តាកែវ៖ ដើម្បីធានាឲ្យបានទៅនឹងក្រមសីលធម៌ ក៏ដូចជាការគោរពគំនាប់របស់មន្ត្រីនគរបាលចរាចរណ៍ផ្លូវគោក ក្នុងពេលចុះប្រតិបត្តិការ និងរឹតបន្តឹងនៅច្បាប់ចរាចរណ៍ផ្លូវគោកថ្មី ដល់បងប្អូនប្រជាពលរដ្ឋនាពេលខាងមុខនេះ លោកសៅ ច័ន្ទសំណាង ប្រធានការិយាល័យរៀបចំសណ្តាប់ធ្នាប់ និងចរាចរណ៍ផ្លូវគោក បានបើកវគ្គហ្វឹកហ្វឺនខ្លីមួយ ដល់មន្ត្រីនគរបាលចរាចរណ៍ នៃស្នងការនគរបាលខេត្តតាកែវ ចំនួន ១០១នាក់ ធ្វើការហ្វឹកហាត់ការគោរពគំនាប់ បញ្ជាចរាចរណ៍នៅលើដងផ្លូវ និងការហាត់របៀបវាយខ្នោះ នៅពេលជួបជាមួយនឹងជនល្មើស ដែលមិនគោរពតាមគោលការណ៍ណែនាំរបស់សមត្ថកិច្ចនគរបាល អោយកាន់តែមានប្រសិទ្ធិភាព ក្នុងការចុះអប់រំដល់ពលរដ្ឋអោយចូលរួមគោរពច្បាប់ចរាចរណ៏ទាំងអស់គ្នា ក្នុងគោលដៅមួយ រួមគ្នាទប់ស្កាត់នៅអាត្រាកើនឡើងនៃគ្រោះថ្នាក់ចរាចរណ៍ ។
លោក សៅ ច័ន្ទសំណាង បានបន្តថាគ្រោះថ្នាក់ចរាចរណ៍ បានបំផ្លិចបំផ្លាញ់នៅទ្រព្យសម្បត្តិរបស់បងប្អូនប្រជាពលរដ្ឋយើង ច្រើនណាស់ មិនតែប៉ុណ្ណោះ ដោយសារតែគ្រោះថ្នាក់ចរចរណ៍ បានបន្សល់ទុកនៅជនពិការភាព សោកនាដកម្ម ក្មេងកំព្រា ស្ត្រីមេម៉ាយ ដែលចំណុចទាំងនេះ សុទ្ធសឹងតែជាមូលហេតុរួមមួយ ដែលកើតឡើងចេញពីការមិនគោរពច្បាប់ចរាចរណ៍ផ្លូវគោក ពីសំណាក់បងប្អូនប្រជាពលរដ្ឋមួយចំនួន ដូច្នេះរាជរដ្ឋាភិបាល បានឲ្យមន្ត្រីនគរបាលចរាចរណ៍ផ្លូវគោកទាំងអស់ ចុះផ្សព្វផ្សាយអនុក្រឹត្យលេខ ៣៩អនក្រ.បក ចុះថ្ងៃទី១៧ ខែមីនា ឆ្នាំ២០២០ ស្តីពីការកែសម្រួលអនុក្រឹត្យលេខ ៤៤អនក្រ.បក ចុះថ្ងៃទី២១ ខែមីនា ឆ្នាំ២០១៧ ស្តីពីការពិន័យអន្តរការណ៍ ចំពោះអំពើល្មើសនឹងច្បាប់ចរាចរណ៍ផ្លូវគោក ។ ហើយច្បាប់ថ្មីនេះដែរ ត្រូវបានដាក់បន្ទុកទៅលើអ្នកដែលល្មើស មិនគោរពតាមច្បាប់ចរាចរណ៍ផ្លូវគោក គឺមានការផាកពិន័យទ្វេដងទៅតាមច្បាប់ ដោយគិតជាទឹកប្រាក់ ដើម្បីឲ្យមនុស្សមួយចំនួន ចូលរួមគោរពច្បាប់ទាំងអស់គ្នា ។
សូមបញ្ជាក់ផងដែរថា បើតាមរបាយការណ៍របស់ស្នងការដ្ឋាននគរបាលខេត្តតាកែវ បានបញ្ជាក់ឲ្យដឹងថា ក្នុងភូមិសាស្ត្រនៃទឹកដីខេត្តតាកែវ មានបងប្អូនប្រជាពលរដ្ឋមួយចំនួនធំ ដែលជាអ្នកប្រើប្រាស់លើការធ្វើដំណើរនៅតាមដងផ្លូវ គិតជាភាគរយ មានចំនួន ៧៥ភាគរយ ហើយដែលចូលរួមគោរពច្បាប់ ដោយឡែកចំពោះពលរដ្ឋចំនួន ២៥ភាគរយទៀត នៅមិនទាន់ចូលរួមគោរពច្បាប់នៅឡើយ ហើយក្នុងនោះដែរ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានធ្វើការអំពាវនាវ ដល់បងប្អូនប្រជាពលរដ្ឋទាំងអស់ ត្រូវគិតពីសុវត្ថិភាពខ្លួនអ្នក គ្រួសាររបស់អ្នក នៅពេលដែលអ្នកទាំងអស់គ្នា កំពុងប្រើប្រាស់ជាមធ្យោបាយធ្វើដំណើរលើដងផ្លូវ មិនថានៅទីណាឡើយ ត្រូវចូលរួមគោរពច្បាប់ចរាចរណ៍ផ្លូវគោកទាំងអស់គ្នា ចៀសវាងការកើតមាននៅគ្រោះថ្នាក់ជាយថាហេតុ ៕ដោយ : តាកែវ