ភ្នំពេញ ៖ រដ្ឋបាលរាជធានីភ្នំពេញ នៅដើមខែធ្នូនេះ នឹងធ្វើជាម្ចាស់ផ្ទះទទួលភ្ញៀវប្រមាណ១៤០ទីក្រុង ដែលនឹងមកចូលរួមមហាសន្និបាតសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF) លើកទី៣៩ ។ ដើម្បីឲ្យប្រជាពលរដ្ឋក៏ដូចជាមហាជនបានយល់ច្បាស់ពីអត្ថន័យ ខ្លឹមសារ និងអត្ថប្រយោជន៍នៃមហាសន្និបាតនេះ កាលពីព្រឹកថ្ងៃទី២៩ វិច្ឆិកា ២០១៩នេះ នៅសាលារាជធានីភ្នំពេញ លោកនួន ផារ័ត្ន អភិបាលរងរាជធានីភ្នំពេញ បានធ្វើសន្និសីទសារព័ត៌មានមួយ ដោយមានការសែតជាតិ អន្តរជាតិ ចូលរួមយកព័ត៌មានជាច្រើនអង្គភាពផងដែរ។
ក្នុងសន្និសីទសារព័ត៌មាននោះ លោកនួន ផារ័ត្ន បានមានប្រសាសន៍ថា មហាសន្និបាទសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF) លើកទី៣៩ ដែលនឹងធ្វើឡើងនៅដើមខែធ្នូនេះ មានប្រធានបទ ឬកម្មវិធីចំនួន៣សំខាន់ៗ ក្នុងនោះរួមមាន កម្មវិធីទី១ បើកមហាសន្និបាត ដើម្បីអនុម័តនូវការងារសំខាន់មួយចំនួន និងការដាក់ទិសដៅការងារនៅឆ្នាំបន្ទាប់ របស់សមាគមន។ ទី២ ក្រោយបើកមហាសន្និបាត ធ្វើសន្និសីទបច្ចេកទេស ពាក់ព័ន្ធទៅ នឹងការរៀបចំក្រុងឡើងវិញ បន្ទាប់ពីមានគ្រោះមហន្តរាយនានា។ កម្មវិធីទី៣ ជាកម្មវិធីផ្លូវការណ៍ ដោយមានកិច្ចប្រជុំអចិន្ត្រៃយ៍ ដែលមានតែ២៧ទីក្រុងចូលរួម ដើម្បីអនុម័តលើរបាយការណ៍សំខាន់ៗមួយចំនួន។
លោកអភិបាលរង បានបន្តថា ការបង្កើតនូវសមាគមនេះឡើង គឺដើម្បីចងក្រង និងប្រទេសដែលប្រើភាសាបារាំង ដើម្បីចែករំលែកបទពិសោធន៍ ដោះស្រាយបញ្ហាប្រឈមរបស់ទីក្រុង ក៏ដូចជាដើម្បីពង្រឹងនូវសម្ព័ន្ធមេត្រីភាព រវាងទីក្រុងនិងទីក្រុងផងដែរ។ ជាក់ស្តែង រាជធានីភ្នំពេញ
និងទីក្រុងប៉ារីស មានទំនាក់ទំនងទ្វេភាគី ដោយទីក្រុងប៉ារីសបានជួយរាជធានីភ្នំពេញជាច្រើន ជាពិសេសលើ បច្ចេកទេសក្នុងការរៀបចំក្រុង។
លោក បានបញ្ជាក់ថា ក្នុងក្របខ័ណ្ឌនៃសមាជិក AIMF នេះ រាជធានីភ្នំពេញ ទទួលបានអត្ថប្រយោជន៍ច្រើនជាងគេ ដោយបច្ចុប្បន្ននេះ យើងមានគម្រោងចំនួន៣កំពុងធ្វើ ដែលជាគម្រោងមួយមានសារសំខាន់ ក្នុងនោះគម្រោងទី១ ក្នុងក្របខ័ណ្ឌសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF) យើងទទួលបានមូនិធី ពីសហគមនអឺរ៉ុបនូវថវិកាជាង១លានដុល្លារ ដើម្បីពង្រឹងការគ្រប់គ្រងរដ្ឋបាល នៅថ្នាក់ក្រោមជាតិ លើការរៀបចំតំបន់មិនរៀបរយមួយធ្វើជាគំរូ បង្ហាញនូវនីតិវិធី ឬវិធីសាស្រ្ត ក្នុងការរៀបចំ តំបន់មិនរៀបរយ។ ទី២ យើងទទួលបានជំនួយបច្ចេកទេស តាមរយៈសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF) ដើម្បីសិក្សាលើការ កសាងស្ថានីយកែច្នៃពីភក់បង្គន់ដែលចេញពីលូតាមផ្ទះ ទៅដាក់នៅស្ថានីយមួយ ដោយកែច្នៃជាជីរធម្មជាតិ ជៀសវាងការយកភក់បង្គន់ដែលយកចេញពីលូតាមផ្ទះនេះ ទៅបោះចោលតាមប្រឡាយ បឹង បួ ដែលធ្វើឲ្យប៉ះពាល់បរិស្ថាននាពេលខាងមុខ។ ទី៣ ទទួលបានគម្រោងបច្ចេកទេសក្នុងការសិក្សាអំពីលំហ អាកាសសាធារណៈ និងការពារអគារបេតិកភ័ណ្ឌ។ ជាងនេះទៅទៀតសមាគមន៍នេះ ត្រូវបានបង្កើតឡើង ដើម្បីចងក្រង ប្រមូលផ្តុំបណ្តាទីក្រុងទាំងអស់ ចែករំលែកបទពិសោធន៍គ្នា ដោះស្រាយបញ្ហាប្រឈមជាមួយគ្នា នឹងជួយគ្នាទៅវិញទៅមក គឺទីក្រុងធំ ត្រូវជួយមកទីក្រុងដែលមានតម្រូវការអភិវឌ្ឍន៍ ដោយជួយជាជំនួយបច្ចេកទេស ឬផ្តល់ជាមូលនិធិពីអង្គការនានា នៅលើពិភពលោក តាមរយៈសមាគមនេះ ៕ដោយ៖កូឡាប
