបរិស្ថាន និងការលើកកម្ពស់អនាម័យខ្លួនប្រាណ ។ល។ ទន្ទឹមនឹងនេះ លោកស្រី ក៏បានផ្តាំផ្ញើដល់ សាខានីមួយៗដែលអនុវត្តគម្រោងនេះ ត្រូវគិតគូរ ធ្វើផែនការអភិវឌ្ឍសាខាឱ្យបានច្បាស់លាស់ ដើម្បីសាខា-អនុសាខា អាចដំណើរការ អនុវត្តគម្រោងដោយខ្លួនឯងដោយនិរន្តរភាព ហើយត្រូវមានយន្តការធ្វើយ៉ាងណា ឱ្យប្រជាពលរដ្ឋទាំងអស់ចូលរួមថែរក្សាសមិទ្ធផល ដែលបានកសាងឡើងឱ្យគង់វង្សយូរអង្វែងតទៅ ។
លោក Ludovic ARNOUT ក៏បានបង្ហាញពីអារម្មណ៍ រីករាយដោយមើលឃើញលទ្ធផលជាវិជ្ជមានជាច្រើន របស់ គម្រោង ដែលសម្រេចបានរួមគ្នាក្នុងរយៈពេល ៥ ឆ្នាំនេះ ហើយសង្ឃឹមជឿជាក់ថា សិក្ខាសាលារយៈពេល ២ ថ្ងៃ នេះនឹងបង្ហាញកាន់តែច្បាស់ពីមេរៀនបទពិសោធន៍ល្អៗ រួមទាំងបញ្ហាប្រឈមនានា ដែលនឹងត្រូវ ដោះស្រាយ រួមគ្នា ដើម្បីភាពរីកចម្រើន ជោគជ័យថែមទៀត ក្នុងបុព្វហេតុមនុស្សធម៌ ។
សូមបញ្ជាក់ថា សមិទ្ធផលគួរជាទី មោទនៈក្នុងការអនុវត្តគម្រោងរយៈពេល ៥ ឆ្នាំនេះ គឺ មានប្រជាពលរដ្ឋចំនួន ២៥.៩៦៦នាក់ (ស្ត្រីចំនួន ១២.៩៣៦ នាក់) បានទទួលផលជារូបវន្តពីគម្រោងនេះ ក្នុងនោះ ការជីក និងស្តារស្រះសហគមន៍ ចំនួន ៥ ស្រះ ការសាងសង់បង្គន់អនាម័យ ចំនួន ១.៤២៦បង្គន់, អណ្តូងស្នប់ និងអណ្តូងខួងជម្រៅជ្រៅ ចំនួន ២២ អណ្តូង, ធុងស្តុកទឹកចំនួន ៥, ស្ថានីយលាងសម្អាតដៃចំនួន ៧ កន្លែង, និងប្រព័ន្ធទឹកស្អាតចំនួន ២ ៕ដោយ៖ វ៉ៃកូ
