អង្គការសហប្រជាជាតិបាននិយាយនៅថ្ងៃសុក្រថា ខ្លួនមានភស្ថុតាងជាវីដេអូដែលបង្ហាញថា កងកម្លាំងសន្តិសុខរបស់អ៊ីរ៉ង បានធ្វើការបាញ់ដើម្បីសម្លាប់ក្រុមបាតុករ ក្នុងអំឡុងពេលផ្ទុះការតវ៉ា។
នៅក្នុងសេចក្តីប្រកាស អគ្គស្នងការជាន់ខ្ពស់សិទ្ធិមនុស្សរបស់អង្គការសហប្រជាជាតិឈ្មោះ Michelle Bachelet បាននិយាយថា ”អ្នកស្រីមានការព្រួយបារម្ភចំពោះការមិនដឹងច្បាស់លាស់អំពោះចំនួនអ្នកស្លាប់ និងរបួស និងការព្យាបាទមនុស្សរាប់ពាន់នាក់ ដែលកំពុងត្រូវឃុំខ្លួន” អំឡុងពេលការតវ៉ាកាលពីពេលថ្មីៗនេះ ក្នុងប្រទេសអ៊ីរ៉ង។
អ្នកស្រីបន្តទៀតថា “ការស៊ើបអង្កេតបន្ទាន់ ឯករាជ្យ និងមិនលំអៀង ត្រូវតែធ្វើឡើងចំពោះអំពើហឹង្សានោះ រួមមានការសម្លាប់បាតុករ”។
សូមបញ្ជាក់ថា ប្រជាជនអ៊ីរ៉ងជាច្រើននាក់បានចូលរួមធ្វើការតវ៉ាកាលពីពាក់កណ្តាលខែវិច្ឆិកាកន្លងទៅ ក្រោយពេលរដ្ឋាភិបាលបានប្រកាសដំឡើងថ្លៃប្រេងចំនួន ៣០០ភាគរយ។
ចំនួននៃការស្លាប់របស់ក្រុមបាតុករ គេមិនទាន់បានដឹងច្បាស់នៅឡើយទេ ខណៈដែលរដ្ឋាភិបាលដកហូតតួលេខចេញ។
ការិយាល័យសិទ្ធិមនុស្សរបស់អង្គការសហប្រជាជាតិបាននិយាយថា ខ្លួនមានព័ត៌មានដែលបញ្ជាក់ថា មានមនុស្សយ៉ាងតិច ២០៨នាក់ត្រូវបានសម្លាប់ រួមមានស្រ្តីចំនួន ១៣នាក់ និងកុមារ ១២នាក់។ មនុស្សចំនួន ៧.០០០នាក់ត្រូវបានគេចាប់ខ្លួនទូទាំងប្រទេស។
ក្រោយមានការបាញ់ប្រហារលើក្រុមបាតុករ រដ្ឋាភិបាលបានបិទប្រព័ន្ធអ៊ីធឺណេតនៅក្នុងប្រទេសអស់រយៈពេលជាង ១សប្តាហ៍៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
