ខេត្តព្រះសីហនុ៖ សាធារណជន ភ្ញៀវទេសចរជាតិ ពិសេសប្រជាពលរដ្ឋរស់ខេត្តព្រះសីហនុ បានបន្តរិះគន់សកម្មភាពការងារ របស់ថ្នាក់ដឹកនាំមន្ទីរជំនាញពាក់ព័ន្ធ នៃរដ្ឋបាលខេត្តព្រះសីហនុ ដែលកន្លងមកហាក់មិនសូវរវល់អើពើ ចំពោះការសរសេរអក្សរបរទេស ពិសេសអក្សរចិន នៅលើផ្ទាំងប៉ាណូ និងស្លាកសញ្ញាផ្សេងៗ នៅលើទីតាំងសំណង់អាគារធំៗ និងទីកន្លែងផ្សេងៗ ដែលមានម្ចាស់ ឬថៅកែជាជនបរទេស រួមមានជនជាតិចិនជាដើម។
ទន្ទឹមគ្នានេះ ពួកគេក៏ថ្លែងគាំទ្រចំពោះចំណាត់ការ របស់មន្ត្រីក្រសួងដែនដីនគរូបនីយកម្ម និងសំណង់ និងតំណាងក្រសួងស្ថាប័នមួយចំនួន នៃរាជរដ្ឋាភិបាលកម្ពុជា ដែលបានចុះពិនិត្យផ្ទាល់ និងចេញសេចក្តីណែនាំ ស្តីពីការប្រើប្រាស់អក្សរខ្មែរ និងអក្សរបរទេស នៅលើផ្ទាំងប៉ាណូ ឬផ្ទាំងគំនូរ ព្រមទាំងស្លាកយីហោផ្សេងៗ នៅតាមតំបន់ឆ្នេរនាខេត្តព្រះសីហនុ កាលពីថ្ងៃទី១០ ខែមករា ឆ្នាំ២០១៨។
ទាក់ទិនបញ្ហានេះ ទាំងសាធារណជន និងមន្ត្រីអង្គការក្រៅរដ្ឋាភិបាលមួយចំនួននាខេត្តព្រះសីហនុរួមមាន៖ សមាគមអាដហុក (Adhoc) និងអង្គការលីកាដូ (Licadho)ជាដើម ជាបន្តបន្ទាប់មកនេះ បានរិះគន់ថា ការគ្រប់គ្រង របស់ថ្នាក់ដឹកនាំក្រសួង និងមន្ទីរពាក់ព័ន្ធមួយចំនួន នៃរដ្ឋបាលខេត្តព្រះសីហនុ មានភាពកម្សោយ។ កម្សោយនៅត្រង់ថា មន្ត្រីស្ថាប័នជំនាញមួយចំនួននោះ ហាក់មិនសូវបានយកចិត្តទុកដាក់ ពិនិត្យទៅលើការសរសេរអក្សរ នៅលើស្លាកសញ្ញាសំគាល់ របស់ក្រុមហ៊ុន ឬទីតាំងមួយចំនួន ដែលមានថៅកែជាជនបរទេស ឬថៅកែជនជាតិចិន ដែលកន្លងមកបានលើកស្លាកសញ្ញាផ្សេងៗ មានសរសេរតែអក្សរបរទេស ឬសរសេរជាអក្សរចិន ដោយមិនមានសរសេរជាអក្សរខ្មែរជាដើម។
លោកស្រី ជៀប សុធារី អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ ផ្តល់សម្ភាសដល់អ្នកយកព័ត៌មាន cen.com.kh ប្រចាំខេត្តព្រះសីហនុ នៅថ្ងៃសៅរ៍ ទី១០ ខែមករា ឆ្នាំ២០១៨។ លោកស្រី ក៏បានកត់សម្គាល់ថា ការគ្រប់គ្រងស្លាកសញ្ញាផ្សេងៗ របស់អាជ្ញាធរស្ថាប័នពាក់ព័ន្ធនាមូលដ្ឋាននេះ គឺមិនទាន់បានត្រឹមត្រូវនោះទេ ព្រោះឃើញមានស្លាកផ្ទាំងប៉ាណូ និងស្លាកសញ្ញាសំគាល់ទីតាំង សំណង់ សណ្ឋាគារ កាស៊ីណូ ខុនដូ ភោជនីយដ្ឋាន ក្លឹបកម្សាន្ត និងផ្សារតូចៗ ឬផ្សាយម៉ាតភាគច្រើន ដែលមានម្ចាស់ ឬថៅកែជាជនបរទេស ពិសេសជនជាតិចិន គឺបានលើកស្លាកសញ្ញា នៅតាមទីតាំងនីមួយៗ ជាអក្សរបរទេស ឬជាអក្សរចិនធំៗ និងមានស្លាកសញ្ញាខ្លះមានសរសេរអក្សរខ្មែរខ្លះដែរតែមានទំហំតូចជាងអក្សរបរទេស និងមានស្លាកសញ្ញាខ្លះទៀត មិនមានសរសេរអក្សខ្មែរតែម្តង។
