ខេត្តស្វាយរៀង៖ មហាជនបានអំពាវនាវសូមឲ្យអាជ្ញាធរស្រុកខេត្ត និងមន្ទីរពាក់ព័ន្ធព្រះមេត្តាចុះពិនិត្យមើល អ្នកមានទ្រព្យម្នាក់បានជីករណ្តៅដីជ្រៅ ដល់ក្បាលប្រែត្រយកអាចម៍ដី ទៅចាក់លប់ដីចំណីព្រែកទន្លេវ៉ៃគោ ត្រង់ចំណុចស្ពានអូស្មាច់ស្ថិតនៅភូមិតាស្អាង ឃុំកំពង់ចម្លង ស្រុកស្វាយជ្រំ ធ្វើជាកម្មសិទ្ធិធ្វើឲ្យប៉ះពាល់ផ្លូវទឹក និងអាចលិចលំនៅឋាន របស់ប្រជាពលរដ្ឋនៅរដូវវស្សា។
មហាជនធ្វើការអំពាវនាវនេះ កើតឡើងនៅរសៀលថ្ងៃទី១១មីនាឆ្នាំ២០២០ នៅភូមិតាស្អាង ឃុំកំពង់ចម្លង ស្រុកស្វាយជ្រំ។
បើតាមឈ្មោះសែន សារ៉ាត់ ភេទប្រុស អះអាងថា ជាមេការមើលការខុសត្រូវកន្លែងចាក់ដីនោះ បានឲ្យដឹងថា ម្ចាស់ចាក់ដីលប់ចំណីព្រែកដៃទន្លេវ៉ៃគោ ត្រង់ចំណុចអូស្មាច់នេះឈ្មោះទេពចំរើន សាមឌី ជានាយទាហ៊ានថ្នាក់ឧត្តមសេនីយ៍ នៅរាជធានីភ្នំពេញ។
ប្រភពដដែលបន្តទៀតថា ដីដែលនៅតាមមាត់ព្រែកដៃទន្លេវ៉ៃគោនេះ លោកទេពចំរើនសាមឌី ប្រមូលទិញពីប្រជាពលរដ្ឋនៅភូមិតាស្អាង ហើយបានប្រគល់ប្រាក់ឲ្យប្រជាពលរដ្ឋអស់ហើយ។ ចំណែកការជីករណ្តៅយកអាចម៍ដី គឺជីកនៅលើរណ្តៅចាស់ ហើយយកអាចម៍ដីចាក់លើភ្លឺរណ្តៅចាស់ផង ដើម្បីអភិវឌ្ឍន៍ធ្វើជារមណីយដ្ឋានផ្ទះទឹក ឬខ្ចូសលក់ដូរ ហើយអាចម៍ដីមួយផ្នែកទៀត ចាក់លើដីចាស់ដែលបានចាក់កាលពីឆ្នាំមុន ដែលបានសុំច្បាប់ពីអាជ្ញាធរ និងមន្ទីរពាក់ព័ន្ធអនុញ្ញាតរួចហើយ។
ប្រភពដដែលបានបន្តថាៈ ចំពោះប្រជាពលរដ្ឋភូមិតាស្អាងព្រួយបារម្ភ ខ្លាចបិទអូរផ្លូវទឹកលិចលំនៅឋានពួកគាត់ នៅរដូវវស្សានោះ គឺលោកបានទុកអូរស្មាច់នេះ ហើយនិងកាយដីជាប្រឡាយក្នុងអូរ ឲ្យបានជ្រៅមានផ្លូវទឹកហូមិនឲ្យស្ទះផ្លូវទឹកទេ។
