ចំនួនអ្នកឆ្លងវីរុសកូរ៉ូណា នៅអាមេរិចបានកើនលើស ២០០.០០០ករណីហើយ ខណៈដែលរយៈពេល ២៤ម៉ោងចុងក្រោយ មានអ្នកស្លាប់ដោយសារវីរុសនេះរហូតដល់ ៨៨៤នាក់។ នេះបើតាមតួលេខរបស់សកលវិទ្យាល័យ Johns Hopkins។
រហូតមកដល់ថ្ងៃពុធ វីរុសកូរ៉ូណា ឬ COVID-19 បានឆក់យកជីវិតមនុស្សចំនួន ៤.៤៧៥នាក់នៅក្នុងសហរដ្ឋអាមេរិច ខណៈដែលអ្នកឆ្លងមាន ២១៣.៣៧២នាក់។ អាមេរិចកំពុងឈរនៅតំណែងលេខ ១ ដែលមានអ្នកឆ្លងវីរុសច្រើនបំផុតលើលោក។
ទោះបីអាមេរិចមានអ្នកស្លាប់ជិត ៩០០នាក់ក្នុងមួយថ្ងៃ ចំនួននេះនៅមិនទាន់អាចបំបែកកំណត់ត្រារបស់អ៊ីតាលីបានឡើយ ដោយកាលពីថ្ងៃទី ២៧ ខែមីនា មានអ្នកស្លាប់រហូតដល់ ៩៦៩នាក់ក្នុងមួយថ្ងៃ។
សូមបញ្ជាក់ថា វីរុសមរណៈនេះ បានរីករាលដាលយ៉ាងលឿននៅក្នុងសហរដ្ឋអាមេរិច ក្នុងរយៈពេល ៣សប្តាហ៍ចុងក្រោយនេះ។
ពលរដ្ឋអាមេរិចជាង ៨នាក់ក្នុងចំណោម ១០នាក់បានស្នាក់នៅផ្ទះ តាមការបញ្ជារបស់រដ្ឋ និងអាជ្ញាធរ ក្នុងគោលបំណង ដើម្បីទប់ស្កាត់ការរីករាលដាល របស់វីរុសកូរ៉ូណា៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
