ចិននឹងធ្វើការហាមប្រាមមិនឲ្យនាវា និងយន្តហោះចំបាំងអាមេរិចមកចូលសំចតនៅទីក្រុងហុងកុងឡើយ ដែលវិធានការនេះគឺដើម្បីឆ្លើយតបទៅនឹងអាមេរិច ដែលទើបតែចេញច្បាប់គាំត្រអ្នកប្រជាធិបតេយ្យនៅហុងកុង។
“ដើម្បីឆ្លើយតបទៅនឹងសកម្មភាពដ៏គ្មានហេតុផលរបស់អាមេរិច រដ្ឋាភិបាលចិននឹងធ្វើការព្យួរការពិនិត្យលើសំណើររបស់អាមេរិច ដែលសុំឲ្យកប៉ាល់ និងយន្តហោះរបស់ខ្លួនមកទីក្រុងហុងកុង”។ នេះបើតាមការបញ្ជាក់របស់អ្នកនាំពាក្យក្រសួងការបរទេសចិនឈ្មោះ Hua Chunying ថ្លែងនៅក្នុងសន្និសីទសារព័ត៌មានក្នុងទីក្រុងប៉េកាំង។
អ្នកនាំពាក្យរូបនោះក៏បានប្រកាសថា ទីក្រុងប៉េកាំងនឹងធ្វើការដាក់ទណ្ឌកម្មទៅលើអង្គការសិទ្ធិមនុស្សជាច្រើន ដែលបានធ្វើការឃ្លាំមើល និងរាយការណ៍ពីបញ្ហាការតវ៉ានៅហុងកុង។
សូមបញ្ជាក់ថា វិធានការឆ្លើយតបរបស់ចិន កើតឡើងក្រោយពេលប្រធានាធិបតីដូណាល់ ត្រាំ បានធ្វើការចុះហត្ថលេខាងលើច្បាប់ប្រជាធិបតេយ្យ និងសិទ្ធិមនុស្សហុងកុង ក្រោយពេលវាមានការអនុម័តជាឯកច្ឆន្ទពីសភា។
ច្បាប់ថ្មីនោះនឹងអនុញ្ញាតិឲ្យទីក្រុងវ៉ាស៊ីនតោនធ្វើការដាក់ទណ្ឌកម្ម ឬធ្វើការព្យួរឋានៈពាណិជ្ជកម្មពិសេសរបស់ហុងកុង ជុំវិញការរំលោភសិទ្ធិមនុស្ស៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN