ភ្នំពេញ ៖ បុរសម្នាក់បានបើករថយន្តស៊េរីទំនើបមួយគ្រឿង បានចោទថាមានយុវជន២នាក់ ជិះម៉ូតូមួយគ្រឿងយកដុំថ្ម មកគប់រថយន្តរបស់ខ្លួន ក៏បើកដេញបុកបណ្ដាលឲ្យស្លាប់ម្នាក់ នៅនឹងកន្លែងកើតហេតុ និងម្នាក់ទៀតរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យភ្លាមៗ កាលពីម៉ោងជាង១យប់រំលងអធ្រាត្រ ឈានចូលថ្ងៃទី១ ខែមីនា ឆ្នាំ២០២០ នៅចំណុចមុខសាលាភូមិន្ទរដ្ឋបាល តាមដោយផ្លូវ ៦៣កែងនិងផ្លូវ៤៦៦ ក្នុងសង្កាត់ទន្លេបាសាក់ ខណ្ឌចំការមនរាជធានីភ្នំពេញ។
សពជនរងគ្រោះមានឈ្មោះ ឡេង ភេទប្រុស អាយុប្រមាណជាង ២០ឆ្នាំ ស្នាក់នៅក្នុងសង្កាត់ច្បារអំពៅទី២ ខណ្ឌច្បារអំពៅ ។ ចំណែកជនរងគ្រោះរបួសធ្ងន់ មានឈ្មោះ ហ៊ុល សុភ័ក្រ ភេទប្រុស អាយុ១៨ឆ្នាំ ស្នាក់នៅ សង្កាត់ច្បារអំពៅ២ ខណ្ឌច្បារអំពៅ ជាអ្នកបើកម៉ូតូ។ រីឯអ្នកបើករថយន្តបង្កមានឈ្មោះ ញិល សាវឿន ភេទប្រុសអាយុ ៤០ ឆ្នាំមុខរបរអ្នកបើករថយន្តក្រុមហ៊ុន ស្នាក់នៅសង្កាត់ចោមចៅ ខណ្ឌពោធិ៍សែនជ័យ។
តាមការរៀបរាប់ពីបុរសបើករថយន្ត បាននិយាយនៅមុនកើតហេតុ រូបគាត់បើករថយន្តស៊េរីទំនើបមួយគ្រឿងម៉ាក ALPHAD ពណ៌ខ្មៅ ពាក់ផ្លាកលេខ ភ្នំពេញ 2BB-5573 នៅតាមបណ្ដោយផ្លូវ ៣២២ ក្នុងសង្កាត់បឹងកេងកងទី១ ខណៈនោះក៏មានយុវជន ពីរនាក់ជិះម៉ូតូមួយគ្រឿង ម៉ាកប៊ីតពណ៌ក្រហមលាយស ពាក់ផ្លាកលេខ ភ្នំពេញ 1HA-2009 ធ្វើដំណើរមកពីក្រោយ មិនដឹងថាមានរឿងអីនោះទេ ស្រាប់តែយុវជន២នាក់នេះ រើសដុំថ្មមកគប់ទៅលើរថយន្តរបស់គាត់ ភ្លាមនោះរូបគាត់ខឹង បានបើករថយន្តដេញរហូតមកដល់ចំណុចកើតហេតុខាងលើ ក៏បានបុកម៉ូតូពីក្រោយពេញទំហឹង បណ្ដាលឲ្យយុវជនម្នាក់ ដួលបោកក្បាលទៅនឹងថ្នល់ស្លាប់ភ្លាមៗ នៅកន្លែងកើតហេតុ។ ចំណែកម្នាក់ទៀត រងរបួសធ្ងន់ ត្រូវបានបញ្ជូនទៅសង្គ្រោះ នៅឯមន្ទីរពេទ្យភ្លាមៗផងដែរ។ បន្ទាប់មករូបគាត់ត្រូវបានកម្លាំងសមត្ថកិច្ច ធ្វើការឃាត់ខ្លួនបញ្ជូនមក អធិការដ្ឋាននគរបាលភ្លាមៗតែម្តង។
លុះដល់ព្រឹកឡើងសមត្ថកិច្ចជំនាញចរាចរណ៍ក្រុង ចុះត្រួតពិនិត្យទៅលើរថយន្តរបស់ជនបង្ក ដោយមិនមានស្នាកស្នាមថា យុវជនទាំងពីរនាក់នោះ បានយកដុំថ្មគប់ទៅលើរថយន្តនោះ គ្មានក្រពិត ឬក៏បែកកញ្ចក់អ្វី សូម្បីតែបន្តិច មានតែស្នាមបុកម៉ូតូរបស់ជនរងគ្រោះ ។
បន្ទាប់មកសមត្ថកិច្ចកោសល្យវិច័យការិយាល័យស្នងការនគរបាលរាជធានីភ្នំពេញ បានចុះមកពិនិត្យសាកសព បានបញ្ជាក់ប្រាប់ឲ្យដឹងថា ជនរងគ្រោះដែលស្លាប់ គឺក្បាលបោក នឹងថ្នល់។
ក្រោយកើតហេតុសមត្ថកិច្ចមូលដ្ឋាន បានទំនាក់ទំនងទៅសមត្ថកិច្ចជំនាញ ចុះមកធ្វើការវាស់វែងយករថយន្ត និងម៉ូតូនិងនាំខ្លួនអ្នកបើកបររថយន្តដោយវាយខ្នោះ ទៅកាន់ការិយាល័យចរាចរណ៍ផ្លូវគោក ក្នុងការរាជធានីភ្នំពេញ រង់ចាំដោះស្រាយគ្នា ទៅតាមផ្លូវច្បាប់។
ដោយឡែកសពជនរងគ្រោះ សមត្ថកិច្ចធ្វើកំណត់ហេតុ រួចប្រគល់ជូនសាច់ញាតិយកទៅធ្វើបុណ្យ៕ដោយ៖បញ្ញាស័ក្តិ