គ្រប់គ្នានៅក្នុងបណ្តាញសង្គម សឹងតែពុំអាចទទួលយកបានសោះឡើយ ចំពោះការបាត់បង់ជីវិតរបស់អ្នកគ្រូពេទ្យដ៏ល្អម្នាក់ ចោលកូនភ្លោះទាំងពីរនាក់ និងប្តីបងប្អូន សាច់ញាតិ មិត្តភក្តិ ដោយសារតែរថយន្តស្ទួច១គ្រឿងបើកមិនប្រយ័ត្ន ទៅបុកម៉ូតូរបស់អ្នកគ្រូកំពុងជិះទៅហូបបាយ វេលាម៉ោងប្រមាណ ១២ ថ្ងៃទី០៣ ខែមីនា ឆ្នាំ ២០២០ ស្ថិតនៅទល់មុខវត្តក្រាំងធ្នង់ សង្កាត់គោកឃ្លៀង ខណ្ឌសែនសុខ រាជធានីភ្នំពេញ ។
ដោយឡែក បើយើងក្រឡេកមកមើលទិដ្ឋភាពនេះវិញ គឺពិតជាសង្វេកខ្លាំងណាស់ ខណៈកូនប្រុសភ្លោះទាំងពីរ បានឱបថើបសពម្តាយជាលើកចុងក្រោយទាំងនៅមុខស្រស់ញញឹម ហាក់ដូចកំពុងគេងលក់អ៊ីចឹង ។
អ្នកគ្រូដែលបានបាត់ជីវិតដោយសារគ្រោះថ្នាក់ចរាចរណ៍ដ៏រន្ធត់នេះ មានឈ្មោះ ណុន គឹមស៊ាប មានអាយុ ២៩ ឆ្នាំ ។
យោងតាមប្រភពព័ត៌មានបានឲ្យដឹងថា មុនពេលកើតហេតុ អ្នកគ្រូពេទ្យរងគ្រោះបានជិះម៉ូតូទៅទិញបាយហូប លុះដល់ចំណុចកើតហេតុខាងលើ ស្រាប់តែត្រូវឡានស្ទួច១គ្រឿងបុកយ៉ាងពេញទំហឹង បណ្ដាលឲ្យរងរបួសធ្ងន់ធ្ងរ ហើយបានស្លាប់ពាក់កណ្តាលផ្លូវ ពេលបញ្ជូនទៅសង្គ្រោះបន្ទាន់នៅឯមន្ទីរពេត្យ ៕ ដោយ៖ លឹម ហុង
