ភ្នំពេញ៖ លោកឧបនាយករដ្ឋមន្រ្តី ជា សុផារ៉ា បានថ្លែងថា ការវិនិយោគលើវិស័យសំណង់លំនៅស្ថាន បុរី ក្នុងព្រះរាជាណាចក្រកម្ពុជា មានរហូតដល់១១.០០០លានដុល្លារ ក្នុងឆ្នាំ២០១៩ បើប្រៀបធៀបនឹងឆ្នាំ២០១៨ គឺមានតែ៥៥០០លានដុល្លារប៉ុណ្ណោះ គឺមានការកើនឡើងរហូតដល់៩០%។ អភិវឌ្ឍបែបនេះ ហើយទើបយុវជនមានការងារធ្វើ បន្ថែមពីនេះ ចំពោះការអភិវឌ្ឍលំនៅស្ថាន របស់ម្ចាស់បុរីហាក់ ដូចជាបានជួយរកការងារធ្វើឲ្យវិស្វករស្ថាបត្យករ អ្នកសិក្សាគម្រោងប្លង់ផងដែរ។
លោកជា សុផារ៉ា ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានថ្លែងក្នុងសន្និបាតបូកសរុបលទ្ធផលការងារឆ្នាំ២០១៩ និងលើកទិសដៅការងារសម្រាប់ឆ្នាំ២០២០ របស់សមាគមអសមាគមអ្នកអភិវឌ្ឍលំនៅស្ថានកម្ពុជា កាលពីថ្ងៃទី៤ខែមីនា នៅសណ្ឋាគារសុខាភ្នំពេញ។
លោកឧបនាយករដ្ឋមន្រ្តី បានចាត់ទុកថាសន្និបាតនេះ គឺជាសន្និបាតមួយដែលមានលក្ខណៈពិសេសស្របនឹងឱកាសដែលកំណើនសេដ្ឋកិច្ចជាតិ បានកើនឡើងក្នុងរង្វង់៧,១%ក្នុងមួយឆ្នាំ និងអាចនិយាយបានថាវិស័យអចលនវត្ថុជាវិស័យមួយ ដែលជំរុញសេដ្ឋកិច្ចជាតិក្នុងឆ្នាំ២០១៩នេះ ដោយក្នុងនោះយើងឃើញថាការវិនិយោគលើវិស័យនេះ ក្នុងព្រះរាជាណាចក្រកម្ពុជា មានរហូតដល់១១.០០០លានដុល្លារសហរដ្ឋអាមេរិក ក្នុងឆ្នាំ២០១៩ បើប្រៀបធៀបនឹងឆ្នាំ២០១៨ គឺមានតែ៥.៥០០លានដុល្លារសហរដ្ឋអាមេរិកប៉ុណ្ណោះ គឺមានការកើនឡើងរហូតដល់៩០%។
លោកបានថ្លែងថា ការវិវត្តរីកចម្រើននៃវិស័យសំណង់ ស្របនឹងឱកាសដែលសមាគមអ្នកអភិវឌ្ឍលំនៅស្ថានកម្ពុជា បានរៀបចំសន្និបាតបូកសរុបលទ្ធផលការងាររបស់ខ្លួននេះ ក៏អាចនិយាយបានថានេះ គឺជាការផ្លាស់ប្តូរនូវបទពិសោធន៍កម្រិតជំនាញ ការយល់ដឹងនិងគិតគូរអំពីគំនិតយោបល់សម្រាប់ជំរុញនូវការអភិវឌ្ឍ បើគ្មានការរៀបចំបូកសរុបលទ្ធផលការងារប្រចាំឆ្នាំទេ នោះវាមិនបានចងក្រងជាដុំឯកភាពគ្នាតែមួយ ហើយនេះក៏ជាផែនមួយសម្រាប់ផ្លាស់ប្តូរបទពិសោធន៍គ្នាទៅវិញទៅមក ដែលកាលពីមុនយើងនៅដាច់ដោយឡែកពីគ្នា ហើយទុនក៏នៅមានការខ្វះចន្លោះមិនទាន់គ្រប់គ្រាន់ ក្រោយពេលដែលយើងមានបទពិសោធន៍ និងរកបានដៃគូហើយនោះរហូតមកទល់ពេលនេះ យើងឃើញថាការវិវត្តន៍រីកចម្រើនមានកំណើនកាន់តែកើនឡើងថែមទៀត។ លទ្ធផលដែលទាំងអស់គ្នា បានកត់ត្រាទុកនាពេលបច្ចុប្បន្ននេះ យើងឃើញថានៅទីណាក៏មានសំណង់លំនៅស្ថានល្អ ទំនើបខ្ពស់ៗ រីឯបុរីលំនៅស្ថានមានរហូតដល់៣២០បុរី ដែលកាលពីមុនមិនមានបុរីបែបនេះឡើយ។
លោកឧបនាយករដ្ឋមន្រ្តី បានកោតសរសើរដល់អ្នកអភិវឌ្ឍបុរីលំនៅស្ថាន ដែលបានកែច្នៃបុរីនីមួយៗឲ្យមានសោភ័ណភាព និងរឹងមាំដែលអាចចូលរួមលើកកម្ពស់បរិស្ថាន ដោយបានរួមចំណែកបង្កើតផ្ទៃបៃតងសំដៅទប់ស្កាត់បម្រែបម្រួលអាកាសធាតុ។ នៅក្នុងបុរីនីមួយៗ យ៉ាងហោចណាស់ ក៏មានហេដ្ឋារចនាសម្ព័ន្ធបង្កប់ក្រោមដីប្រវែង៥ទៅ៦គីឡូម៉ែត្រ បើមិនមានការស្ថាបនាផ្លូវ លូ
ឬភ្លើងបំភ្លឺទេនោះគឺមិនអាចងាយស្រួលលក់ដូរ សម្រួលដល់ការរស់នៅរបស់អតិថិជននោះឡើយ ដូច្នេះយើងទទួលស្គាល់និងឲ្យតម្លៃថានេះ គឺជាការរួមចំណែកក្នុងការអភិវឌ្ឍទីក្រុង និងទីប្រជុំជនដោយឯកឯងហើយវិស័យឯកជន គឺបានរួមចំណែកជាមួយនឹងរដ្ឋ។ ម្យ៉ាងទៀត ចំពោះបញ្ហាសន្តិសុខ គឺយើងបានទទួលស្គាល់ថាទីណា ដែលមានបុរី គឺចាត់ទុកថាជាភូមិមួយ ជាបណ្តុំនៃសហគមន៍មួយ ដែលប្រជាពលរដ្ឋមានទុន ដើម្បីទិញលំនៅស្ថានក្នុងបុរីដែលមានសន្តិសុខប្រចាំការ មានអ្នករៀបចំជួសជុលក្នុងការឆ្លើយតប ជាមួយនឹងអតិថិជនរបស់ខ្លួន ហើយសន្តិសុខនៅទីនោះត្រូវបានធានាដែលនេះ ក៏អាចនិយាយបានថាជាការរួមចំណែក នៅក្នុងការអភិវឌ្ឍភូមិឃុំមានសុវត្ថិភាព កាត់បន្ថយបាននូវក្តីកង្វល់ឬការភ័យខ្លាចរបស់ប្រជាពលរដ្ឋ រាប់ពាន់គ្រួសារក្នុងបុរីនោះ។ ក្រៅពីនេះ ក៏យើងវាយតម្លៃខ្ពស់ថា ដោយសារការអភិវឌ្ឍបែបនេះ ហើយទើបយុវជនមានការងារធ្វើ បន្ថែមពីនេះចំពោះការអភិវឌ្ឍលំនៅស្ថាន របស់ម្ចាស់បុរីហាក់ ដូចជាបានជួយរកការងារធ្វើឲ្យវិស្វករស្ថាបត្យករ អ្នកសិក្សាគម្រោងប្លង់ផងដែរ។
លោកឧបនាយករដ្ឋមន្រ្តី បានបញ្ជាក់ថា ក្រោមការដឹកនាំនិងចង្អុលបង្ហាញពីសម្តេចតេជោ ហ៊ុន សែន នាយករដ្ឋមន្រ្តី ក្នុងការគាំទ្រនិងបើកទូលាយ ដល់វិស័យឯកជនដែលជាគំនាស់សេដ្ឋកិច្ចបន្ថែមទៀត ដែលការផ្តល់ការគាំទ្រដល់វិស័យឯកជននេះ រាជរដ្ឋាភិបាលនឹងទទួលបានផលប្រយោជន៍មកវិញ តាមរយៈការបង់ពន្ធ ការលក់ដូរអចលនទ្រព្យជាដើម។
ជាមួយនេះ លោកបានកោតសរសើរដល់សហគ្រិនវ័យក្មេង ដែលមានសេចក្តីក្លាហាននិងកិត្តិយស ចំពោះការប្រកាសពន្ធដោយត្រឹមត្រូវ ប្រកបដោយឆន្ទៈ និងមានមោទនភាពហើយរីករាយក្នុងការរួមចំណែក ដោយមិនមានការលួចលាក់ពន្ធ ដែលសហគ្រិនវ័យក្មេងជំនាន់ថ្មីទាំងនេះ ជាធនធានមនុស្សក្រោមការបណ្តុះបណ្តាល របស់រាជរដ្ឋាភិបាល ដែលពួកគាត់មានសីលធម៌ខ្ពស់ និងវិជ្ជាជីវៈពិតប្រាកដ។
