សៀមរាប៖ ម្ចាស់ផ្ទះជួលមួយកន្លែងនៅក្នុងខេត្តសៀមរាប បានធ្វើឲ្យបងប្អូនមហាជននៅក្នុងបណ្តាញសង្គម បង្ហាញនូវការកោតសរសើរជាខ្លាំង ចំពោះទឹកចិត្តដ៏កម្ររបស់ពួកគាត់ ដែលបានសម្រេចចិត្តមិនយកថ្លៃបន្ទប់ជួលចំនួន ៣ ខែ សម្រាប់បងប្អូនជាអ្នកស្នាក់នៅបន្ទប់ជួលទាំងអស់ចំនួន១០បន្ទប់ (ចាប់ពីខែនេះទៅ) ដោយសារតែមានការយល់ឃើញថា ពួកគាត់ទាំងអស់មានការធ្លាក់ចុះនៃប្រាក់ចំណូល នៅក្នុងស្ថានភាពមានការផ្ទុះឡើងនៃជំងឺ Covid-19 ដ៏កាចសាហាវនេះ។
នេះបើយោងតាមគណនីហ្វេសប៊ុកឈ្មោះ “ដឺមី សុខាគង់” បានបង្ហោះឲ្យដឹងថា៖ “ជម្រាបសួរពុកម៉ែបងប្អូនទាំងអស់ ខ្ញុំបាទព្រមទាំងក្រុមគ្រួសារដែរជាម្ចាស់ផ្ទះមួយមានបន្ទប់ជួលចំនួន១០បន្ទប់ ដែរមានបងប្អូនស្នាក់នៅគ្រប់បន្ទប់ទាំងអស់ នៅភូមិសាលាកន្សែងឃុំសាលាកន្សែងស្រុកសៀមរាបខេត្តសៀមរាប ដោយសារតែមានជំងឺ Covid 19 ដ៏កាចសាហាវនេះ ខ្ញុំបាទជាម្ចាស់ផ្ទះនេះមិនយកថ្លៃបន្ទប់ជួលចំនួន៣ខែដោយចាប់ពីរខែនេះទៅ។ សូមអរគុណ” ។
សូមបញ្ជាក់ថា មកទល់ពេលនេះ ក្រសួងសុខាភិបាលរកឃើញអ្នកជំងឺ COVID-19 ៤នាក់ទៀតបន្ថែមទៀត ដែលនាំឲ្យចំនួនសរុបកើនឡើងដល់ ១០៧ នាក់ និង យើងបានព្យាបាលជាសះស្បើយចំនួន ២នាក់ទៀត(សរុប ២៣នាក់) និងពុំមានអ្នកស្លាប់នោះទេ ៕ ដោយ៖ លឹម ហុង
