បន្ទាយមានជ័យ ៖ យានដ្ឋានរបស់លោក ឆាយ ឈាន កែច្នៃជួសជុលរថយន្តធំសុខបច្ចេកទេស មិនគោរពកិច្ចសន្យា និងបង្កហានិភ័យដល់ពលរដ្ឋជិតខាង ធ្វើឲ្យខូចបរិស្ថាន សណ្តាប់ធ្នាប់សាធារណៈ មិនគោរពកិច្ចសន្យា នៅថ្ងៃទី៣០ ខែមីនា ឆ្នាំ២០២០ ត្រូវបានមន្ត្រីជំនាញកំណត់ឲ្យមានជម្រើស២ ដើម្បីសម្រេច គឺបើមិនបិទ ក៏ត្រូវប្តូរទីតាំងចេញពីកន្លែងធ្វើសព្វថ្ងៃនេះដែរ។ យានដ្ឋាននេះ ស្ថិតក្នុងភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
លោក គង់ ប៊ុនលឿត បានបញ្ជាក់ឲ្យដឹងថា ដើម្បីឲ្យបានភាពច្បាស់លាស់ ល្អិតល្អន់ មិនលម្អៀង និងការវាយតម្លៃលើការអនុវត្តកិច្ចសន្យា ក៏ដូចផលប៉ះពាល់ពីយានដ្ឋាន ទៅលើពលរដ្ឋនៅជិតខាងជុំវិញ ក៏ដូចជាសាធារណជនឆ្លងកាត់ផងនោះ ជាលទ្ធផលការពិនិត្យវាយតម្លៃជាបន្តបន្ទាប់បានឃើញថា ម្ចាស់យានដ្ឋាននេះ មិនគោរពកិច្ចសន្យាឡើយ ដូចជាច្បាប់សុំអនុញ្ញាតជួសជុលរថយន្តធំ តែបានបន្ថែមទៅកែច្នៃហើយមិនរាយការណ៍ដល់ជំនាញឡើយ ។ កិច្ចសន្យាដទៃទៀត ក៏គោរពមិនបានដែរ ថែមទាំងបានរំលោភ និងប្រើប្រាស់ដីចំណីផ្លូវសម្រាប់ថ្មើរជើង មិនគោរពតាមច្បាប់រដ្ឋកំណត់ ដែលមានតម្លើងតទ្រុង ថែមភ្លៅ ទំហំខុសបទដ្ឋានបច្ចេកទេសមិនការពារបរិស្ថាន ពិសេសការបង្ហូរប្រេងរំអិលចេញក្រៅ បន្តរំខានដល់ការរស់នៅរបស់អ្នកជិតខាង គ្មានបម្រុងទុកឧបករណ៍សុវត្ថិភាព ឧបករណ៍ពន្លត់អគ្គិភ័យ ជាដើម។ កំហុសនេះមិនមែនលើកទី១ទេ គឺមានច្រើនលើកមកហើយ ការចោទប្រកាន់នោះ លោក ឆាយ ឈាន ម្ចាស់យានដ្ឋានបាននិយាយថា លោក និងក្រុមជាងបញ្ចេញស្នៀតដដែលៗ សំណូមពរអង្វរករមន្ត្រីជំនាញ និងអាជ្ញាធរកុំបិទយានដ្ឋានរបស់លោក ព្រោះជីវភាព និងការលំបាករបស់ពួកខ្លួន នឹងធ្លាក់មកលើជាច្រើនទៀត បើបិទយានដ្ឋាននេះ។
ឯមន្ត្រីជំនាញបានប្រាប់ថា ចំពោះករណីនេះ បើមិនបិទ ក៏ត្រូវផ្អាកសកម្មភាព ហើយមិនអាចឲ្យបុគ្គលនេះ ធ្វើផ្គើនម្តងហើយម្តងទៀតនោះឡើយ។
ចំណែកជនរងគ្រោះ អ្នកស្រីប្រាក់ ស៊ីណៃ ម្ចាស់បណ្ណាគារបន្ទាយស្រី បានឲ្យដឹងថា យានដ្ឋានរបស់លោក ឆាយ ឈាន មានការគ្រោះថ្នាក់ ផលវិបាកខូចខាត និងបញ្ហាប្រឈមរបស់អ្នកស្រី ក្រុមគ្រួសារ ក៏ដូចជាទ្រព្យសម្បត្តិ និងរបស់ពលរដ្ឋជិតខាងកើត មានយូរឆ្នាំច្រើនណាស់ពេកហើយ អ្នកស្រី និងពលរដ្ឋជិតខាង បានយោគយល់ អត់ធ្មត់រហូតរងគ្រោះទាំងខ្លួនឯង ក៏នៅតែម្ចាស់ និងក្រុមជាងនៃយានដ្ឋាននោះ មិនដែលយកភ្នែកមើល ហើយយល់ពីទុក្ខលំបាក ការគ្រោះថ្នាក់របស់ពួកអ្នកស្រីឡើយ ។
ទោះយ៉ាងណា អ្នកស្រីបានថ្លែងអំណរគុណ ដល់ថ្នាក់ដឹកនាំ ដល់មន្ត្រីជំនាញ មន្ត្រីអាជ្ញាធរ និងអ្នកពាក់ព័ន្ធ ដែលបញ្ជូនមន្ត្រីមកពិនិត្យ ស្រាវជ្រាវ និងចាត់វិធានការលើករណីនេះ អ្នកស្រីស្នើសុំឲ្យមន្ត្រីជំនាញ និងអាជ្ញាធរចាត់ការបិទ ឬប្តូរទីតាំងយានដ្ឋាននេះ នៅពេលនេះតែម្តង មិនអាចពន្យារពេលឡើយ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ លោក ហ៊ិល រ៉ាយ៉ា អភិបាលក្រុងសិរីសោភ័ណ និងលោក គឹម សុវណ្ណ ប្រធានមន្ទីរសាធារណៈការ និងដឹកជញ្ជូនខេត្ត បានពិភាក្សាគ្នា នៅថ្ងៃទី៣០ ខែមីនា នឹងឲ្យមន្ត្រីជំនាញ និងអាជ្ញាធរចុះពិនិត្យ វាយតម្លៃម្តងទៀត លើការអនុវត្តកិច្ចសន្យា និងស្រាវជ្រាវករណីឧប្បត្តិហេតុនៅយានដ្ឋានរបស់ឈ្មោះ ឆាយ ឈាន ។
សូមរំលឹកថា កាលពីល្ងាចថ្ងៃទី ២១ខែមីនា ឆ្នាំ២០២០ មានគ្រោះថ្នាក់មួយលើកទៀត ដែលបង្កពីរថយន្ដធំ១គ្រឿង ដែលទើបជួសជុល និងកែច្នៃរូចយានដ្ឋានរបស់ឈ្មោះ ឆាយ ឈាននេះ បានថយទៅបុកចំទ្វារចូលនៃបណ្ណាគារបន្ទាយស្រី បង្កខូចខាតផ្នែកខាងមុខទ្វារ កញ្ចក់ និងសម្ភារជាច្រើន ថែមទាំងបានធ្វើឲ្យម្ចាស់បណ្ណាគារ និងបុគ្គលិកភ័យតក់ស្លុតយ៉ាងខ្លាំង ៕ដោយ៖កូឡាប