លោកតាព្រះនាម ស៊ុច ណាណា គឺជាព្រះសង្ឃវ័យចំណាស់មួយអង្គ កំពុងគង់នៅវត្តមួយនៅក្នុងខេត្តសុរិន្ទ ប្រទេសថៃ ។ ព្រះអង្គត្រូវបានដឹងថា មានទឹកចិត្តសប្បុរសធម៌ ដែលទទួលបានការគោរពស្រឡាញ់យ៉ាងខ្លាំង ពីសំណាក់ពុទ្ធបរិស័ទទាំងនៅក្នុងប្រទេសថៃ និងកម្ពុជា ។
ថ្មីៗនេះ ប្រទេសថៃបានប្រកាសបិទព្រំដែនរបស់ខ្លួន និងកម្ពុជា និងក៏ដូចប្រទេសជិតខាងដទៃទៀត ដើម្បីការពារការរីករាលដាលនៃវីរុសកូវីដ-១៩ ។ ហេតុនេះហើយ បានធ្វើឲ្យពលករខ្មែរមួយចំនួនដែលទៅធ្វើការនៅប្រទេសថៃ មិនអាចឆ្លងដែនមកស្រុកកំណើតទាន់ពេលវេលា ដោយត្រូវជាប់គាំងនៅឯច្រកព្រំដែនតែម្តង។
ដើម្បីជួយដោះស្រាយស្ថានការណ៍ដ៏លំបាកនាពេលនេះ លោកតា ស៊ុច បានឡាយវីដេអូប្រកាសដោយផ្ទាល់ថា ប្រសិនបើបងប្អូនខ្មែរដែលទើបចេញពីមន្ទីរពេទ្យក្តី ឬ ជាពលករក្តីទាំងអស់ ដែលកំពុងជាប់គាំងនៅព្រំដែន ហើយមិនដឹងថានឹងទៅស្នាក់អាស្រ័យនៅឯណាបាន ឬ ខ្វះការហូបចុក គឺអាចមកស្នាក់នៅក្នុងវត្តរបស់លោកតាបាន ដោយទីអារាមរបស់លោកតាអាចផ្ទុកមនុស្សបាន ២០០ ឬ ៣០០ នាក់ ផងដែរ។
សូមអរគុណ! ចំពោះទឹកចិត្តប្រកបដោយមេត្តាធម៌របស់លោកតា ស៊ុច ដែលតែងតែស្រឡាញ់ខ្មែរ និងសូមប្រគេនពរលោកតាមានសុខភាពល្អ ព្រះជន្មវែង ដើម្បីជាតិខ្មែរ និងសាសនាបន្តទៀត ៕ ដោយ៖ លឹម ហុង
