ភ្នំពេញ៖ រោងចក្រ សហគ្រាសនៅក្នុងប្រទេសកម្ពុជាបានកើនឡើងយ៉ាងខ្លាំងពីជាង ៦០មូលដ្ឋាន រហូតមកដល់ ជាង១ម៉ឺន៥ពាន់មូលដ្ឋាន នាពេលបច្ចុប្បន្ន ដោយបានស្រូបទាញកម្លាំងពលកម្ម ជិត២លាននាក់ ព្រមទាំងបានផ្ដល់ការងារធ្វើដោយប្រយោលដល់កម្មករនិយោជិត ទាំងក្នុងស្រុក និងបរទេសជាច្រើនសែននាក់ផ្សេងទៀត ហើយក្នុងចំនួននេះ ជាង៦០ភាគរយនៃរោងចក្រ សហគ្រាសទាំងនោះ គឺមានទីតាំងក្នុងមូលដ្ឋានរាជធានីភ្នំពេញ។
លោកមាន ចាន់យ៉ាដា អភិបាលរងរាជធានីភ្នំពេញ បានថ្លែងក្នុងវគ្គផ្សព្វផ្សាយស្ដីពីនីតិវិធីនៃការចុះបញ្ជីការសមាជិកបសស និងនីតិវិធីនៃការផ្ដល់អត្តសញ្ញាណប័ណ្ណសញ្ជាតិខ្មែរ សម្រាប់សមាជិក បសសក្នុងមូលដ្ឋានរាជធានីភ្នំពេញ កាលពីព្រឹកថ្ងៃទី៧ កុម្ភៈ ២០២០ នៅសាលារាជធានីភ្នំពេញ ។ លោកឧត្តមសេនីយ៍ឃៀង សុគន្ធា ប្រធាននាយកដ្ឋានអត្តសញ្ញាណប័ណ្ណសញ្ជាតិខ្មែរ នៃអគ្គនាយកដ្ឋានអត្តសញ្ញាណកម្មក្រសួងមហាផ្ទៃ ក៏បានចូលរួមជាអធិបតីក្នុងវគ្គផ្សព្វផ្សាយ។
លោកមាន ចាន់យ៉ាដា បានមានប្រសាសន៍ថា ក្នុងរយៈពេលជាងពីរទសវត្សរ៍នេះ គឺចាប់តាំងពីឆ្នាំ ១៩៩៧មក ចំនួនរោងចក្រ សហគ្រាសនៅក្នុងប្រទេសកម្ពុជា បានកើនឡើងយ៉ាងខ្លាំងពី៦៤ មូលដ្ឋាន រហូតមកដល់ ១៥៦៦៤ មូលដ្ឋាននិងបានស្រូបទាញកម្លាំងពលកម្មពី៨២០០០នាក់ ដល់ជិត ២លាននាក់ព្រមទាំងបានផ្ដល់ការងារ ធ្វើដោយប្រយោលដល់កម្មករនិយោជិត ទាំងក្នុងស្រុកនិងបរទេសជាច្រើនសែននាក់ផ្សេងទៀត កំពុងបំពេញការងារយ៉ាងសកម្ម ហើយចំនួន ជាង៦០ភាគរយនៃរោងចក្រសហគ្រាសទាំងនោះ គឺមានទីតាំងក្នុងមូលដ្ឋានរាជធានីភ្នំពេញ។
លោកបន្ត ទៀតថា កម្មករនិយោជិតភាគច្រើនក្នុងប្រទេសកម្ពុជា គឺជាស្ត្រី ក្នុងអត្រាប្រមាណ៨៣ភាគរយ និងមានអាយុក្រោម ៣០ ឆ្នាំលើសពី៧២ភាគរយ។ ឈរលើមូលដ្ឋាននេះ រាជរដ្ឋាភិបាលបានដាក់ចេញនូវគោលនយោបាយ ចំណង២ និងខ្សែ ៤ ដើម្បីផ្ដល់សក្តា
នុពលក្នុងវិស័យនេះ នឹងជួយលើកកម្ពស់ជីវភាពរស់នៅរបស់កម្មករនិយោជិក។ លោកបញ្ជាក់ថា ចំណង២ មានន័យថា សន្តិភាពនិងការអភិវឌ្ឍដែលជាបរិស្ថានគ្របដណ្ដប់រួម ហើយមានអន្តរសកម្មភាពជាមួយគ្នាទៅវិញ ទៅមកមិនអាចខ្វះបានសម្រាប់ជីវភាពរស់នៅល្អប្រសើរ របស់ប្រជាជនកម្ពុជាគ្រប់រូប នឹងភាពរីកចម្រើនរបស់ជាតិមាតុភូមិ។ ចំពោះគោលនយោបាយចុងខ្សែ៤
មានន័យថា ចុងខ្សែទី ១ ការទាក់ទាញវិនិយោគ ដើម្បីលើកកម្ពស់កំណើននិងបង្កើតការងារដល់ពលករខ្មែរ។ចុងខ្សែទី ២ លើកកម្ពស់ជីវភាព និងផលិតផលការ
