ខេត្តស្វាយរៀងៈបុរសម្នាក់រួមនិងវត្ថុតាងត្រូវបានកម្លាំងមូលដ្ឋានកងរាជអាវុធហត្ថក្រុងបាវិត និងកម្លាំងមន្ទីរយុត្តិធម៌អាវុធហត្ថខេត្ត ធ្វើការបង្ក្រាបនៅក្នុងករណី រក្សាទុកឬជួញដូរដោយខុសច្បាប់នូវសារធាតុញៀន ដែលហេតុការណ៍ខាងលើនេះ បានកើតឡើងនៅ វេលាម៉ោង ១៤រសៀលថ្ងៃទី១០ ខែមករាឆ្នាំ២០២០ នៅចំណុចបន្ទប់ជួលស្ថិតនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង។
សមត្ថកិច្ចបានឱ្យដឹងថាៈកម្លាំងមូលដ្ឋានកងរាជអាវុធហត្ថក្រុងបាវិត ចំនួន០៦នាក់រថយន្តចំនួន០២គ្រឿង ដឹកនាំដោយលោក វរសេនីយ៍ទោ ខាំ ណាន មេបញ្ជាការមូលដ្ឋានកងរាជអាវុធហត្ថក្រុងបាវិត និងកម្លាំងមន្ទីរយុត្តិធម៌អហខេត្ត ចំនួន០១នាក់ រថយន្តចំនួន០១គ្រឿង ដឹកនាំដោយលោកវរសេនីយ៍ ត្រី ឆូយ ឈឿន នាយការិយាល័យគ្រឿងញៀន មន្ទីរយុត្តិធម៌អាវុធហត្ថខេត្ត បានចុះបង្ក្រាបករណីរក្សាទុកឬជួញដូរដោយខុសច្បាប់នូវសារធាតុញៀន នៅចំណុចបន្ទប់ជួលស្ថិតនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង ឃាត់ខ្លួនជនសង្ស័យបានចំនួន ០១នាក់ ឈ្មោះ ម៉ៅ សំណាង ភេទប្រុស អាយុ២៦ ឆ្នាំ ជនជាតិខ្មែរ មុខរបរកម្មកររោងចក្រ មាទីលំនៅកំណើត ភូមិប្រសប់លាក់ ឃុំបាទី ស្រុកចន្ទ្រា ខេត្តស្វាយរៀង បច្ចុប្បន្ន ភូមិប្រសប់លាក់ សង្កាត់បាទី ក្រុងបាវិត ខេត្តស្វាយរៀង ។ ប្រភពដដែលបានបន្តថាៈ វត្ថុតាងរួមមាន ៖ ម្សៅក្រាមពណ៌សថ្លាចំនួន០១ កញ្ចប់ ទូរស័ព្ទដៃចំនួន ០១ គ្រឿង ម៉ូតូចំនួន០១ គ្រឿង
បច្ចុប្បន្ន ជនសង្ស័យ និងវត្ថុតាង កសាងសំណុំរឿងបញ្ជូនទៅមន្ទីរយុត្តិធម៌អាវុធហត្ថខេត្តដើម្បីចាត់ការតាមនីតិវិធី៕ដោយ៖ វ៉ៃកូ