ផ្តើមពីបញ្ហានេះ អ្នកឃ្លាំមើលការងារអភិវឌ្ឍសង្គមមួយចំនួន ប្រចាំខេត្តព្រះសីហនុ បានស្នើដល់រដ្ឋបាលខេត្តព្រះសីហនុ ពិសេសក្រសួងរៀបចំដែនដី នគរូបនីយកម្ម និងសំណង់ ព្រមទាំងក្រសួងវប្បធម៌ និងវិចិត្រសិល្បៈជាដើម ឲ្យបន្តសកម្មភាពចុះត្រួតពិនិត្យការប្រើប្រាស់អក្សរខ្មែរ និងអក្សរបរទេស ពិសេសអក្សរចិន នៅលើផ្ទាំងប៉ាណូ និងស្លាកសញ្ញាសំគាល់ផ្សេងៗ នៅលើសំណង់អាគារ ឬទីកន្លែងនានា ដែលមានថៅកែជាជនបរទេស មានដូចជា៖ ស្លាកសំគាល់ឈ្មោះ កាស៊ីណូ សណ្ឋាគារ ក្លឹបកម្សាន្ត ភោជនីយដ្ឋាន ក្រុមហ៊ុន និងទីតាំងមួយចំនួនទៀត ដែលមានម្ចាស់ជាជនបរទេស ឬជនជាតិចិន នាខេត្តព្រះសីហនុឲ្យបានត្រឹមត្រូវឡើងវិញ។
ទំនងជាមានការរិះគន់ច្រើន ពីសាធារណជន ភ្ញៀវទេសចរជាតិ ពិសេសអ្នកប្រើប្រាស់បណ្តាញសង្គមហ្វ្រែសប៊ុក (Facebook) ដែលបានថតបង្ហោះស្លាកសញ្ញាសរសេរអក្សរបរទេស ពិសេសសរសេរតែអក្សរចិន ដោយគ្មានអក្សរខ្មែរ នៅលើទីតាំងមួយចំនួន ជាបន្តបន្ទាប់មកនេះ។ ទើបកាលពីថ្ងៃទី១០ ខែមករា ឆ្នាំ២០១៨ គេឃើញមានវត្តមានមន្ត្រីជំនាញស្ថាប័នពាក់ព័ន្ធមួយចំនួន ដឹកនាំដោយ លោក ប៉ែន សុផល រដ្ឋលេខាធិការក្រសួងរៀបចំដែនដី និងក្រុមការងារក្រសួងស្ថាប័នពាក់ព័ន្ធ ក្រោមឱវាទរដ្ឋបាលខេត្តព្រះសីហនុ បានរួមគ្នាចុះពិនិត្យការដ្ឋានសំណង់មួយចំនួន ដែលកំពុងសាងសង់នាទីប្រជុំជន ក្នុងក្រុងព្រះសីហនុ។
នាឱកាសនោះដែរ លោក ប៉ែន សុផល ដែលបានចុះទៅដល់ទីតាំងកើតមានបញ្ហា បានណែនាំ ដល់តំណាងភាគីអ្នកវិនិយោគចិន ស្តីអំពីការប្រើប្រាស់អក្សរខ្មែរ និងអក្សរបរទេស នៅលើផ្ទាំងប៉ាណូ ឬផ្ទាំងគំនូរសំណង់ ផ្សេងៗ នាខេត្តព្រះសីហនុ ឲ្យបានត្រឹមត្រូវស្របតាមការណែនាំរបស់ក្រសួង ដែលតម្រូវឲ្យសរសេរអក្សរខ្មែរ ឲ្យបានធំជាងអក្សរបរទេស ឬអក្សរចិន និងត្រូវឲ្យអក្សរខ្មែរនៅពីលើអក្សរបរទេស នៅគ្រប់ទីតាំងនីមួយៗ ដែលមានសរសេរអក្សរបរទេស សម្រាប់សម្គាល់ទីតាំងផ្សេងៗ។
