បាងកក៖ លោក ចម ប្រសិទ្ធ ទេសរដ្ឋមន្រី្តរដ្ឋមន្ត្រី ក្រសួងឧស្សាហកម្មនិងសិប្បកម្ម បានដឹកនាំគណ:ប្រតិភូក្រសួងចូលរួមកិច្ចប្រជុំពិភាក្សាកម្រិតអនុតំបន់អាស៊ីប៉ាស៊ីហ្វិច ស្តីពីបណ្ឌិតសភាជាតិវិស័យវិទ្យាសាស្ត្រ ក្នុងប្រទេសអភិវឌ្ឍន៍តិចតួច(LDCs) ដើម្បីគាំទ្ររបៀបវារៈឆ្នាំ ២០៣០ ។ កិច្ចប្រជុំនេះបានប្រារព្ធធ្វើនៅមជ្ឈមណ្ឌលសន្និសីទនៃអង្គការសហប្រជាជាតិ (UNCC )នៅទីក្រុងបាងកកប្រទេសថៃ ពីថ្ងៃទី៣ដល់ថ្ងៃទី ៤ខែ កុម្ភៈ ឆ្នាំ២០២០ ។
កិច្ចប្រជុំដែលសហការរៀបចំឡើងរវាងគណ:កម្មការសង្គមសេដ្ឋកិច្ចសម្រាប់តំបន់អាស៊ី និងប៉ាស៊ីហ្វិច(UNESCAP) ដែលដឹកនាំដោយលោក kaveh Zahedi លេខាធិការរងនៃអង្គការUNESCAP និងធនាគារបច្ចេកវិទ្យា នៃអង្គការ សហប្រជាជាតិសម្រាប់ប្រទេសអភិវឌ្ឍន៍តិចតួច (UN Technology Bank) ដែលដឹកនាំដោយ Joshua Stipa ជាអគ្គនាយកនៃអង្គការនេះ មានគោលបំណងពិភាក្សាលើចំណុចសំខាន់ៗដូចជា៖-ការអភិវឌ្ឍន៍ដោយនិរន្តរភាព ក្នុងតំបន់និងពិភពលោក-ស្ថានភាពអំពីការងារវិទ្យាសាស្ត្រ បច្ចេកវិទ្យា និងនវានុវត្តន៍របស់បណ្តាប្រទេសក្នុងតំបន់អាស៊ីប៉ាស៊ីហ្វិច-មុខងាររបស់បណ្ឌិតសភាវិទ្យាសាស្ត្របច្ចេកវិទ្យា និងនវានុវត្តន៍ ក្នុងតំបន់ ។
មានប្រសាសន៍នាឱកាសនោះ លោកកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានវាយតម្លៃខ្ពស់ចំពោះកិច្ចពិគ្រោះយោបល់នេះ និងបានបញ្ជាក់ថា៖ប្រជាជនដែលរស់នៅក្នុងប្រទេសអភិវឌ្ឍន៍តិចតួចបច្ចុប្បន្នត្រូវគេប៉ាន់ស្មានថានឹងកើនឡើងទ្វេដងដល់១.៩ពាន់លាននាក់ នៅឆ្នាំ២០៥០។ ជាមួយនិងចំនួនយុវជនកើនឡើងបន្ថែមប្រមាណ ៦៣០ លាននាក់ (ស្មើនឹងប្រហែល១ភាគ៣នៃចំនួនប្រជាជនLDCs ដែលបានប៉ាន់ប្រមាណនៅឆ្នាំ ២០៥០)នឹងបានចូលទីផ្សារការងារ ដោយមិនបានបង្កើនសមត្ថភាព ផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ (STI)។
ប្រសិនបើមិនប្រញ៉ាប់ប្រញ៉ាល់ កសាងសមត្ថភាពផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ឲ្យបានទាន់ពេលវេលានោះទេ គោលដៅនៃការលុបបំបាត់ភាពក្រីក្រដែលកំពុងរីករាលដាល ការបំបាត់ឧបសគ្គរចនាសម្ព័ន្ធអន់ថយ និងការធានាការអភិវឌ្ឍន៍ប្រកបដោយនិរន្តរភាព និងរបៀបវារ:សម្រាប់ឆ្នាំ ២០៣០ នៅតែជាសុបិន្តដ៏វែងឆ្ងាយសម្រាប់ប្រជាជនក្រីក្ររាប់លាននាក់ ។
