ភ្នំពេញ៖ ករណីគ្រោះថ្នាក់ចរាចរណ៍ដ៏រន្ធត់មួយកើតឡើងដោយរថយន្តកុងតឺន័រមួយគ្រឿង បើកវ៉ាជែងរថយន្តផ្សេងទៀត ចូលចំណែកផ្លូវម្ខាងទៀតបញ្ច្រាសទិសគ្នាទៅបុក ម៉ូតូបុរសម្នាក់ដែលកំពុងជិះឌុបប្រពន្ធ,កូនអាយុ១ ឆ្នាំរួមជាមួយ ឪពុកម្នាក់ចំពីមុខបណ្ដាលឱ្យ ស្លាប់៣នាក់ជាប់ខាងក្រោមរថយន្ត ក្នុងនោះមានប្តី ប្រពន្ធ និងឪពុក ។ចំណែកកូនអាយុ១ខួបកន្លះ របួសធ្ងន់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។
ហេតុការណ៍នេះបានកើតឡើងកាលពីម៉ោង៦ និង១០នាទី ព្រលប់ថ្ងៃទី១៨ ខែមករា ឆ្នាំ២០១៨ ស្ថិតនៅចំណុចក្បែរវត្តស្លែង ផ្លូវជាតិលេខ៣ ភូមិពងទឹក សង្កាត់ពងទឹក ខណ្ឌដង្កោ ។
សមត្ថកិច្ចបានឲ្យដឹងថា ជនរងគ្រោះទាំង៤នាក់ខាងលើ ទី១ ឈ្មោះ ថា ភេទប្រុស អាយុ២៥ឆ្នាំ មុខរបរជាងដាក់ស្លាកអាស័យដ្ឋាន (ជាអ្នកបើកម៉ូតូ ស្លាប់) ទី២ឈ្មោះ មុត សុខគា ភេទស្រី អាយុ២៥ឆ្នាំ មុខរបរកម្មកររោងចក្រ (ជាប្រពន្ធរបស់ឈ្មោះថា ស្លាប់) ទី៣ឈ្មោះ ម៉ៅ មុត ភេទប្រុស អាយុ៧៥ឆ្នាំ (ជាឪពុក ស្លាប់) និងទី៤ឈ្មោះ មុត ឈុននី ភេទប្រុស អាយុ១ខួបកន្លះ របួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យគុន្ធបុប្ផា។ អ្នកទាំង៤ ស្នាក់នៅក្នុងភូមិអន្លង់ឬស្សី ឃុំដើមឬស ស្រុកកណ្តាលស្ទឹង ខេត្តកណ្តាល។
ចំណែកអ្នកបើកបររថយន្តបង្ក ក្រោយពីកើតហេតុបានរត់គេចខ្លួនបាត់។ យោងតាមស្ត្រីជាម្តាយ របស់ជនរងគ្រោះបានរៀបរាប់ទាំងទឹកភ្នែកថា៖ មុនពេលកើតហេតុ កូនៗរបស់គាត់រួមទាំងចៅអាយុ១ខួបកន្លះ បាននាំគ្នាឌុបឪពុកចេញពីផ្ទះក្នុងស្រុកកណ្តាលស្ទឹង ខេត្តកណ្តាល មកបើកថ្នាំនៅមន្ទីរពេទ្យ លុះពេលត្រឡប់មកវិញក៏ជួបគ្រោះថ្នាក់ចរាចរណ៍ស្លាប់ទាំង៣នាក់។ ចំណែកចៅប្រុសអាយុ១ខួបកន្លះវិញ របួសធ្ងន់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យគុន្ធបុប្ផាបន្ថែមទៀត ។
ចំណែកអ្នកនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តបង្កជាប្រភេទរថយន្តកុងតឺន័រ មានលេខសម្គាល់ D35 ក្បាលពណ៌ឈាមជ្រូក ពាក់ស្លាកលេខ ភ្នំពេញ 3A-9057 សណ្តោងកន្ទុយកុងតឺន័រ ពណ៌ស ពាក់ស្លាកលេខ ភ្នំពេញ 4A-1779 បើកបរក្នុងទិសដៅពីត្បូងទៅជើង ដោយល្បឿនលឿនជាន់គ្មានត្រាប្រណី លុះដល់ចំណុចកើតហេតុ ស្រាប់តែរថយន្តបង្កមួយគ្រឿងនេះ បានបើកវ៉ាជែងជាមួយរថយន្តមួយគ្រឿងទៀតមិនចាំម៉ាក មកចូលចំណែកផ្លូវម្ខាងទៀត ជ្រុលទាំងល្បឿនកំពុងលឿនទៅបុកម៉ូតូជនរងគ្រោះម៉ាក ហុងដាសេ១២៥ ពណ៌ខ្មៅ ស្លាកលេខ ភ្នំពេញ 1FY-8878 ស៊េរីឆ្នាំ២០១៦ ដែលកំពុងជិះដោយបុរសម្នាក់ ឌុបប្រពន្ធនិងកូនអាយុ១ខួបកន្លះ រួមនិងឪពុក នៅខាងក្រោយ ក្នុងទិសដៅបញ្ច្រាសទិសគ្នាពីជើងទៅត្បូង តាមគន្លងម៉ូតូត្រឹមត្រូវ បោកផ្ទប់និងកិនជនរងគ្រោះទាំង៣នាក់ រួមមានប្តីប្រពន្ធ និងឪពុក ស្លាប់ភ្លាមៗនៅនឹងកន្លែងយ៉ាងរន្ធត់បំផុត រណូករណែលពេញផ្លូវ និងកូនតូចអាយុ១ឆ្នាំកន្លះរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យគុន្ធបុប្ផា។ចំណែកតៃកុងរថយន្តបង្ក ភ្លាមៗបានប្រញាប់បើកទ្វារថយន្តរត់គេចខ្លួនបាត់ស្រមោល។
ក្រោយកើតហេតុ សមត្ថកិច្ចជំនាញចរាចរណ៍ខណ្ឌដង្កោ សហការជាមួយជំនាញចរាចរណ៍ក្រុង ចុះមកធ្វើការវាស់វែង នាំយករថយន្តនិងម៉ូតូទៅរក្សាទុកនៅ ការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយគ្នាពេលក្រោយតាមផ្លូវច្បាប់បន្តទៀត។
ចំណែកសពទាំង៣នាក់ ត្រូវបានសមត្ថកិច្ចធ្វើកំណត់ហេតុ ប្រគល់ឲ្យក្រុមគ្រួសារយកទៅស្រុកកំណើត៕ ដោយ៖បញ្ញាស័ក្តិ
