អ្នកកាសែតផ្នែកនយោបាយ ជនជាតិជប៉ុនម្នាក់បានស្លាប់ដោយសារតែការធ្វើការងារលើសម៉ោងច្រើនពេក។
អ្នករាយការណ៍ផ្នែកនយោបាយឈ្មោះ Miwa Sado បានស្លាប់អស់រយៈពេល ៤ឆ្នាំមកហើយ ប៉ុន្តែនិយោគជករបស់នាងទើបតែប្រកាសឲ្យដឹងនៅថ្ងៃពុធកន្លងទៅនេះ។
Miwa Sado បានស្លាប់ដោយសារបញ្ហាបេះដូងកាលពីឆ្នាំ ២០១៣ ក្រោយពេលធ្វើការលើសម៉ោងរហូតដល់ ១៥៩ម៉ោង ក្នុងមួយខែ។ នេះបើតាមការប្រកាសឲ្យដឹងរបស់ក្រុមហ៊ុនផ្សព្វផ្សាយរបស់នាងឈ្មោះ NHK។
ចំនួនម៉ោងលើសរហូតដល់ ១៥៩ម៉ោងក្នុងមួយខែបែបនេះ បានន័យថា នាងធ្វើការលើសម៉ោងជិត ៦ម៉ោងក្នុងមួយថ្ងៃ ដោយរាប់ទាំងចុងសប្តាហ៍ផង។
បើតាមការិយាល័យការពារក្នុងទីក្រុងតូក្យូបានឲ្យដឹងថា មូលហេតុនៃការស្លាប់របស់អ្នកយកព័ត៌មានគឺបណ្តាលមកពីការធ្វើការងារលើសម៉ោង។
បើតាមកាសែត Asahi អ្នកកាសែតវ័យ ៣១ឆ្នាំរូបនោះ បានរាយការណ៍ទាក់ទងនឹងការបោះឆ្នោត ២ គឺមួយការបោះឆ្នោតតំបន់ និងមួយទៀតគឺការបោះឆ្នោតថ្នាក់ជាតិ។
នាងត្រូវបានគេឃើញដួលដេកនៅលើគ្រែ ដោយដៃមានកាន់ទូរស័ព្ទ។
មួយខែមុនពេលស្លាប់ គាត់បានផ្ញើអ៊ីម៉ែលទៅឪពុករបស់គាត់ដោយនិយាយប្រាប់ថា “ខ្ញុំរវល់ខ្លាំងណាស់ និងមានអារម្មណ៍តានតឹងខ្លាំង និងគិតចងឈប់ធ្វើការ ប៉ុន្តែខ្ញុំគិតថា ខ្ញុំត្រូវតែចាំសិន”។
បើតាមច្បាប់របស់ប្រទេសជប៉ុន បុគ្គលិកត្រូវឲ្យធ្វើការរយៈពេល ៤០ម៉ោង ក្នុងមួយសប្តាហ៍ ឬក៏៨ម៉ោងក្នុងមួយថ្ងៃ ហើយដែលម៉ោងសម្រាកគឺមានរយៈពេល ១ម៉ោង៕ សុភ័ក្ត្រ
