ភ្នំពេញ៖ ជនសង្ស័យប្រុសស្រីចំនួន៤នាក់ ត្រូវបានកំលាំងនគរបាលប៉ុស្តិ៍កន្ទោក នៃអធិការខណ្ឌនគរបាលពោធិ៍សែនជ័យ ធ្វើការបង្ក្រាបនិងឃាត់ខ្លូន ក្រោយពីឆែកឆេររកឃើញថ្នាំញៀនចំនួន១កញ្ចប់ធំ និង១៦កញ្ចប់តូច លាក់នៅក្នុងឌុយអំពូលភ្លើង ។
ហេតុការណ៍នេះនៅវេលាម៉ោង០០និង៤០ឈានចូលថ្ងៃទី១៨ មករា២០១៨នាទី ចំណុចហាងម៉ាស្សាមួយកន្លែង ក្នុងបុរីពិភពថ្មី កំបូល ស្ថិតក្នុងភូមិត្រពាំងគល់ សង្កាត់កន្ទោក ខណ្ឌពោធិ៍សែនជ័យ។
សមត្ថកិច្ចបានឲដឹងថា មុនពេលឃាត់ជនសង្ស័យនិងវត្ថុតាង គឺកំលាំងនគរបាលប៉ុស្តិ៍បានល្បាតក្នុងបុរីពិភពថ្មីកំបូលស្ថិតក្នុងភូមិត្រពាំងគល់ សង្កាត់កន្ទោក ក៏ឃើញមនុស្សប្រុស២នាក់ជិះម៉ូតូចូលក្នុងផ្ទះម៉ាស្សាកោសជប់ រស្មី ពេលនោះកំលាំងមានការសង្ស័យ ទើបចូលទៅសុំម្ចាស់ហាងធ្វើការត្រួតពិនិត្យឆែកឆេរនៅបន្ទប់ម៉ាស្សាជាន់ទី១ ពេលនោះឃើញមនុស្សប្រុសម្នាក់និងស្រីម្នាក់ បន្ទាប់មកកំលាំងបានធ្វើការឆែកឆេរ ក៏ប្រទៈឃើញ ឌុយអំពូកភ្លើងនៅក្នុងបន្ទប់ទឹក ក៏បើកមើលក្នុងឌុយអំពូកភ្លើងនោះ ឃើញក្រាមពណ៍សថ្លាចំនួន១កញ្ចប់ធំ និង១៦កញ្ចប់តូច។ក្រោយមកសមត្ថកិច្ចយើងបានឃាត់ខ្លួនចំនួន៤នាក់ រួមនិងវត្ថុតាងមកសួរនាំនៅប៉ុស្តិ៍តែម្តង។
សមត្ថកិច្ចបានបន្តឲដឹងថា ជនសង្ស័យទី១មានឈ្មោះ ស ផល្លីភេទប្រុសមុខរបរលាងម៉ូតូ ស្នាក់នៅភូមិត្រពាំងគល់ ស្ថិតសង្កាត់កន្ទោក ខណ្ឌពោធិ៍សែនជ័យ។(ម្ចាស់ថ្នាំ) ជនសង្ស័យទី២មានឈ្មោះ ខាន់ សុខរិន ភេទស្រីអាយិ១៩ឆ្នាំ មុខរបរនារីម៉ាស្សា ស្នាក់នៅផ្ទះ ជួលភូមិអង្គស្នួល ឃុំពើក ស្រុកអង្គស្នួល ខេត្តកណ្តាល ។ជនសង្ស័យទី៣មានឈ្មោះ ង៉ែត ពន្លឺ ភេទប្រុសអាយុ២៥ឆ្នាំ មុខរបរជាងកាត់សក់ ស្នាក់នៅផ្ទះជួល ភូមិអង្គស្នួល ឃុំពើក ស្រុកអង្គស្នួល ខេត្តកណ្តាល ។ជនសង្ស័យទី៤មានឈ្មោះ ហេង ពន្លឺ អាយុ១៨ឆ្នាំ មុខរបរមិនពិត ស្នាក់នៅភូមិត្រពាំងក្រសាំង ឃុំបែកចាន ស្រុកអង្គស្នួល។
បច្ចុប្បន្នជនសង្ស័យរួមនិងវត្ថុតាង ត្រូវបានកំលាំងប៉ុស្តិ៍កសាងសំណុំរឿងបញ្ចូនជនសង្ស័យមកកាន់ផ្នែកជំនាញប្រឆាំងគ្រឿងញៀននៃអធិការខណ្ឌដើម្បីអនុវត្តបន្ត តាមនិតិវិធីច្បាប់៕ ដោយ៖បញ្ញាស័ក្តិ
