ភ្នំពេញ ៖ កម្លាំងការិយាល័យព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានបើកប្រតិបត្តិការបង្ក្រាប ករណីចាប់ជំរិត និងគំរាមទារប្រាក់ ឃាត់ខ្លួនជនជាតិវៀតណាម ៣នាក់ និងរំដោះបានជនរងជាជនជាតិវៀតណាមម្នាក់ ។
បន្ទាប់ពីបញ្ចប់ការសួរនាំ នៅថ្ងៃទី២៥ ខែមករា ឆ្នាំ២០២០នេះ កម្លាំងនាយកដ្ឋាននគរបាលព្រហ្មទណ្ឌ បានបញ្ជូនជនសង្ស័យទាំង៣នាក់ ទៅកាន់សាលាដំបូងរាជធានីភ្នំពេញ ដើម្បីផ្ដន្ទាទោសតាមផ្លូវច្បាប់នៅរសៀលថ្ងៃទី២៥ខែមករាឆ្នាំ២០២០នេះ។
លោកវរសេនីយ៍ឯក ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ បានប្រាប់ឲ្យដឹងនៅថ្ងៃទី២៥ ខែមករា ឆ្នាំ២០២០នេះថា ប្រតិបត្តិការនេះ ធ្វើឡើងក្រោមការបញ្ជាពីនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ លោកឧត្តមសេនីយ៍ឯក អ៊ិន បូរ៉ា អគ្គស្នងការរង និងមានការចង្អុលបង្ហាញពី លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ។
ជនសង្ស័យ ដែលត្រូវចាប់ខ្លួន ១-ឈ្មោះ Le Minh Luan ភេទប្រុស អាយុ៣៩ឆ្នាំ ២-ឈ្មោះ Nguyen Minh Thien ភេទប្រុស អាយុ៣៩ឆ្នាំ និង៣-ឈ្មោះ Trung Thenh Toan ភេទប្រុស អាយុ២៣ឆ្នាំ ពួកគេមានអាស័យដ្ឋាន នៅប្រទេសវៀតណាម ។ ចំណែកជនរងគ្រោះមានឈ្មោះ Phom Quang Dung ភេទប្រុស អាយុ៥៧ឆ្នាំ ក៏មានអាសយដ្ឋាននៅប្រទេសវៀតណាម ។
លោកវរសេនីយ៍ឯក ជាវ វិបុល បានបញ្ជាក់ថា នៅថ្ងៃទី២៣ ខែមករា ឆ្នាំ២០២០ ក្រុមគ្រួសាររបស់ជនរងគ្រោះ បានរាយការណ៍ថា មានករណីចាប់បង្ខាំងមនុស្សគំរាមទារប្រាក់ ចំនួន៣០០លានដុង ជាថ្នូរនឹងការដោះលែងជនរងគ្រោះឈ្មោះ Phom Quang Dung អាយុ៥៧ឆ្នាំ។
ទាក់ទិនករណីខាងលើនេះ លោកវរសេនីយ៍ឯក ជាវ វិបុល បង្ហាញឲ្យដឹងថា ក្រោយពីទទួលបានពាក្យបណ្តឹងនោះ និងបទបញ្ជាពីថ្នាក់ដឹកនាំមកកម្លាំងជំនាញព្រហ្មទណ្ឌ ឲ្យចុះសហការជាមួយស្នងការដ្ឋាននគរបាលរាជធានីភ្នំពេញ ដើម្បីការស៊ើបអង្កេតលើករណីខាងលើនេះ ។
ក្រោមការសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញ នឹង នគរបាលមូលដ្ឋានខណ្ឌ ៧មករា នៅវេលាថ្ងៃត្រង់ថ្ងៃទី២៤ ខែមករា កម្លាំងជំនាញ នៃនាយកដ្ឋានព្រហ្មទណ្ឌ បានកំណត់ទីតាំងដែលជនសង្ស័យចាប់ជនរងគ្រោះ យកទៅឃុំទុកដើម្បីជម្រិតទារប្រាក់ រហូតឈានដល់ការបង្ក្រាប និងចាប់ខ្លួនជនឧក្រិដ្ឋចំនួន៣នាក់ រំដោះជនរងគ្រោះម្នាក់នៅក្នុងផ្ទះសំណាក់ ហេង ឡុង បន្ទប់លេខ៤០៦ ជាន់ ទី៤ ភូមិ៤ ផ្លូវលេខ១១១ សង្កាត់បឹងព្រលឹត ខណ្ឌ៧មករា រាជធានីភ្នំពេញ ។ សមត្ថកិច្ចឲ្យដឹងថា តាមការបំភ្លឺពីជនរងគ្រោះឈ្មោះ Phom Quang Dung ថា កាលពីថ្ងៃទី១៨ ខែមករា ខ្លួនបានមកលេងល្បែងស៊ីសងនៅកាស៊ីណូក្រុងបាវិត ពេលលេងចាញ់អស់លុយ ត្រូវជនសង្ស័យទាំង៣នាក់ខាងលើបញ្ចុះបញ្ចូល នឹងនាំឲ្យមកលេងល្បែងឡុកឡាក់នៅកាស៊ីណូណាហ្គាវើលភ្នំពេញ ដោយពួកគេធានាមានប្រាក់ឲ្យខ្ចី ។ ពេលមកដល់ភ្នំពេញជនសង្ស័យ បានឲ្យគេខ្ចីប្រាក់ចំនួន១០០០០ ដុល្លារអាមេរិក ដើម្បីបានលេងល្បែងស៊ីសងទាំងអស់គ្នា ។
លុះពេលលេងចាញ់អស់លុយចំនួន៦៥០០ដុល្លារអាមេរិក ខ្លួនក៏ឈប់លេងទៅ ហើយរូបគេ នឹងជនសង្ស័យបាននាំគ្នាទៅស្នាក់នៅផ្ទះសំណាក់មួយដែលគេមិនស្គាល់ ។ ពេលទៅដល់ផ្ទះសំណាក់ស្រាប់តែជនសង្ស័យបានវាយរូបគេធ្វើទារុណកម្ម និងបង្អត់បាយ ហើយបានទូរស័ព្ទទៅគម្រាមអ្នកផ្ទះរបស់ខ្លួននៅប្រទេសវៀតណាម ទាមទារប្រាក់១២០០០ដុល្លារអាមេរិក ជាថ្នូ នឹងការដោះលែងខ្លួនទៅវិញ បើមិនដូច្នោះទេពួកគេនឹងកាត់ដៃកាត់ជើងថែមទាំងសម្លាប់ចោលទៀតផង ។
នៅចំពោះមុខសត្តកិច្ចជនសង្ស័យ៣ នាក់ បានសារភាពប្រហាក់ប្រហែលគ្នាថា ដំបូងឡើយពួកគេ និងជនរងគ្រោះ បាននាំគ្នាពីប្រទេសវៀតណាមមកលេងល្បែងស៊ី សងនៅកាស៊ីណូណាហ្គាវើល ក្រុងបាវិត ខ្លះក៏ចាញ់អស់ នឹងខ្លះក៏នៅសល់លុយតិចតួច បានបបួលគ្នាមកលេងនៅភ្នំពេញទៀត ដើម្បីស្រង់ដើមក្រែងបានវិញខ្លះ ។ ពេលមកដល់ភ្នំពេញឈ្មោះ Phom Quang Dung (ជនរងគ្រោះ) អត់មានលុយលេងល្បែងនឹងគេទេ ហើយក៏បានខ្ចីពួកគេទាំង៣នាក់ សរុបជាង១ម៉ឺនដុល្លារអាមេរិក លុះពេលចាញ់អស់គ្មានប្រាក់សង ។ បន្ទាប់មកពួកគេក៏បាននាំគ្នាទៅស្នាក់នៅផ្ទះសំណាក់ ហេង ឡុង និងបានបង្ខំចិត្តធ្វើទារុណកម្មជនរងគ្រោះ ហើយបានទូរស័ព្ទទៅគម្រាមក្រុមគ្រួសារ ដើម្បីទាមទារយកប្រាក់ជំពាក់១២០០០ដុល្លារអាមេរិក (ស្មើ៣០០លានដុង)នោះវិញ ។
ប៉ុន្តែប្រាក់មិនទាន់បានដល់ដៃផង ពួកគេក៏ត្រូវកម្លាំងសមត្ថកិច្ចទៅឡោមព័ទ្ធចាប់ខ្លួនតែម្តងទៅ ។
បើតាមលោកវរសេនីយ៍ឯក ជាវ វិបុល បន្ទាប់ពីស្ដាប់ចម្លើយសារភាពរបស់ជនសង្ស័យ និងការបំភ្លឺរបស់ជនរងគ្រោះ សមត្ថកិច្ចជំនាញសន្និដ្ឋានបានថា នេះពិតជាករណីចាប់បង្ខាំងមនុស្សដោយខុសច្បាប់ និងគម្រាមទារប្រាក់ប្រាកដមែន៕ដោយ៖បញ្ញាស័ក្តិ
