ភ្នំពេញ ៖ នៅថ្ងៃទី៣ ខែមករា ឆ្នាំ២០២០ នេះធនាគារ ស្ថាបនា បានប្រារព្ធកាត់ខ្សែបូដើម្បីសម្ពោធជាផ្លូវការនូវអគារថ្មី សាខាក្រុងបាវិត ។ នេះក៏ជាការបង្ហាញកេរ្តិ៍ឈ្មោះថ្មីនៃធនាគារ ស្ថាបនា ខណៈបណ្តាញសាខានៅតែបន្តពង្រីកឥតឈប់ឈរនាពេលអនាគត។
លោក លឹម អូន ប្រធាននាយកប្រតិបត្តិធនាគារ ស្ថាបនា បានប្រសាសន៍ថា៖ “កន្លងមកយើងខ្ញុំបានរកឃើញនូវសក្តានុពលទីផ្សារ ខេត្តស្វាយរៀង ដែលមានសកម្មភាពសេដ្ឋកិច្ចល្អ មានតម្រូវការសេវារហិរញ្ញវត្ថុខ្ពស់ ហើយក៏បានបើកការិយាល័យប្រតិបត្តិការនៅទីនេះរហូតដល់ ០6 សាខា ដែលក្នុងនោះគឺមានសាខាក្រុងបាវិត ដែលយើងកំពុងប្រកាសដាក់ឲ្យដំណើរការជាផ្លូវការនាពេលនេះ។ ជាមួយនឹងការរៀបចំអគារការិយាល័យថ្មី ដែលមានការចនា ការតុបតែង និងការបំពាក់ឧបករណ៍ទំនើបៗទៅតាម ស្តង់ដារសាខាធនាគារពេញលេញ ប្រកបដោយភាពងាយស្រួល ស្អាត ហើយមានសុវត្ថិភាពខ្ពស់ទាំងនេះ គឺជាការឆ្លុះបញ្ជាំងនូវការតាំងចិត្តខ្ពស់របស់ធនាគារ ស្ថាបនា ក្នុងការធ្វើទំនើបកម្មធនាគារ ស្ថាបនា ឈានទៅដល់ការឈរជើងកាន់តែរឹងមាំ នាំមកនូវសេវាកម្មកាន់តែប្រសើរ និងវឌ្ឍនភាព សម្រាប់អតិថិជនគ្រប់រូប។ យើងខ្ញុំសង្ឃឹមថាលោក/លោកស្រីនឹងផ្តល់ការគាំទ្របន្ថែមដល់ធនាគារ ស្ថាបនា សាខាក្រុងបាវិត ហើយគ្រប់បុគ្គលិកនៅទីនេះក៏បានប្តេជ្ញាចិត្តខ្ពស់ដើម្បីបម្រើលោកអ្នកឲ្យកាន់តែល្អប្រសើរ។”
ចំណែកលោក កៅ សាដន ប្រធាននាយកធនាគារ ស្ថាបនា សាខាក្រុងបាវិត បានប្រកាសថា “ដើម្បីអបអរសាទរដល់ពិធីសម្ពោធអគារថ្មីនៃសាខាក្រុងបាវិតនេះ អតិថិជននៅតំបន់នេះមានឱកាសទទួលបានកាដូដូចជា ឆ័ត្រ កែវទឹក ឬកាបូបកីឡា នៅពេលពួកគាត់បើកគណនីថ្មី។ ការផ្តល់ជូននេះចាប់ពីថ្ងៃប្រកាសនេះរហូតដល់អស់ពីស្តុក។
ធនាគារ ស្ថាបនា សាខាក្រុងបាវិតមានម៉ាស៊ីនអេធីអឹមដកប្រាក់ ម៉ាស៊ីនដាក់ប្រាក់ និងធ្វើការទូទាត់ប្រាក់ ដែលអាចប្រតិបត្តិការ២៤ម៉ោង ពេញមួយសប្តាហ៍។
នាពេលខាងមុខ ធនាគារ ស្ថាបនា នឹងនៅតែបន្តពង្រីកបណ្តាញសាខារបស់ខ្លួនបន្ថែមទៀត និង បង្កើតវត្តមានរបស់ខ្លួនដ៏រឹងមាំនៅតំបន់ដែលអតិថិជនត្រូវការបំផុត។
ធនាគារ ស្ថាបនា គឺជាធនាគាររពាណិជ្ជឈានមុខគេមួយ នៅក្នុងប្រទេសកម្ពុជា ដែលមានទ្រព្យសកម្មសរុបលើស ១,៦ ពាន់លានដុល្លារអាមេរិក និងមានបុគ្គលិកបម្រើការងារច្រើនជាង ៤.០០០នាក់។ យើងមានបណ្តាញសាខាធំជាងគេទីពីរនៅក្នុងប្រទេសកម្ពុជាដែលមានសាខាច្រើនជាង ១៧០សាខា និង ម៉ាស៊ីន អេធីអឹម ច្រើនជាង២០០គ្រឿង ដែលមានសមត្ថភាពពេញលេញដូចជាដាក់ប្រាក់ ដកប្រាក់ និងធ្វើការទូទាត់ប្រាក់។ យើងផ្ដល់សេវាកម្មធនាគារពេញលេញដូចជាសេវាប្រាក់កម្ចី សេវាប្រាក់បញ្ញើ សេវា iBanking សេវាធនាគារតាមទូរស័ព្ទដៃ សេវាប័ណ្ណឥណពន្ធ និងប័ណ្ណឥណទានប្រភេទវីសា សេវាផ្ទេរប្រាក់ក្នុងស្រុកនិងក្រៅប្រទេស សេវាផ្ទេរប្រាក់ជុំវិញពិភពលោក Western Union ហិរញ្ញវត្ថុពាណិជ្ជកម្ម និងសេវាកម្មផ្សេងៗទៀតជាច្រើន។ ជាមួយគ្នានោះផងដែរ យើងបានសហការជាមួយក្រុមហ៊ុនទូទាត់តាមទូរស័ព្ទដៃជាច្រើនដូចជា វីង ផាយផេ ទ្រូម៉ាន់នី និង លី ហួរ វេរលុយ ដើម្បីដើម្បីផ្តល់ភាពងាយស្រួលដល់អតិថិជន៕ ដោយ៖កូឡាប
