ភ្នំពេញ៖ អធិការដ្ឋាននគរបាលខណ្ឌច្បារអំពៅ បានឲ្យដឹងថា ជនល្មើសដែលប្រើដាវប្លន់នៅសង្កាត់ច្បារអំពៅទី២ ត្រូវបានចាប់ខ្លួន ។ ជនសង្ស័យរូបនោះ ធ្លាប់ជាប់ពន្ធនាគារព្រៃស ១ឆ្នាំ ក្នុងឆ្នាំ២០១២ ពីបទលួច ហើយនៅតែមិនរាងចាលមកប្រព្រឹត្តបទល្មើសលួចដដែលទៀត។
ករណីលួចមានស្ថានទម្ងន់ទោស (ប្រើដាវគំរាមប្លន់យកម៉ូតូ) នៅមុខផ្ទះគ្មានលេខ ភូមិដើមចាន់ សង្កាត់ច្បារអំពៅទី ២ ខណ្ឌច្បារអំពៅ នៅថ្ងៃទី ១៣ ខែមករា ឆ្នាំ២០២០ ម៉ោង០០និង១០នាទី កណ្តាលអធ្រាត្រ។
ជនរងគ្រោះឈ្មោះ លន់ ផល្លី ភេទប្រុស អាយុ ៣៧ឆ្នាំ ជនជាតិខ្មែរ មុខរបរសន្តិសុខឯកជន ស្នាក់នៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។
ជនសង្ស័យឃាត់ខ្លួនឈ្មោះ តឹក ចំរើន ភេទប្រុស អាយុ២៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅមិនពិតប្រាកដ។
នៅថ្ងៃទី ១៣ ខែមករា ឆ្នាំ២០២០ វេលាម៉ោង០០និង១០នាទី ជនរងគ្រោះអង្គុយលើម៉ូតូម៉ាកហុងដាសេ ១២៥ ពណ៌ខ្មៅ ផ្លាកលេខមិនចាំ រងចាំឌុបម៉ូយនៅមុខ ហាងថៃសាន្ត ខណ្ឌចំការមន ពេលនោះក៏មានជនសង្ស័យ ២នាក់ ឈ្មោះ តឹក ចំរើន និងឈ្មោះ ញ៉ា បានហៅជនរងគ្រោះ ឲ្យឌុបមកសង្កាត់ច្បារអំពៅទៅ២ ខណ្ឌច្បារ អំពៅ ពេលនោះជនរងគ្រោះក៏ឌុបជនសង្ស័យទាំង០២នាក់ មកដល់ចំណុចកើតហេតុ ជនសង្ស័យក៏ឲ្យជនរងគ្រោះឈប់ម៉ូតូ រួច យកដាវគំរាមប្លន់យកម៉ូតូម៉ាកខាងលើ ជិះគេចខ្លួនយកម៉ូតូទៅឲ្យបក្ខពួក១នាក់ទៀតឈ្មោះ ឌែម យកទៅបញ្ចាំគេបាត់ ចំណែក ដាវជនសង្ស័យបោះចោលបាត់។ រហូតដល់ ម៉ោង០០និង៣០នាទី ថ្ងៃដដែល សមត្ថកិច្ចយើងឃាត់ខ្លួន បានជនសង្ស័យម្នាក់ឈ្មោះ តឹក ចំរើន នៅភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ បញ្ជូនមកអធិការដ្ឋាន នគរបាលខណ្ឌ ច្បារអំពៅ ចាត់ការតាមច្បាប់៕ដោយ៖កូឡាប