កណ្តាល៖ នៅថ្ងៃទី ២៩ ខែ ធ្នូ ឆ្នាំ ២០១៩ មានករណីឆក់ខ្សែភ្លើង ដែលឆក់ត្រីបណ្តាលឲ្យឆក់ខ្លួនឯងស្លាប់ ចំនុចព្រែកដងគោមភូមិ ដងគោម ឃុំ កំពង់អុស ស្រុក ពញាឮ ខេត្ត កណ្តាល ។
ជនរងគ្រោះ០១នាក់ឈ្មោះ ជួន សាវ៉ាង ភេទ ប្រុស អាយុ៣១ឆ្នាំ ជនជាតិ ខ្មែរ មុខរបរ កសិករ ទីលំនៅភូមិ ដងគោម ឃុំ កំពង់អុស ស្រុក ពញាឮ ខេត្ត កណ្តាល ។ វត្ថុតាង ឧបករណ៍សំរាប់ឆក់ត្រី ចំនួន ០១ និងអាគុយ ម៉ាក CP70 ចំនួន ០១។
តាមការបំភ្លឺរបស់ឈ្មោះ យឿន ចន្ធី ភេទស្រី អាយុ ២០ឆ្នាំ ត្រូវជាប្រពន្ធបានបំភ្លឺថា៖ នៅមុនពេលកើតហតុ ជនរងគ្រោះបានយកឧបករណា៍ឆក់ត្រីចេញពីផ្ទះ ទៅឆក់ត្រីនៅចំណុចកើតហេតុខាងលើ លុះពេលពុំឃើញត្រឡប់មកផ្ទះវិញ ក៏បានបបួលឈ្មោះ យ៉ាន់ សាវ៉ាត់ ភេទប្រុស អាយុ៤២ឆ្នាំ ត្រូវជាឪពុកមា ទៅរកមើលប្តី
របស់ខ្លួន ពេលទៅដល់ក៏ប្រទះឃើញ ជនរងគ្រោះ ដេកស្លាប់នៅក្នុងទឹក និង ឃើញឧបករណ៍សំរាប់ឆក់ត្រីនៅលើទូកក្បែជនរងគ្រោះ បន្ទាប់មកទៀត ក្រុមគ្រួសារបាននាំគ្នា លើកសាកសពជនរងគ្រោះយកមកផ្ទះ និង បានរាយការណ៍ជូនសមត្ថកិច្ចប៉ុស្តិ៍នគរបាលរដ្ឋបាលកំពង់អុស ។
ក្រោយមកកម្លាំងជំនាញពិនិត្យវិភាគកន្លែងកើតហេតុស្រុក បានសហការជាមួយកម្លាំងនគរបាលប៉ុស្តិ៍កំពង់អុស ដោយមានការចូលរួមពី ក្រុមប្រឹក្សាឃុំ មេភូមិ គ្រូពេទ្យ ធ្វើការពិនិត្យសាកសពដោយហ្មត់ចត់ឃើញថា៖ សាកសព មានស្នាមឆក់ខ្លោចនៅលើស្បែកត្រង់ឆ្អឹងជំនីមុខផ្នែងខាងស្តាំ ប្រវែង០,១៧ម៉ែត្រ និងមិនមានស្លាកស្នាមអ្វីគួរកត់សំគាល់ឡើយ។
នគរបាលមូលដ្ឋានបានសន្និដ្ឋានថា សាកសពស្លាប់ដោយសារឆក់ខ្សែភ្លើងអាគុយបណ្តាលឲ្យស្លាប់ ហើយបានប្រគល់សាកសពជូនក្រុមគ្រួសារធ្វើបុណ្យតាមប្រពៃណី៕ ដោយ៖កូឡាប
