ស្ទឹងត្រែង ៖ លោក នាយឧត្តមសេនីយ៍ នេត សាវឿន បានដាស់តឿនឲ្យលោកស្នងការនគរបាលខេត្តស្ទឹងត្រែង ដែលទើបតែងតាំងថ្មី និងកងកម្លាំងនគរបាលទូទាំងខេត្ត ត្រូវយកអស់កម្លាំងកាយចិត្តរួមគ្នាការពារសុខសុវត្ថិភាព បង្ការ ទប់ស្កាត់ និងបង្រ្កាបបទល្មើសគ្រប់ប្រភេទឲ្យមានប្រសិទ្ធភាពខ្ពស់។
នារសៀលថ្ងៃទី២៨ ខែកុម្ភៈ ឆ្នាំ២០២០ ក្នុងពិធីប្រកាសតែងតាំងមុខតំណែងស្នងការ នៃស្នងការដ្ឋាននគរបាលខេត្តស្ទឹងត្រែង លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការ នគរបាលជាតិ មានប្រសាសន៍ផ្តាំផ្ញើដល់លោកស្នងការ ដែលទើបឡើងកាន់តំណែងថ្មី ខិតខំអនុវត្តភារកិច្ច ជាពិសេសយកចិត្តទុកដាក់ក្នុងការធ្វើការចំនួន៦ចំណុច ដើម្បីឲ្យការងារមានភាពរីកចម្រើនប្រកបដោយប្រសិទ្ធភាពដូចខាងក្រោម ៖ ១-សូមឲ្យមានមនោសញ្ចេតនា ការយោគយល់អធ្យាស្រ័យ មានការទទួលខុសត្រូវ និងភក្តីភាពជាស្ពានតភ្ជាប់រវាងថ្នាក់លើ និងថ្នាក់ក្រោម ក្នុងអង្គភាព ចុះសួរសុខទុក្ខដល់មន្ទីរពេទ្យ ឬផ្ទះនៅពេលដែលថ្នាក់ក្រោមមានការលំបាកជាដើម។ ២-ក្នុងនាមជាអ្នកដឹកនាំក្នុងអង្គភាព ត្រូវធ្វើជាសេនាធិការជូនគណៈបញ្ជាការឯកភាពខេត្ត ដាក់ចេញនូវផែនការជាក់ស្តែង ដើម្បីអនុវត្តដែលមិនមែន ជាតែងសេចក្តី ដែលក្នុងនោះពាក់ព័ន្ធនិងបញ្ហា ភូមិ-ឃុំ មានសុវត្ថិភាព បញ្ហាគ្រឿងញៀន និងចរាចរណ៍ជាដើម។ ៣-ត្រូវមានសាមគ្គីភាពផ្ទៃក្នុង សហការគ្នាលើកតម្លៃរួមជាធំ លើកដំឡើងតួនាទីបងប្អូនដែលធ្វើការនៅក្នុងកន្លែង ជាជាងបញ្ចូលអ្នកមកពីកន្លែងផ្សេង ដែលនាំឲ្យពិបាកក្នុងការស្វែងយល់ចិត្តគ្នា។ ៤-សំណូមពរឲ្យស្នងការដែលទើបទទួលតំណែងចាប់អារម្មណ៍ លើកិច្ចការពង្រឹងក្រុមការងារប្រចាំបញ្ជា កម្លាំងអន្តរាគមន៍ និងទទួលព័ត៌មាន ដោយមានកម្លាំងចម្រុះចូលរួមមានទាំង កងទ័ព អាវុធហត្ថ និងនគរបាលដើម្បីការពារសុខសុវត្ថិភាពជូនប្រជាពលរដ្ឋ ដែលអាចដោះស្រាយបាន ទាន់ពេលវេលា ពេលមានហេតុការណ៍កើតឡើងភ្លាមៗ។ ៥-ត្រូវចាត់ចែងលើកសរសើរ និងជូនរង្វាន់ដល់មន្ត្រីនគរបាល ដែលមានស្នាដៃក្នុងការបំពេញភារកិច្ចជូនអង្គភាព និងប្រជាពលរដ្ឋ លើកឲ្យមាន ការប្រឡងប្រណាំង ដើម្បីលើកទង់អង្គភាពព្រមទាំងបុគ្គលផ្ទាល់ខ្លួនផងដែរ រកឲ្យឃើញអ្នកដែលមានសក្តិតូចដើម្បីលើកទឹកចិត្តជូនពួកគាត់ និងរួមគ្នាលុបបំបាត់ការរត់ការក្រៅច្បាប់ ដើម្បីបានឡើងសក្តិ និងតួនាទី។ ៦-ត្រូវពង្រឹងវិន័យ និងសេចក្តីថ្លៃថ្នូរលើកកម្ពស់សីលធម៌ ដល់កងកម្លាំងនគរបាលដែលបម្រើប្រជាពលរដ្ឋ តាមជំនាញពិតប្រាកដ ត្រូវអនុវត្តច្បាប់ និងដាក់វិន័យចំពោះកងកម្លាំងនគរបាលជាតិណា ដែលប្រព្រឹត្តខុសដោយមិនគិតពីសក្តិធំ ឬសក្តិតូច។
លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ក៏បានជំរុញដាស់តឿនឲ្យលោកស្នងការដែលទើបតែងតាំងថ្មី និងកងកម្លាំងនគរបាលទូទាំងខេត្តស្ទឹងត្រែងទាំងអស់ ត្រូវយកអស់កម្លាំងកាយចិត្តរួមគ្នាការពារសុខសុវត្ថិភាព និងបម្រើសេវាសាធារណៈជូនប្រជាពលរដ្ឋ ជាពិសេសរួមគ្នាបង្ការ ទប់ស្កាត់ និងបង្រ្កាបបទល្មើសគ្រប់ប្រភេទឲ្យមានប្រសិទ្ធភាពខ្ពស់។
គួរបញ្ជាក់ថា តាមប្រកាសរបស់ក្រសួងមហាផ្ទៃ ត្រូវបានតែងតាំង លោកឧត្តមសេនីយ៍ត្រី អូត ស៊ីវត្ថា ស្នងការរងនគរបាលខេត្ត ទៅជាស្នងការនគរបាលខេត្តស្ទឹងត្រែង ជំនួស លោកឧត្តមសេនីយ៍ទោ ម៉ៅ តារា ដែលត្រូវចូលនិវត្តន៍៕ដោយ៖កូឡាប