ងារ។ ចុងខ្សែទី ៣ ធានាសុខុមាលភាពកម្មករនិងចុងខ្សែទី៤ ការធានាលក្ខខណ្ឌការងារសមរម្យដល់កម្មករ។
លោកមាន ចាន់យ៉ាដា ក៏បានបញ្ជាក់ឲ្យដឹងផងដែរថា គិតចាប់តាំងពីឆ្នាំ២០០៨ រហូតមកដល់ពេលនេះ ប ស ស បានចុះបញ្ជីកា សហគ្រាសក្នុងវិស័យឯកជន សរុបចំនួន ១៥៦៦៥ សហគ្រាសដែលមានកម្មករនិយោជិតចំនួន១៩៣៥១៤១នាក់ត្រូវបានការ ការពារពីគ្រោះថ្នាក់ការងារ ។ ដោយឡែកសម្រាប់ផ្នែកថែទាំសុខភាព ត្រូវបានដាក់ឲ្យដំណើរការ ចាប់ពី ខែកញ្ញាឆ្នាំ២០១៦ ដែលមកដល់ពេលនេះ ប ស ស បានចុះបញ្ជីកាសហគ្រាសក្នុងវិស័យឯកជន១១០៩៥សហគ្រាស មានកម្មករសរុបចំនួន១៩១៩១០៨នាក់ និងគ្រឹះស្ថានសាធារណៈ៣៦ ស្ថាប័ន សម្រាប់មន្ត្រីសាធារណៈ អតីតមន្ត្រីរាជការ និងអតីតយុទ្ធជន៣៣៨៥០៨នាក់សរុបអ្នកទទួលផលចំនួន២២៥៧៦១៦នាក់។
ក្នុងឱកាសនោះដែរ លោកមាន ចាន់យ៉ាដា ក៏បានធ្វើការណែនាំ ដល់ភាគីពាក់ព័ន្ធនូវការងារចំនួន៣ ចំណុចផងដែរ ក្នុងនោះ លោកស្នើឲ្យគ្រប់ភាគីពាក់ព័ន្ធទាំងអស់ផ្ដល់កិច្ចសហការល្អ ដើម្បីដោះស្រាយបញ្ហាដែល សមាជិក បសស បាននិងកំពុងជួបប្រទះជាពិសេសលើការងារផ្ដល់អត្តសញ្ញាណប័ណ្ណសញ្ជាតិខ្មែរគំរូថ្មី ដោយផ្អែកតាមច្បាប់និងយន្តការដែលមានស្រាប់ ដើម្បីឱ្យបងប្អូនកម្មករនិយោជិតយើងអាចទទួលបានតាវកាលិក និងអត្ថប្រយោជន៍ផ្សេងៗទៀតពី ប ស ស ។ ទី២ ចំពោះ និយោជក ម្ចាស់សហគ្រាសគ្រឹះស្ថានទាំងអស់ ត្រូវចូលរួមអនុវត្តច្បាប់ស្តីពីរបបសន្តិសុខសង្គម សម្រាប់ជនទាំងឡាយណា ដែលស្ថិតក្រោមបទប្បញ្ញត្តិនៃច្បាប់ស្ដីពីការងារឲ្យមាន
នប្រសិទ្ធភាពខ្ពស់និងត្រូវរួសរាន់ ចុះបញ្ជីកាសហគ្រាសគ្រឹះស្ថានអតិកម្មករ និយោជកនឹងត្រូវចូលរួមបង់វិភាគទានឱ្យបានទាន់ពេលវេលា សម្រាប់របបធានារ៉ាប់រងហានិភ័យការងារ និងរបបធានារ៉ាប់រងសុខភាព ដើម្បីជៀសវាងកុំឲ្យប៉ះពាល់ដល់អត្ថប្រយោជន៍ របស់បងប្អូនកម្មករនិយោជិត។ លោកស្នើឲ្យស្នងការរាជធានីភ្នំពេញ រដ្ឋបាលខណ្ឌទាំង១៤ មន្ទីរការងារនិងបណ្ដុះបណ្ដាលវិជ្ជាជីវៈរាជធានីភ្នំពេញ និងគ្រប់អង្គភាពពាក់ព័ន្ធត្រូវចូលរួមសហការ ជាមួយបេឡាជាតិរបបសង្គម អនុវត្តការងារនេះឱ្យទទួលបានជោគជ័យ ដើម្បីរួមចំណែកលើកម្ពស់ជីវភាពរស់នៅរបស់បងប្អូនកម្មករកម្មការិនី ស្របតាមគោលនយោបាយជាតិគាំពារសង្គមសម្រាប់រាជរដ្ឋាភិបាលកម្ពុជា៕ដោយ៖កូឡាប
