តាកែវ៖នៅរសៀលថ្ងៃទី ១ ខែមេសា ឆ្នាំ២០២០ នេះមានហេតុការណ៍អគ្គិភ័យមួយបានកើតឡើងនៅចំណុចភូមិចក សង្កាត់រកាក្នុងក្រុងដូនកែវ ខេត្តតាកែវ ធ្វើឲ្យបងប្អូនប្រជាពលរដ្ឋនៅជិតខាង នាំគ្នាផ្អើលឆោឡោ ជួយពន្លត់អគ្គីភ័យជាមួយនឹងសមត្ថកិច្ចនគរបាលក្រុងដូនកែវ ព្រោះខ្លាចមានការឆេះរីករាលដាលបន្ត ដោយសារតែអាកាសធាតុក្តៅខ្លាំងផងដែលជាហេតុធ្វើឲ្យជញ្ជ្រាំងនៅតាមវាលស្រែស្ងួតខ្លាំង ងាយនឹងឆាបឆេះបំផុត ។
លោក ឥន្ទ មណ្ឌល អធិការក្រុងដូនកែវបានឲ្យដឹងថា ហេតុការណ៍អគ្គិភ័យនេះ គឺមិនបង្កឲ្យមានការខូចខាតទ្រព្យសម្បត្តិរបស់ប្រជាពលរដ្ឋឡើយ គឺឆេះតែគល់ជញ្ជ្រាំងនៅតាមវាលស្រែតែប៉ុណ្ណោះ ក្រោយទទួលព័ត៌មានពីប្រជាពលរដ្ឋថា មានភ្លើងឆេះនៅតាមវាលស្រែ កងកម្លាំងនគរបាលទាំងអស់ រួមជាមួយនឹងរថយន្តពន្លត់អគ្គិភ័យមួយគ្រឿងបានចុះទៅដល់កន្លែងកើតហេតុ រួចបានធ្វើសកម្មភាពបាញ់ទឹកពន្លត់ ដោយមានការជួយពីបងប្អូនប្រជាពលរដ្ឋផង ទើបអាចគ្រប់គ្រងលើស្ថានការណ៍អគ្គិភ័យទាំងស្រុងបាន ដោយប្រើតែរថយន្តពន្លត់អគ្គិភ័យតែមួយគ្រឿងប៉ុណ្ណោះ ។
ចំពោះករណីអគ្គិភ័យនេះដែរ គឺបណ្តាលមកពីការលួចដុតភ្លើងរបស់ក្មេងៗ ។
ដោយសារតែមានការបម្រែបម្រួល នៅអាកាសធាតុក្តៅខ្លាំង ហើយបង្កឲ្យមានអគ្គិភ័យឆាបឆេះនៅតាមព្រៃ វាលស្រែនិងផ្ទះសម្បែងបងប្អូនប្រជាពលរដ្ឋ នៅក្នុងមូលដ្ឋានទឹកដីនៃខេត្តតាកែវ មានការកើនឡើងគួរឲ្យកត់សម្គាល់ ឯកឧត្តមឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានធ្វើការអំពាវនាវ ដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ទៅលើការដុតសំរាម ការចោលកន្ទុយបារីពាសវាលពាលកាល ភ្លើងទៀន ធូប និងការតចរន្តអគ្គិសនីដោយមិនមានបច្ចេកទេសច្បាស់លាស់ ដែលជាមូលហេតុធ្វើឲ្យកើតមាននៅអគ្គិភ័យឆាបឆេះ ខាត់បង់នូវទ្រព្យសម្បត្តិរបស់បងប្អូនប្រជាពលរដ្ឋ ដូច្នេះដើម្បីទុបស្កាត់ជាមួយនឹងការបម្រែបម្រួលអាកាសធាតុនេះផង សូមបងប្អូនត្រូវតែយកចិត្តទុកដាក់ខ្ពស់ទៅលើបញ្ហាអគ្គិភ័យជាធំ ៕ ដោយ៖ តាកែវ
