ជាការពិតណាស់ យើងទាំងអស់គ្នា ធ្លាប់តែបានដឹងថា កសិករ ឬ ម្ចាស់កសិដ្ឋានចិញ្ចឹមជ្រូកជាច្រើន ចិញ្ចឹមជ្រូកយកសាច់ តាមរយៈវិធីសាស្ត្រ បច្ចេកទេសចិញ្ចឹមផ្សេងៗ ដើម្បីឆាប់ឲ្យជ្រូកធំធាត់លក់ទៅកាន់ទីផ្សារក្នុងរយៈពេលដ៏ខ្លីតែប៉ុន្មានប៉ុណ្ណោះ ។ ប៉ុន្តែ នាពេលនេះ យើងពិតមានការភ្ញាក់ផ្អើលជាខ្លាំង នៅពេលដឹងថា កសិករម្នាក់បានចែករំលែកឲ្យដឹងពីរបៀបទិញគោស្គមៗមកបំប៉នតែរយៈពេល៣ខែ ដោយធ្វើតាមវិធីសាស្ត្រមួយនេះ នោះគោស្គមនឹងឆាប់ឡើងសាច់ លក់ចេញវិញចំណេញកប់ក្តោង ។
ជាក់ស្តែង លោក ឡេង គឹមហួរ ម្ចាស់កសិដ្ឋានចិញ្ចឹមគោយកសាច់លក់ នៅក្នុងខេត្តកំពង់ធំ បានប្រាប់ឲ្យដឹងថា ពីមុនឡើយ ការចិញ្ចឹមគោភាគច្រើន មានតែតាមរបៀបបុរាណប៉ុណ្ណោះ ពោលគឺគ្រាន់តែឱ្យចំប៉ើង និងស្មៅឱ្យស៊ីធម្មតា ហេតុនេះ របរចិញ្ចឹមគោលក់ទៅតាមធម្មជាតិនេះ ពុំសូវមានអ្នកចាប់អារម្មណ៍នោះទេ ព្រោះវាត្រូវការពេលវេលាយូរឆ្នាំ ទម្រាំបានគោ១ក្បាលលក់ម្តងៗ ។
ប៉ុន្តែ លោកបានបង្ហើបថា ប្រសិនបើចិញ្ចឹមគោធ្វើតាមវិធីសាស្ត្រនេះរបស់គាត់វិញ គឺងាយនឹងទទួលបានផលគួរជាទីមោទនៈ ដោយលោកអ្នកចិញ្ចឹមគោនៅក្នុងរោងដែលបិទជិតត្រឹមត្រូវ និងមានស្មៅដាំជាមួយនឹងចំប៉ើងផ្អាប់ និងព្រមទាំងមានការលាងទឹក និងចាក់ថ្នាំទម្លាក់មេរោគទៅតាមបច្ចេកទេសប៉ុណ្ណោះ នោះក្នុងរយៈពេលប្រមាណជិត ៣ឆ្នាំ គាត់អាចកែប្រែគោចំនួន ២ក្បាល មកក្លាយជាកសិដ្ឋានចិញ្ចឹមគោមួយកន្លែង ដែលមានគោប្រមាណជិត ១០០ក្បាលឯណ្ណោះ។
អ្នកជោគជ័យចិញ្ចឹមគោរូបនេះ ក៏បានបង្ហើបឲ្យដឹងទៀតថា ក្នុងមួយឆ្នាំៗ គាត់អាចលក់គោចេញប្រមាណជាង ១០០ក្បាលឯណ្ណោះ ដោយសារគាត់ប្រើវិធីចិញ្ចឹមបែបថ្មីនេះ តាមរយៈការទិញគោស្គមៗពីអ្នកភូមិ យកមកថែបំប៉ុនក្នុងរយៈពេល ៣ខែ មុននឹងលក់ចេញទៅឱ្យគេវិញ ចំណេញកប់ក្តោងតែម្តង ៕ ដោយ៖ លឹម ហុង
