ភ្នំពេញ៖ យោងតាមសំណើរបស់ភាគីកម្ពុជា ស្នើសុំជាហិរញ្ញប្បទានក្នុងទឹកប្រាក់ប្រមាណជាង២០លានដុល្លារនោះ ឥឡូវសំណើនេះរាជរដ្ឋាភិបាលជប៉ុន បានសម្រេចផ្តល់ជាជំនួយឥតសំណងវិញ ដើម្បីជួយអភិវឌ្ឍន៍វិស័យទឹកស្អាតរាជធានីភ្នំពេញ ខណៈរាជធានី ត្រូវបានពង្រីកវិសាលភាពផ្ទៃដីរដ្ឋបាលកាន់តែធំឡើង។
នៅព្រឹកថ្ងៃអង្គារទី១០ ខែមីនា ឆ្នាំ២០២០ លោកកិត្តិសេដ្ឋាបណ្ឌិតចម ប្រសិទ្ធ ទេសរដ្ឋមន្រី្ត រដ្ឋមន្ត្រីក្រសួងឧស្សាហកម្មនិងសិប្បកម្មបានទទួលជួបពិភាក្សាការងារជាមួយលោក MIKAMI Masahiro ឯកអគ្គរាជទូតជប៉ុនប្រចាំកម្ពុជា នៅទីស្តីការក្រសួង ក្នុងគោលបំណងនៃជំនួបពិភាក្សា ដៃគូសន្ទនា បានផ្តោតការយកចិត្តទុកដាក់ទៅលើការអភិវឌ្ឍន៍វិស័យទឹកស្អាតនៅកម្ពុជា។
ដែលក្នុងឱកាសនោះ លោក MIKAMI Masahiro ឯកអគ្គរាជទូតជប៉ុនប្រចាំកម្ពុជា បានជម្រាបជូនដំណឹងដ៏ល្អថា៖ គម្រោងពង្រីក
សមត្ថភាពប្រព័ន្ធផ្គត់ផ្គង់ទឹកស្អាត ភូមិព្រែក ក្រុងភ្នំពេញ ដែលភាគីកម្ពុជា ស្នើសុំជាហិរញ្ញប្បទានក្នុងទឹកប្រាក់ប្រមាណជាង២០លានដុល្លារសហរដ្ឋអាមេរិកនោះ ឥឡូវសំណើនេះរាជរដ្ឋាភិបាលជប៉ុន បានសម្រេចផ្តល់ជាជំនួយឥតសំណងវិញ ដើម្បីជួយអភិវឌ្ឍន៍វិស័យ ទឹកស្អាតរាជធានីភ្នំពេញ ដែលកំពុងរីកលូតលាស់ ជាពិសេស ស្របពេលដែលរាជធានី ត្រូវបានពង្រីកវិសាលភាពផ្ទៃដីរដ្ឋបាលកាន់តែធំឡើង ។
ក្នុងនោះ លោកឯកអគ្គរាជទូតជប៉ុន ក៏បានបង្ហាញនូវការចាប់អារម្មណ៍ការអភិវឌ្ឍន៍វិស័យទឹកស្អាត តាមទីប្រជុំជន និងតំបន់ជនបទស្របតាមទស្សនវិស័យ របស់ក្រសួងឧស្សាហកម្ម និងសិប្បកម្មផងដែរ ។
លោកទេសរដ្ឋមន្ត្រី ចម ប្រសិទ្ធ បានថ្លែងថា រាជរដ្ឋាភិបាលនិងប្រជាជនជប៉ុន ដែលតាំងពីដើមរៀងមក បានផ្តល់ជំនួយចូលរួមចំណកយ៉ាងសំខាន់ ក្នុងដំណើរការអភិវឌ្ឍន៍សេដ្ឋកិច្ច សង្គមនៅកម្ពុជា ។ ដោយឡែកលើវិស័យទឹកស្អាតប្រទេសជប៉ុនបានដើរតួយ៉ាងសំខាន់ ដែលធ្វើឲ្យប្រជាពលរដ្ឋកម្ពុជា ដែលទទួលបានទឹកស្អាតប្រើប្រាស់តែងនឹកឃើញដល់មិត្តជប៉ុន ជាពិសេសនៅរាជធានីភ្នំពេញ និងនៅតាមបណ្តាខេត្តធំៗ សំខាន់ៗជាច្រើន ដូចជា៖ខេត្តសៀមរាប បាត់ដំបង កំពង់ធំ ពោធិ៍សាត់ កំពង់ចាម កណ្តាល ជាដើម។ លោកទេសរដ្ឋមន្ត្រី បានបញ្ជាក់ថា៖ កម្ពុជាពិតជានៅត្រូវការការអភិវឌ្ឍន៍វិស័យទឹកស្អាតនេះ បន្ថែមទៀត និងរីករាយក្នុងការទទួលជំនួយឥតសំណង ជំនួយហិរញ្ញប្បទាន និងការវិនិយោគទ្រង់ទ្រាយធំ ដើម្បីផលិតលក់ដុំបន្តដល់អាជីវករលក់រាយ ។ ពីព្រោះទស្សនវិស័យរបស់ក្រសួង បានគិតគូរមិនត្រឹមតំបន់រាជធានីភ្នំពេញ ដែលកំពុងរីកដែនដីរដ្ឋបាលរបស់ខ្លូន និងតំបន់ទីប្រជុំជនប៉ុណ្ណោះទេ តែយើងក៏ត្រូវគិតដល់ការអភិវឌ្ឍវិស័យទឹកស្អាតដល់ទីជនបទតាមគ្រប់លទ្ធភាព ដើម្បីសម្រេចបាននូវគោលនយោបាយ ស្តីពីទឹកស្អាតរបស់រាជរដ្ឋាភិបាលផង និងគោលដៅអភិវឌ្ឍប្រកបដោយនរន្តរភាពរបស់អង្គការសហប្រជាជាតិ ដែលកំណត់យកឆ្នាំ២០៣០ ប្រជាពលរដ្ឋសាកលនឹងទទួលបានទឹកស្អាតប្រើប្រាស់គ្រប់គ្នា ។
ក្នុងជំនួបនោះ ភាគីទាំងពីរក៏បាន ពិភាក្សាគ្នាអំពីជំនួយអភិវឌ្ឍន៍វិស័យទឹកស្អាត នៅខេត្តស្វាយរៀងផងដែរ៕ ដោយ៖កូឡាប