ភ្នំពេញ៖ ក្រសួងពាណិជ្ជកម្ម បានប្រាប់ ក្រុមហ៊ុនលក់រាយប្រេងឥន្ធនៈទាំងអស់ នៅក្នុងប្រទេសកម្ពុជាថា យោងទៅលើស្ថានភាពទីផ្សារអន្តរជាតិបច្ចុប្បន្ន តម្លៃប្រេងឥន្ធនៈអាចមានការប្រែប្រួលមិនអាចព្យាករណ៍បាន ។
បើតាមសេចក្តីជូនដំណឹង នៅថ្ងៃទី៩មករា២០២០នេះ ក្រសួងពាណិជ្ជកម្មមានកិត្តិយសសូមជម្រាបជូនដល់ក្រុមហ៊ុនលក់រាយប្រេងឥន្ធនៈទាំងអស់នៅក្នុង
ប្រទេសកម្ពុជាមេត្តាជ្រាបថា យោងទៅលើស្ថានភាពទីផ្សារអន្តរជាតិបច្ចុប្បន្ន តម្លៃប្រេងឥន្ធនៈអាចមានការប្រែប្រួលមិនអាចព្យាករណ៍បាន ។ ប៉ុន្តែទោះបីជាមានការកើនឡើងតម្លៃប្រេងឥន្ធនៈក្តី ក្រសួងពាណិជ្ជកម្មកម្ពុជា នឹង
គណនាតម្លៃប្រេងទៅតាមប្រកាសរបស់អន្តរក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រសួងរ៉ែ និង
ថាមពល នូវតម្លៃលក់រាយប្រេងឥន្ធនៈនៅកម្ពុជា ទៅតាមតម្លៃទីផ្សារអន្តរជាតិសម្រាប់រយៈពេល ១៥ ថ្ងៃម្តង ដូចអ្វី
ដែលយើងបានឯកភាពគ្នាអនុវត្តកន្លងមក ដើម្បីរួមចំណែកផ្តល់នូវស្ថិរភាពសេដ្ឋកិច្ច-សង្គមរបស់កម្ពុជាយើង។
អាស្រ័យដូចបានជំរាបជូនខាងលើ សូមក្រុមហ៊ុនប្រេងឥន្ធនៈទាំងអស់ ដែលលក់រាយប្រេងឥន្ធនៈនៅក្នុង
ព្រះរាជាណាចក្រកម្ពុជា មេត្តាចូលរួមសហការអនុវត្តឲ្យបានល្អដូចអ្វីដែលបានធ្វើកន្លងមក ឲ្យមានប្រសិទ្ធភាពខ្ពស់ ។
ផ្អែកតាមតម្លៃមធ្យមប្រេងឥន្ធនៈលើទីផ្សារអន្តរជាតិ ថ្លៃលក់រាយប្រេងឥន្ធនៈពីថ្ងៃទី០១ ដល់ ១៥ ខែមករា ឆ្នាំ២០២០
នឹងត្រូវលក់ ៣.៩១០រៀល/១លីត្រ សម្រាប់សាំងធម្មតា EA92 និង ៣.៨១៣រៀល/លីត្រ សម្រាប់ប្រេងម៉ាស៊ូត។
ដើម្បីជួយសម្រួលដល់ជីវភាពរបស់ប្រជាជន និងដោយមានការរួមចំណែកពីក្រុមហ៊ុនចែកចាយប្រេងឥន្ធនៈនៅ
កម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចបញ្ចុះតម្លៃលក់រាយប្រេងឥន្ធនៈនៅកម្ពុជា ចំនួន៤សែនដុល្លារ/លីត្រ ។
ដូច្នេះថ្លៃលក់រាយប្រេងឥន្ធនៈសម្រាប់អនុវត្ត ចាប់ពីថ្ងៃទី០១ ដល់ ១៥ ខែមករា ឆ្នាំ២០២០ នឹងចុះមក ៣.៧៥០
រៀល/លីត្រ សម្រាប់សាំងធម្មតា EA92 និង ៣.៦៥០ រៀល/លីត្រ សម្រាប់ប្រេងម៉ាស៊ូត ៕ ដោយ៖កូឡាប