ទាក់ទិនករណីខាងលើនេះដែរ លោកវហែម សារិទ្ធិ អភិបាលស្រុកស្វាយជ្រំ បានមានប្រសាសន៍ថា បញ្ហានេះលោកនឹងសួរទៅលោកប្រធានមន្ទីរធនធានទឹក និងឧតុនិយមខេត្តស្វាយរៀង ថាតើប៉ះពាល់ដីព្រែក សាធារណៈដែរឬយ៉ាងណា? ហើយលោកនិងចុះទៅពិនិត្យមើល និងរាយការណ៍ជូនឯកឧត្តមអភិបាលខេត្ត។ រីឯលោកគឹម សាវុធ ប្រធានមន្ទីរធនធានទឹកនិងឧតុនិយមខេត្តស្វាយរៀង បានឲ្យដឹងថា ការចាក់ដីនៅចំណុចជិតស្ពានអូស្មាច់ភូមិតាស្អាងនេះ គឺបានចាក់លើចំណីព្រែកនិងក្នុងព្រែកនៃដៃទន្លេវ៉ៃគោ ពិតប្រាកដមែន ហើយលោកបានរាយការណ៍ ជូនឯកឧត្តមអភិបាលរងខេត្ត ទទួលបន្ទុកដើម្បីពិនិត្យដោះស្រាយ។ លោកអភិបាលខេត្តស្វាយរៀង បានឲ្យម្ចាស់អ្នកចាក់ដីផ្អាកការងារចាក់ដីសិន និងបង្កើតគណៈកម្មការចុះពិនិត្យ និងធ្វើការវាស់វែង ពីផលប៉ះពាល់ក៏ប៉ុន្តែដំណើរការ នៃការងារចុះវាស់វែងមានលទ្ធផលឬដល់ណានោះទេ។
លោកគឹម ពិសិដ្ឋ ប្រធានមន្ទីររៀបចំដែនដីនគរូបនីយ៍កម្មសំណង់ និងសុរិយោដីខេត្ត បានមានប្រសាសន៍ថា លោកមិនបានដឹងបញ្ហាចាក់ដី លុបព្រែកអូរស្មាច់នេះទេ ហើយអ្នកចាក់ដីនោះមានប័ណ្ណ ឬបានចុះបញ្ជីដីជាលក្ខណៈប្រព័ន្ធហើយ ក៏លោកមិនអាចដឹងបានដែរ សូមឲ្យសួរទៅមន្ត្រីសុរិយោដីស្រុកស្វាយជ្រំ ដែលជាអ្នកចុះវាស់វែង ជាមួយគណៈកម្មការរដ្ឋបាលតំបន់វិនិច្ឆ័យ ភូមិតាស្អាងទើបច្បាស់។
បើតាមមន្ត្រីសាលាខេត្តម្នាក់ សុំមិនបញ្ចេញឈ្មោះបានឲ្យដឹងថា ឯកឧត្តមអភិបាលខេត្ត បានចេញបញ្ជាឲ្យផ្អាកការចាក់ដី និងជីករណ្តៅយកអាចម៍ដីទៀត ហើយបានផ្អាកមួយរយៈដែរ មិននឹកស្មានថា ពួកគេហ៊ានផ្គើនបែបនេះទេ។
បើតាមមន្រ្តីជំនាញម្នាក់បានបង្ហើបឲ្យដឹងថា ការចាក់ដីលុបព្រែកនិងចំណីព្រែកដៃទន្លេវ៉ៃគោនេះគឺមានទំហំប្រមាណ៤ហិកតា ចាប់ពីគល់ស្ពានអូរស្មាច់ ទៅដល់ផ្ទះអ្នកភូមិតាស្អាង គឺមានប្រវែងជាង៧០០ម៉ែត្រមានទទឹងជិត២០០ម៉ែត្រមានរណ្តៅដី ចំនួន៤រណ្តៅជីកដល់ក្បាលប្រែត សូមលោកប្រធានមន្ទីររ៉ែនិងថាមពលខេត្ត ចុះទៅមើលផងទាន។ ទាក់ទិនករណីនេះដែរ មិនអាចសុំការបំភ្លឺពីលោកទេពចំរើន សាមឌី បានទេ នាព្រឹកថ្ងៃទី១២មីនាឆ្នាំ២០២០នេះ៕ដោយ៖វ៉ៃកូ