ក្រចេះ៖បង្ក្រាបបទល្មើសគ្រឿងញៀន នៅក្នុងភូមិចង្ក្រង់ ឃុំចង្ក្រង់ ស្រុកចិត្របុរី ខេត្តក្រចេះ បានឃាត់ខ្លួនជនសង្ស័យម្នាក់ឈ្មោះ ខាន់ វុទ្ធី ហៅអាឆក ដកហូតថ្នាំញៀនជាង១គីឡូក្រាមនិងកាំភ្លើងខ្យល់១ដើម នៅថ្ងៃ១៧ ខែមករា ឆ្នាំ២០១៨។ ប្រតិបត្តិការ ចុះបង្ក្រាបមុខសញ្ញាជួញដូរគ្រឿងញៀនទ្រុងទ្រាយធំនេះ ក្រោមការសម្របសម្រួលនិតិវិធីពី សំណាក់លោក សោ វុទ្ធី ព្រះរាជអាជ្ញារងសាលាដំបូងខេត្តក្រចេះ។
ជនសង្ស័យម្នាក់ ឈ្មោះ ខាន់ វិទ្ធី ហៅអាឆក ភេទប្រុស អាយុ ៣២ឆ្នាំ ជនជាតិខ្មែរ មានទីលំនៅ ភូមិថ្មគ្រែកណ្តាល ឃុំថ្មគ្រែ ស្រុកចិត្របុរី ខេត្តក្រចេះ ជាមុខសញ្ញាជួញដូរសកម្ម។ ដកហូតបានវត្ថុតាង ម្សៅក្រាម ពណ៌សថ្លា សង្ស័យជាសារធាតុញៀនប្រភេទ មេតំហ្វេតាមីន (ICE) សរុបចំនួន ១០កញ្ចប់ (ធំ៣កញ្ចប់ និងមធ្យម ៧កញ្ចប់) ស្នើនឹងជាង១គីឡូក្រាម ដកហូតកាំភ្លើងខ្យល់មួយដើម ម៉ាក MI9IIAI លេខ៨៧១០៧២ ម៉ូតូ១គ្រឿង ទូរស័ព្ទដៃ១គ្រឿង និងប្រាក់ចំនួន ៥០០០០០រៀល។ សមត្ថកិច្ច បាន នាំខ្លួនជនសង្ស័យឈ្មោះ ខាន់ វិទ្ធី ទៅឆែកឆេរបន្ទប់ស្នាក់នៅផ្ទាល់ខ្លួន ក្នុងផ្ទះរបស់ឈ្មោះ ប៉ាវ សូលីន បងស្រីជនសង្ស័យស្ថិតនៅភូមិថ្មគ្រែកណ្តាល ឃុំថ្មគ្រែ ស្រុកចិត្របុរី ខេត្តក្រចេះ ឆែកឆេររកឃើញម្សៅក្រាមពណ៌សថ្លា សង្ស័យជាសារធាតុញៀន ប្រភេទមេតំហ្វេតាមីន (ICE) សរុបចំនួន២កញ្ចប់ធំ លាក់ទុកក្នុងទូក្បាលគ្រែបន្ថែមទៀត៕ ដោយ៖បញ្ញាស័ក្តិ
