ខេត្តព្រះសីហនុ៖ សមត្ថកិច្ចកងរាជអាវុធហត្ថខេត្តព្រះសីហនុ បានឲ្យដឹងតាមរបាយការណ៍ថា នៅថ្ងៃទី២៩ ខែធ្នូ ឆ្នាំ២០១៩ កម្លាំងកងរាជអាវុធហត្ថស្នាក់ការសន្តិសុខ៤០២ បានចូលរួមសហការជាមួយសមត្ថកិច្ចគយចល័តតំបន់៣ ដឹកនាំដោយលោក កែវ អង្កាម ប្រធានការិយាល័យស្រាវជ្រាវ និងបង្ក្រាបអំពើរត់ពន្ធតំបន់៣ ដោយបានឃាត់រថយន្ត១គ្រឿងម៉ាក់ fuso ពណ៌ស ពាក់ស្លាកលេខ ភ្នំពេញ 3E9030 សណ្តោងកុងទីន័រ មានដឹកបារីខុសច្បាប់។
សមត្ថកិច្ចកងរាជអាវុធហត្ថបញ្ជាក់ថា បារីទាំងអស់ ដែលដឹកក្នុងរថយន្តខាងលើនេះ មិនមានបិទតែមប្រេសនីយ៍ និងគ្មានឯកសារបង់ពន្ធគយនាំចូល ព្រមទាំងឯកសារពាក់ព័ន្ធផ្សេងទៀតនោះទេ ពោលគឺខុសច្បាប់តែម្តង។
សមត្ថកិច្ចបញ្ជាក់ថា ក្រោយចាប់ឃាត់រថយន្តខាងលើ ដើម្បីធ្វើការឆែកត្រួតពិនិត្យ សមត្ថកិច្ចរកឃើញក្នុងទូរកុងទឺន័រ 45Feet លេខ GESU 4308634 មានផ្ទុកបារីចំនួន៣ប្រភេទ រួមមាន៖
១- បារី ម៉ាក Z8
២- បារី ម៉ាក WL 03
៣- បារីម៉ាក76
សមត្ថកិច្ចបន្តទៀតថា សរុបបារីទាំងអស់មានចំនួន ១១៦០បុិច ដែលមិនមានឯកសារបង់ពន្ធត្រឹមត្រូវ។
បច្ចុប្បន្ននេះ វត្ថុតាងទាំងរថយន្ត និងបារី ត្រូវបានសមត្ថកិច្ចជំនាញ នាំយកទៅរក្សាទុកនៅស្នាក់ការគយ និង រដ្ឋាករស្រុកស្រែអំបិល ខេត្តកោះ ដើម្បីបន្តនីតិវិធីតាមច្បាប់នៅពេលក្រោយ៕ ដោយ៖ ដែន សីមា
