ប៉ូលីសឥណ្ឌាបានបាញ់សម្លាប់បុរស ៤នាក់ក្នុងករណីរំលោភ និងសម្លាប់ស្រ្តីវ័យក្មេងម្នាក់ធ្វើជាពេទ្យសត្វ ក្នុងទីក្រុង Hyderabad នៃរដ្ឋTelangana។
បុរសទាំង ៤នាក់នោះត្រូវបានចាប់ខ្លួនកាលពីសប្តាហ៍មុន ប៉ុន្តែពួកគេត្រូវប៉ូលីសនាំយកទៅកន្លែងកើតហេតុ នៅព្រឹកថ្ងៃសុក្រនេះ។
ជនសង្ស័យ ត្រូវបានប៉ូលីសបាញ់សម្លាប់ នៅពេលពួកគេព្យាយាមលួចកាំភ្លើងពីប៉ូលីស និងគេចខ្លួន។
សាកសពឆេះខ្លោចរបស់ជនរងគ្រោះវ័យ ២៧ឆ្នាំ ត្រូវបានគេប្រទះឃើញកាលពីសប្តាហ៍មុន ហើយករណីរំលោភសម្លាប់នោះបានធ្វើឲ្យមានការផ្ទុះកំហឹង និងការតវ៉ាយ៉ាងខ្លាំង។
មន្រ្តីប៉ូលីសចូលនិវត្តន៍ម្នាក់ឈ្មោះ Prakash Singh បានថ្លែងប្រាប់ BBC ដូច្នេះថា “ការបាញ់សម្លាប់នោះគឺជារឿងមិនដែលមិនអាចចៀសបាន”។
គាត់និយាយថា “ត្រូវតែមានការប្រុងប្រយ័ត្នខ្ពស់ នៅពេលជនសង្ស័យត្រូវបានគេនាំយកទៅកាន់តុលាការ ឬកន្លែងកើតហេតុឃាតកម្ម”។
“ពួកគេ (ជនសង្ស័យ)គួរតែត្រូវចង់ ដាក់ខ្នោះ និងពិនិត្យមើលឲ្យបានម៉ត់ចត់ មុនពេលបញ្ជូនពួកគេចេញក្រៅ។ អ្វីៗអាចកើតឡើងគ្រប់ពេល ប្រសិនជាប៉ូលីសមិនមានការប្រុងប្រយ័ត្ន”។
ប៉ូលីសខាងលើនិយាយថា យើងមិនអាចនិយាយបានមុនទេថា វាគឺជាការសម្លាប់ក្រៅប្រព័ន្ធច្បាប់។
ប៉ូលីសឥណ្ឌា ត្រូវបានគេធ្វើការរិះគន់យ៉ាងខ្លាំង ក្រោយពេលមានករណីឃាតកម្ម ជាពិសេសនៅពេលដែលគ្រួសារជនរងគ្រោះបានចោទប៉ូលីសថា បានធ្វើការខ្ជិលច្រអូសអស់រយៈពេល ២ម៉ោង។
ប្រជាជនឥណ្ឌារាប់ពាន់នាក់ បានធ្វើការតវ៉ានៅប៉ុស្តិ៍ប៉ូលីស ស្ថិតក្នុងទីក្រុងខាងលើ និងបានតវ៉ាឲ្យធ្វើការកាត់ទោសប្រហារជីវិតលើឃាតករទាំងនោះ។
ប៉ូលីសចំនួន ២នាក់ផងដែរបានរងរបួស នៅពេលដែលជនសង្ស័យបានព្យាយាមរត់គេច។
សូមបញ្ជាក់ថា ករណីរំលោភសម្លាប់ កើតមានជារឿយៗនៅក្នុងប្រទេសឥណ្ឌា ចាប់តាំងពីមានការរំលោភបូក និងសម្លាប់ស្រ្តីវ័យក្មេងម្នាក់នៅលើឡានក្រុង កាលពីឆ្នាំ ២០១០។
បើតាមតួលេខរបស់រដ្ឋាភិបាលបានឲ្យដឹងថា មានករណីរំលោភចំនួន ៣៣.៦៥៨ករណីកើតឡើងក្នុងប្រទេសកាលពីឆ្នាំ ២០១៧ ពោលមានករណីរំលោភកើតឡើងជាមធ្យមចំនួន ៩២៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