កាលពីថ្ងៃទី១០ ខែមករា ឆ្នាំ២០១៨ លោក ប៉ែន សុផល រដ្ឋលេខាធិការក្រសួងរៀបចំដែនដី និងជាអគ្គលេខាធិការ នៃគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ហៅកាត់ (គ.អ.ឆ.ក)ផងនោះ។ លោកបានដឹកនាំមន្ត្រីជំនាញមន្ទីរបរិស្ថាន មន្ទីរវប្បធម៌ និងវិចិត្រសិល្បៈ មន្ទីរសាធារណៈការ មន្ត្រីតំណាងឲ្យមន្ទីរពាក់ព័ន្ធ នៃរដ្ឋបាលខេត្តក្រុងព្រះសីហនុ បានចុះពិនិត្យការដ្ឋានសំណង់ចំនួន ៤កន្លែងធំៗ នាទីប្រជុំជន ក្រុងព្រះសីហនុ ដើម្បីចូលរួមធ្វើយុទ្ធនាការផ្សព្វផ្សាយខ្លឹមសារមួយចំនួន ៣សំខាន់ រួមមាន៖
១. លិខិតលេខ ៣៣២២ ដនស/គអឆក ចុះថ្ងៃទី២៦ ខែធ្នូ ឆ្នាំ ២០១៧ ស្តីពីការប្រើប្រាស់អក្សរខ្មែរ និងអក្សរបរទេសនៅលើ ផ្ទាំងគំនូរសំណង់ ឬផ្លាកសញ្ញាផ្សព្វផ្សាយនៅតាមតំបន់ឆ្នេរ ។
២. លិខិតលេខ ៣៣៩៦ ដនស/គអឆក ចុះថ្ងៃទី២៩ ខែធ្នូ ឆ្នាំ ២០១៧ ស្តីពីសេចក្តីណែនាំបន្ថែមស្តីពីការរៀបចំអាងប្រព្រឹត្តកម្មទឹកកខ្វក់ អាងបង្គន់អនាម័យ និងប្រព័ន្ធបណ្តាញលូ។
៣. អនុក្រឹត្យលេខ ២៣៥ អនក្រ.បក ចុះថ្ងៃទី២៥ ខែធ្នូ ឆ្នាំ ២០១៧ ស្តីពីការគ្រប់គ្រងប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់។
កាលណោះ តំណាងក្រសួងស្ថាប័នជំនាញទាំងនោះ ក៏បានណែនាំដល់តំណាងក្រុមហ៊ុនទាំងចិនមួយចំនួន ឲ្យអនុវត្តតាមខ្លឹមសារលិខិតអនុញ្ញាតសាងសង់ សុវត្ថិភាពក្នុងការដ្ឋាន និងបទដ្ឋានគតិយុត្តផ្សេងៗ ដែលនៅជាធរមាន ឲ្យបានត្រឹមត្រូវ។
សកម្មភាពចុះណែនាំ និងផ្សព្វផ្សាយ ស្តីពីការប្រើប្រាស់អក្សរខ្មែរ និងអក្សរបរទេស របស់មន្ត្រីស្ថាប័នជំនាញពាក់ព័ន្ធថ្នាក់ជាតិ និងខេត្តព្រះសីហនុ កាលពីថ្ងៃទី១០ ខែមករា ឆ្នាំ២០១៨ គឺបានកើតឡើង ក្រោយមានមតិរិះគន់ពីសំណាក់សាធារណជន ភ្ញៀវទេសចរជាតិ ជាពិសេសក្រុមអ្នកប្រើប្រាស់បណ្តាញសង្គមហ្វ្រែសប៊ុកក្នុងប៉ុន្មានខែចុងក្រោយនេះ។ ពួកគេបានថតបង្ហោះរូបថតសំណង់អាគារ និងទីតាំងផ្សេងៗ ដែលមានម្ចាស់ជនជាតិចិន និងផ្ញើសារិះគន់ ថ្នាក់ដឹកនាំរដ្ឋបាលខេត្តព្រះសីហនុ ដែលមិនបានរវល់អើពើ ទៅលើការសរសេរអក្សរបរទេស ពិសេសអក្សរចិន នៅលើការដ្ឋានសំណង់ សណ្ឋាគារ កាស៊ីណូ ខុនដូរ ភោជនីយដ្ឋាន ក្រុមហ៊ុន និងទីតាំងមួយចំនួនទៀត ដែលមានថៅកែជាជនបរទេស ជាពិសេសថៅកែជនជាតិចិន។ ទីតាំងទាំងនោះ គឺបានសសេរជាអក្សរចិន នៅតាមទីតាំងភាគច្រើន ដោយគ្មានសរសេរអក្សរខ្មែរ ឬមានសរសេរដែរ តែមានទំហំតូចជាងអក្សរបរទេស ដែលខុសពីសេចក្តីណែនាំ ឬខុសច្បាប់ នៃព្រះរាជាណាចក្រកម្ពុជា៕ ដែន សីមា
