បន្ទាយមានជ័យ៖ ឃុំទឹកជោរស្រុកព្រះនេត្រព្រះខេត្តបន្ទាយមានជ័យបាន រីករាយនឹងទទួលទិន្នផលនិងតម្លៃស្រូវល្អនាឆ្នាំ២០១៧-១៨ ហើយមានអំណរនឹងខួបជ័យជម្នះ៧មករាដែរ ។ ពីធីនោះខួបអនុស្សាវរីយ៍លើកទី៣៩ ធ្វើឡើងយ៉ាងមហោឡារិកនាព្រឹកថ្ងៃទី ១២ខែ មករា ឆ្នាំ ២០១៨ ដោយមានលោកលី សារី អភិបាលរងខេត្តប្រធានការងារថ្នាក់ខេត្តចុះជួយស្រុកព្រះនេត្រព្រះ លោកឃូ ពៅ ប្រធានគណបក្សប្រជាជនកម្ពុជាស្រុកព្រះនេត្រព្រះ និងក៏មានចូលរួមពីសំណាក់មន្ត្រីគណបក្សរ កងកម្លាំងប្រដាប់អាវុធ លោកគ្រូ អ្នកគ្រូ និង សិស្សានុសិស្ស ប្រជាពលរដ្ឋជាង ៥០០នាក់ចូលរួម។
លោកលុច ផ ប្រធានគណបក្សប្រជាជនកម្ពុជាឃុំទឹកជោរនិយាយថា៖ រដូវវស្សាឆ្នាំ២០១៧-១៨នេះ ពលរដ្ឋនៅឃុំនេះមានក្តីរីករាយណាស់ដោយសារតែមានអំណោយផលពីអាកាសធាតុនិងពីការអភិវឌ្ឍន៍ផ្នែកហេដ្ឋារចនាសម្ព័ន្ធផ្លូវ ភ្លឺប្រឡាយធរាសាស្ត្រនិងបច្ចេកទេសកសិកម្ម ក៏ដូចជាការស្វែងរកទីផ្សារនិងធានាតម្លៃកសិផលល្អជាងឆ្នាំមុនៗ។ ពោលគឺទិន្នផល គុណភាព និងតម្លៃស្រូវក៏ល្អ កើនខ្ពស់ ។
លោកបន្តថា ជាងនេះទៅទៀត នាពេលនេះមន្ត្រី សមាជិកគណបក្សនិងពលរដ្ឋក្នុងឃុំនេះក៏មានមោទនភាពនិងអំណរសាទរដែលបានប្រារព្ធមីទ្ទិញអបអរខួបអនុស្សាវរីយ៍លើកទី៣៩ ទិវាជ័យជម្នះ៧មករា ។
លោកលី សារី អភិបាលរងខេត្តបន្ទាយមានជ័យ- ប្រធានការងារថ្នាក់ខេត្តចុះជួយស្រុកព្រះនេត្រព្រះមានប្រសាសន៍ថា៖ ទិវាជ័យជំនះ៧មករា លើកទី៣៩នេះ គឺជាទិវារបស់ជាតិទាំងមូល មិនមែនជារបស់គណបក្សប្រជាជនកម្ពុជា ម្នាក់ឯងនោះទេទោះជាពេលនោះគណបក្សប្រជាជនកម្ពុជាជាអ្នករំដោះប្រទេសជាតិនិងប្រជាជនកម្ពុជាឲ្យបានរួចផុតពីការកាប់សម្លាប់របស់ពួក ប៉ុល ពត អៀង. សារី ខៀវសំផន យ៉ាងណាក៏ដោយ ។
លោកលី សារី បានរំលឹកថា ក្នុងរបបប្រល័យពូជសាសន៍នេះបានបិទសិទ្ធិ គ្រប់បែបយ៉ាងចំពោះប្រជាជនកម្ពុជា ផ្ទុយពីសម័យបច្ចុប្បន្ន ដែលប្រជាជនមានសិទ្ធិគ្រប់ បែបយ៉ាង ទាំងសិទ្ធិរស់រានមានជីវិត សិទ្ធិទទួលបានការសិក្សារៀនសូត្រ សិទ្ធិបញ្ចេញមតិ ព្រមទាំងមានគ្រប់សាសនា ពិសេសយើងបានចាត់ទុកព្រះពុទ្ធសាសនាជាសាសនា របស់រដ្ឋថែមទៀតផង ។
ដោយឡែកសម្រាប់ខេត្តបន្ទាយមានជ័យ ឆ្នាំនេះវិស័យកសិកម្ម ឧស្សាហកម្មនិងទេសចរណ៍ មានភាពល្អប្រសើរដោយធានាបាននូវកំណើនសេដ្ឋកិច្ចល្អប្រសើរ ជូនប្រជាពលរដ្ឋទទួលបានដោយ ភាពរីករាយ៕ ដោយ ៖ បន្ទាយ
