ស្ទឹងត្រែង រតនគិរី៖ ប្រជាពលរដ្ឋ ជាជនជាតិដើមភាគតិច ភ្នង នៅឃុំក្បាលរមាស ស្រុកសេសានខេត្តស្ទឹងត្រែង បានធ្វើពិធីបុណ្យបិទភូមិ តាំងពីថ្ងៃទី 23 ខែមីនា ដល់ថ្ងៃទី 30 ខែមីនាឆ្នាំ 2020 ដើម្បីការពារ កូវីដ 19 និងជាប្រពៃណីជនជាតិដើមភាគតិច ករណីមានអ្នកចេញចូល ត្រូវផាកពិន័យ។ ចំណែកឯឃុំប៉ាតេ ស្ថិតក្នុងស្រុកអូរយ៉ាដាវ ខេត្តរតនគិរី ត្រូវបានប្រកាសបិទការចេញចូលតាំងពីថ្ងៃទី២១ ខែមីនា ដើម្បីការពារ និងទប់ស្កាត់ការឆ្លងរាលដាលជំងឺកូវីដ-១៩នេះដែរ។
អ្នកភូមិ ជនជាតិភាគតិច ភ្នង នៅឃុំក្បាលរមាស បានឲ្យដឹងថា អ្នកណាជួបភូមិរបស់គាត់ ដែលកំពុងបិទ រយៈពេល ៧ ថ្ងៃនេះ គឺមាន ការផាកពិន័យ ៧០ ម៉ឺនរៀល ដោយឡែក ចំពោះអ្នកឈឺធ្ងន់ អាចចេញពីភូមិទៅព្យាបាលបាន តែមិនឲ្យចូលភូមិបានទេ ក្នុងរយៈពេល ៧ ថ្ងៃនេះ នេះជាវិធានការ របស់មេកន្ទ្រាញភូមិ ដែលរៀបចំជាប្រពៃណី ទំនៀមទម្លាប់ តាំងពីយូរលង់ណាស់មកហើយ បើសិនជាមានជំងឺឈឺថ្កាត់ ចម្លែក ភូមិរបស់គាត់ ត្រូវតែមានពិធី បិទភូមិ មិនឱ្យមានការចេញចូលទេ ដោយមានការសែនព្រេន និងដាក់រូបទីងមោង ដើម្បីសម្គាល់ថា ភូមិរបស់គាត់ បិទមិនឲ្យអ្នកចូលនឹងអ្នកចេញ កាលពីដើម មិនមាន ការផាកពិន័យ ជាលុយឡើយ គឺមានការផាកពិន័យ ជាប្រភេទគោ ក្របី និងស្រាពាង តែឥឡូវ បានផ្លាស់ប្ដូរ ការផាកពិន័យជាគោក្របី ស្រាបៀង មកជាលុយវិញ។
ចំណែកករណីជំងឺឆ្លងវីរុសកូវីដ១៩នេះដែរ នៅឃុំប៉ាតេ ស្ថិតក្នុងស្រុកអូរយ៉ាដាវ ខេត្តរតនគិរី ត្រូវបានប្រកាសបិទការចេញចូលតាំងពីថ្ងៃទី២១ ខែមីនា ដើម្បីការពារ និងទប់ស្កាត់ការឆ្លងរាលដាលជំងឺកូវីដ-១៩។ លោកឆាយ ធី មេឃុំប៉ាតេ បានថ្លែងថា ការបិទឃុំនេះ អាជ្ញាធរឃុំហាម មនុស្សប្លែកមុខចេញចូល ឬ ប្រាស្រ័យទាក់ទងជាមួយ ប្រជាពលរដ្ឋនៅក្នុងឃុំរបស់លោក។ ប៉ុន្តែ ការរកស៊ីជួញដូរ គឺមិនមានការរឹតបន្តឹងអ្វីទេ ដោយអាចរកស៊ីបានដូចធម្មតា។
លោកឆាយ ធី បានបញ្ជាក់ថា ការបិទឃុំប៉ាតេនេះ គឺមិនមានពេលកំណត់នោះឡើយ គឺនឹងបើកការចេញចូលធម្មតាឡើងវិញ ពេលណាជំងឺកូវីដ-១៩ ត្រូវបានទប់ស្កាត់បាននៅក្នុងប្រទេសកម្ពុជា។ ក្នុងនោះបណ្តាភូមិទាំង៤ អាជ្ញាធរមូលដ្ឋាន ដាក់ពង្រាយអ្នកយាម ដោយមានការចូលរួមផងដែរ ពីសំណាក់ពលរដ្ឋស្ម័គ្រចិត្ត ហើយពួកគាត់ជួយដើរពន្យល់អ្នកភូមិ និងអ្នកចំណូលថ្មីអំពីបញ្ហា COVID-19។
បើតាមលោកមេឃុំប៉ាតេ ការធ្វើបែបនេះ គឺជាការបង្ការ អំឡុងពេលរីករាល់ដាល Covid-19 ប៉ុណ្ណោះ៕ដោយ៖បញ្ញាស័ក្តិ
