តាកែវ៖អភិបាលរងខេត្តតាកែវ លោក ខាន់ សុខា បានធ្វើការជំរុញដល់លោកអភិបាលក្រុង-ស្រុក រួមនិងអាជ្ញាធរពាក់ព័ន្ធត្រូវតែផ្តល់ព័ត៌មានឲ្យបានលឿនរហ័ស ពីបញ្ហាគ្រោះមហន្តរាយផ្សេងៗ ដែលបានកើតមានឡើងក្នុងមូលដ្ឋានរបស់ខ្លួន ដើម្បីធ្វើយ៉ាងណាងាយស្រួល ក្នុងការចុះជួយបងប្អូនប្រជាពលរដ្ឋ ឲ្យបានទាន់ពេលវេលា មិនអាចទុកយូរឬអូសបន្លាយបានឡើយ ។
ថ្លែងនៅក្នុងឱកាសអញ្ជើញ ចូលរួមក្នុងកិច្ចប្រជុំ ស្ដីពីការប្រមូលទិន្នន័យសម្រាប់រៀបចំផែនការ ត្រៀមបម្រុងឆ្លើយតបគ្រោះអាសន្នថ្នាក់ខេត្ត ឆ្នាំ២០២០ នៅសាលប្រជុំទីចាត់ការផែនការ និងវិនិយោគខេត្ត កាលពីថ្ងៃ ២៤ ខែកុម្ភៈ ឆ្នាំ២០២០ម្សិលមិញនេះ លោក ខាន់ សុខា អភិបាលរងខេត្តតាកែវ និងជាអនុប្រធានគណៈកម្មាធិការគ្រប់គ្រងគ្រោះមហន្តរាយខេត្តបានមានប្រសាសន៍ថា ឥទ្ធពលអវិជ្ជមាននៃការប្រែប្រួលអាកាសធាតុ ដែលវាបង្កឲ្យទៅជាគ្រោះធម្មជាតិផ្សេងៗ ដូចជាការឡើងកម្ដៅ គ្រោះរាំងស្ងួត និងទឹកជំនន់ជាដើម ហើយបច្ចុប្បន្នប្រទេសកម្ពុជា របស់យើងកំពុងរងផលប៉ះពាល់នៃបាតុភូត (អ៊ែលនីណូ) ដែលបង្កឲ្យមានភាពគ្រោះរាំងស្ងួត នៅតាមបណ្តាខេត្តមួយចំនួន នៃប្រទេសកម្ពុជា ដែលធ្វើឲ្យការបង្កបង្កើនផលរបស់បងប្អូនប្រជាពលរដ្ឋ ជួបបញ្ហាខ្វះខាតទឹកប្រើប្រាស់ ក្នុងការស្រោចស្រពផលដំណាំរបស់គាត់ ។
លោកអភិបាលរងខេត្តតាកែវ បានមានប្រសាសន៍បន្ថែមទៀតថា ដើម្បីជាយន្តការឆ្លើយតបនិងភាពរាំងស្ងួត ក្នុងនាមយើងជាអាជ្ញាធរមូលដ្ឋាន ត្រូវរួមសហការគ្នាជាមួយស្ថាប័នពាក់ព័ន្ធ អង្គការដៃគូ និងផ្សព្វផ្សាយពីវិធានការត្រៀមទុកមុនដូចជាការរក្សាទឹកទុក បច្ចេកទេសកសិកម្មប្រើប្រាស់ទឹកតិច និងការចាក់វាក់សាំងការពារសត្វពាហនៈ ហើយបើមានបញ្ហាកើតមានឡើងមន្រ្តីមូលដ្ឋាន ត្រូវតែផ្ដល់ព័ត៌មាន និងរបាយការណ៍ឲ្យបានរហ័សមកកាន់អាជ្ញាធរខេត្ត ឬលេខាធិការដ្ឋានគ្រប់គ្រងគ្រោះមហន្តរាយ ដើម្បីងាយស្រួល ក្នុងការចុះជួយពួកគាត់បានទាន់ពេលវេលា ក្នុងការជួយកាត់បន្ថយការខាតបង់ថវិការបស់បងប្អូនប្រជាពលរដ្ឋផងដែរ៕ដោយ៖តាកែវ