លោកឧកញ៉ា លី ហួរ ប្រធានសមាគមអ្នកអភិវឌ្ឍលំនៅស្ថានកម្ពុជា បានឲ្យដឹងថា បច្ចុប្បន្នសមាគមមានសមាជិកសរុប៥៨ក្រុមហ៊ុន សុទ្ធសឹងជាក្រុមហ៊ុនអភិវឌ្ឍលំនៅឋាន និងមានការគាំទ្រយ៉ាងពេញទំហឹងពីអ្នកវិនិយោគ លើវិស័យអចលនទ្រព្យជាតិ និងអន្តរជាតិ ព្រមទាំងរាជរដ្ឋាភិបាលកម្ពុជាផងដែរ។
លោកឧកញ៉ា បានលើកឡើងថា សំណង់លំនៅស្ថាននៅតែជាតម្រូវការយ៉ាងខ្ពស់ទៅថ្ងៃអនាគត ដូច្នេះសមាគមក៏ត្រូវតែបន្តការខិតខំទៅមុខយូរអង្វែង និងបន្តពង្រីកសក្តានុពលរបស់ខ្លួន ឈរលើចក្ខុវិស័យនិងទិសដៅវែងឆ្ងាយ ក្នុងការចូលរួមជាមួយរាជរដ្ឋាភិបាលកម្ពុជា។ សមាគមមានទស្សនវិស័យមួយទៀត គឺលើកកម្ពស់ស្តង់ដារវិស័យអចលនទ្រព្យ នៅកម្ពុជាឲ្យកាន់តែខ្ពស់ដោយមិនមែនផ្តោតសំខាន់ លើតែសំណង់លំនៅស្ថានឬបុរីប៉ុណ្ណោះទេ តែក៏ផ្តោតលើអគារខុនដូ មជ្ឈមណ្ឌលពាណិជ្ជកម្ម អគារទំនើបខ្ពស់ៗជាសំខាន់ ព្រោះថាអគារខ្ពស់ៗទាំងនោះ គឺជាប៉ូលដ៏សំខាន់នៃទំនាក់ទំនងសេដ្ឋកិច្ចពាណិជ្ជកម្មកម្ពុជា ជាមួយពាណិជ្ជកម្មអន្តរជាតិ និងដើរតួនាទីយ៉ាងសំខាន់ ក្នុងការធ្វើសេវាពាណិជ្ជកម្មអន្តរជាតិ ព្រមទាំងចូលរួមចំណែកលើកស្ទួយកំណើនសេដ្ឋកិច្ចជាតិផងដែរ។ ដោយឈរលើភាពរីកចម្រើននៃវិស័យអភិវឌ្ឍលំនៅស្ថានឥតឈប់ឈរ ដែលជាផ្នែកមួយនៃឆ្អឹងខ្នងសេដ្ឋកិច្ចជាតិនោះ សមាគមបានរួមចំណែកអភិវឌ្ឍវិស័យអចលនទ្រព្យ មិនថានៅរាជធានីភ្នំពេញទេ សូម្បីតែនៅតាមបណ្តាខេត្តផងដែរ ដោយបានប្រែក្លាយដី ឲ្យមានតម្លៃពោរពេញ ទៅដោយសំណង់អគារទំនើប បុរីលំនៅស្ថាន មជ្ឈមណ្ឌលពាណិជ្ជកម្ម អគារការិយាល័យ ផ្សារទំនើបនិងសំណង់បែបទំនើបៗ មានបណ្តាញហេដ្ឋារចនាសម្ព័ន្ធ បណ្តាញផ្លូវ បណ្តាញទឹកនិងមានប្រព័ន្ធអគ្គិសនី លើកកម្ពស់ជីវភាពរស់នៅ របស់ប្រជាពលរដ្ឋបានសមរម្យ ផ្តល់ឲ្យពួកគាត់មានការងារធ្វើ រួមចំណែកជួយដល់រាជរដ្ឋាភិបាលតាមរយៈការបង់ពន្ធ ជំរុញកំណើនសេដ្ឋកិច្ចជាតិ និងលើកកម្ពស់កិត្តិយសកិត្យានុភាពជាតិកម្ពុជា ចំពោះអន្តរជាតិផងដែរ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលអន្តរជាតិ ទទួលស្គាល់ថាកម្ពុជា មានសន្តិភាពស្ថេរភាព និងការអភិវឌ្ឍលើគ្រប់វិស័យគួរជាទីមោទនៈ៕ដោយ៖កូឡាប