យោងតាមតួលេខនាពេលថ្មីៗនេះ យើងទទួលស្គាល់ថា ចំណែកទីផ្សារនាំចេញពិភពលោកនៃប្រទេសក្រីក្រ នៅមានកម្រិតទាបនៅឡើយ គឺក្រោម២% ។ ដូច្នេះពិភពលោកត្រូវបន្ថែមសកម្មភាព ដើម្បីជំរុញចំណែកទីផ្សារនៃប្រទេសក្រីក្រអាចនាំចេញក្នុងកម្រិត២ដងបន្ថែមទៀតជាមួយដៃគូរបស់ខ្លួន។ ការចូលក្នុងទីផ្សារនិងការបង្កើតថ្មីក៏ដូចជាការកិច្ចសម្រួលរបាំងពាណិជ្ជកម្ម ពិតជានឹងជួយLDCs ឲ្យចូលរួមក្នុងសេដ្ឋកិច្ចកាន់តែរស់រវើកថែមទៀត តាមរយ:ការទាក់ទាញការវិនិយោគ និងលើកកម្ពស់អាជីវកម្មប្រកបដោយការទទួលខុសត្រូវ តាមរយ:ឧស្សាហូបនីយកម្មប្រកបដោយចីរភាពសម្រាប់វឌ្ឍនភាពរួមគ្នា ។
ចំពេលកំណើនសេដ្ឋកិច្ចពិភពលោកយ៉ាងឆាប់រហ័ស វាត្រូវបានគេយល់ច្បាស់ថា៖ បណ្តាប្រទេសដែលមានការអភិវឌ្ឍតិចតួច នៅតែត្រូវការយកចិត្តទុកដាក់និងការគាំទ្រយ៉ាងខ្លាំង ឆ្ពោះទៅការសម្រេចរបៀបវារៈឆ្នាំ ២០៣០ របស់ពួកគេ ។ ម៉្យាងទៀតក្រុមប្រទេសLDCsនឹងត្រូវត្រៀមខ្លួនជាស្រេចធន់និងផលប៉ះពាល់អវិជ្ជមាននៃការប្រែប្រួលអាកាសធាតុ ខណ:ដែលទទួលបានមូលដ្ឋានគ្រឹះនៃជីវិត តាមរយ:កំណើនប្រកបដោយចីរភាពនិងបរិយាប័ន្ន នៅក្នុងនោះ។
លោកកិត្តិសេដ្ឋាបណ្ឌិត ទេសរដ្ឋមន្រ្តី បានបន្ថែមថា៖ការកសាងសមត្ថភាពផែ្នកវិទ្យាសាស្ត្រ បច្ចេកវិទ្យា និងនវានុវត្តន៍ គឺជាក្តីសង្ឃឹមតែមួយគត់សម្រាប់ប្រទេសក្រីក្រ ដើម្បីសម្រេចបានរបៀបវារ:ឆ្នាំ ២០៣០ ។ ដូច្នេះ កិច្ចពិភាក្សាថ្នាក់អនុតំបន់នាថ្ងៃនេះ ជាឱកាសដ៏ធំសម្រាប់យើងទាំងអស់គ្នា ដើម្បីផ្លាស់ប្ដូរយោបល់ពីតួនាទីនៃវិស័យវិទ្យាសាស្ត្រក្នុងរបៀបវារ:អភិវឌ្ឍន៍ប្រកបដោយចីរភាពក្នុងតំបន់និងពិភពលោក ការផ្លាស់ប្តូរបទពិសោធន៍ថ្នាក់តំបន់ និងជាតិ នៃការចូលរួមរបស់បណ្ឌិតសភាក្នុងរបៀបវារ:អភិវឌ្ឍន៍ប្រកបដោយចីរភាពជាតិនិងកំណត់ប្រទេសសាកល្បងសម្រាប់គាំទ្រក្នុងការបង្កើតបណ្ឌិតសភាវិទ្យាសាស្ត្រ និងពង្រឹងបណ្ឌិត សភាវិទ្យាសាស្ត្រ ដែលមានស្រាប់ ។
នៅក្នុងឱកាសនោះផងដែរ លោកកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ ក៏បានជម្រាបជូនពីកិច្ចខិតខំប្រឹងប្រែង របស់រាជរដ្ឋាភិបាលកម្ពុជាក្រោមការដឹកនាំដ៏វៀងវៃរបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្រសួងឧស្សាហកម្មនិងសិប្បកម្ម នឹងពង្រីកវិសាលភាពនិងការទទួលខុសត្រូវ របស់ខ្លួនថែមមួយកម្រិតទៀត ដោយក្តោបយកនូវវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ហើយនៅចុងសប្តាហ៍នេះ គណ:រដ្ឋមន្ត្រីកម្ពុជានឹងបើកកិច្ចប្រជុំពេញអង្គរបស់ខ្លួន ដើម្បីពិនិត្យ និងសម្រេចការប្តូរឈ្មោះក្រសួងឧស្សាហកម្ម និងសិប្បកម្ម ទៅជាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MITIS) ដែលជាពេលវេលាសមស្របនិងសារសំខាន់សម្រាប់កម្ពុជាត្រៀមខ្លួនចូលក្នុងបរិបទនៃបដិវត្តន៍ឧស្សាហកម្មជំនាន់ទី៤.០ ៕ដោយ៖កូឡាប
