ភ្លើងឆេះព្រៃនៅអូស្រ្តាលីចាប់តាំងពីថ្ងៃចន្ទមក បណ្តាលឲ្យមនុស្សចំនួនយ៉ាងតិច ៧នាក់ស្លាប់ និងបំផ្លាញផ្ទះសម្បែងជាង ២០០ខ្នងនៅក្នុងរដ្ឋ New South Wales។ នេះបើតាមការបញ្ជាក់របស់ប៉ូលីស។
ស្ថានភាពកំពុងតែប្រសើរឡើងបន្តិចហើយ ចំណែកផ្លូវធំមួយដែលត្រូវបានអាជ្ញាធរបិទក្នុងរដ្ឋ Victoria ត្រូវបានបើកឲ្យធ្វើចរាចរណ៍វិញ នៅថ្ងៃពុធនេះ ដើម្បីឲ្យប្រជាជនចាកចេញ។
ទោះយ៉ាងណា នៅតែមានប្រជាជនជាច្រើនបានជាប់នៅតំបន់ ដែលត្រូវភ្លើងវាយប្រហារ ខណៈនៅទីក្រុងមួយ ប៉ូលីសបញ្ជូនទឹកសុទ្ធចំនួនជិត ២តោនតាមទូក។
ជនរងគ្រោះ ៧នាក់ដែលស្លាប់ក្នុងរដ្ឋ New South Wales រួមមាន ២នាក់ស្លាប់ក្នុងឡានផ្សេងៗគ្នា នៅថ្ងៃពុធព្រឹកនេះ ឪពុក និងកូនដែលបានស្នាក់នៅខាងក្រោយផ្ទះ ដើម្បីការពារផ្ទះ និងឧបករណ៍ធ្វើចំការរបស់ពួកគេ និងម្នាក់ទៀត ជាអ្នកពន្លត់អគ្គិភ័យ។
ប្រព័ន្ធផ្សព្វផ្សាយបានឲ្យដឹងថា មានចំនួនអ្នកស្លាប់ទៀតនៅក្នុងរដ្ឋ Victoria ដែលការស្លាប់នេះ បានធ្វើឲ្យចំនួនជនរងគ្រោះកើនដល់ ១៨នាក់ ដែលបានស្លាប់ក្នុងហេតុការណ៍ភ្លើងឆេះព្រៃទូទាំងប្រទេសអូស្រ្តាលីក្នុងរដូវនេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
