យោងតាមលោក ZaoBao អ្នកជំងឺ Covid-19 អាយុ ៤៧ ឆ្នាំនៅខេត្តក្វាងចូវ ប្រទេសចិន បានបដិសេធព្រមសហការ ជាមួយនីតិវិធីព្យាបាលនោះទេ និងផ្ទុយទៅវិញ បានវាយធ្វើបាបគិលានុបដ្ឋាយិកាម្នាក់ ដែលកំពុងមកមើលគាត់។
អ្នកជំងឺដែលត្រូវបានគេស្គាល់ថាមានឈ្មោះ Okonkwonwoye Chika Patrick មកពីប្រទេសនីហ្សេរីយ៉ា ដែលបានចូលទីក្រុងក្វាងចូវ កាលពីថ្ងៃទី ២០ ខែមីនា និងបានធ្វើតេស្តវិជ្ជមានសម្រាប់ Covid-19 ។ គាត់ត្រូវបានគេបញ្ជូនទៅមន្ទីរពេទ្យ ដើម្បីទទួលការព្យាបាលនៅថ្ងៃទី ២៣ ខែមីនា ហើយនៅតែធ្វើតេស្តវិជ្ជមាននាពេលបច្ចុប្បន្ន។
នៅថ្ងៃទី១ ខែមេសា ការិយាល័យសន្តិសុខសាធារណៈក្រុងក្វាងចូវ បានទទួលការព្រមានមួយដោយនិយាយថា អ្នកជំងឺម្នាក់នៅបន្ទប់ឯកោលេខ ៨ នៃមន្ទីរពេទ្យប្រជាជនក្វាងចូវ មិនបានសហការជាមួយការព្យាបាល និងគិលានុបដ្ឋាយិកានោះទេ។
គិលានុបដ្ឋាយិកាបានស្នើសុំឱ្យអ្នកជំងឺធ្វើតេស្តឈាម ប៉ុន្តែគាត់បានបដិសេធ ហើយព្យាយាមដើរចេញពីបន្ទប់ឯកោ។ នៅពេលគិលានុបដ្ឋាយិកា ព្យាយាមបញ្ឈប់គាត់មិនឱ្យចាកចេញ ស្រាប់តែអ្នកជំងឺមិនចង់រស់រូបនេះ ស្ទុះមកវាយនាងហើយ ខាំមុខនាងទាំងកម្រោលតែម្តង។ ជាលទ្ធផលនៃហេតុការណ៍ដ៏ហួសចិត្តនេះ គេបានរកឃើញរបួសនៅលើមុខ ក និងចង្កេះ របស់គិលានុបដ្ឋាយិកា។
បច្ចុប្បន្ន ប៉ូលីសបានបើកសំណុំរឿងព្រហ្មទណ្ឌ ដើម្បីស៊ើបអង្កេតលើបញ្ហានេះ ខណៈដែលមន្ទីរពេទ្យបានពង្រឹងសន្តិសុខ នៅក្នុងវួដឯកោ។ ចំណែកជនសង្ស័យក៏កំពុងស្ថិតក្នុងភាពឯកោ និងព្យាបាលក្រោមការត្រួតពិនិត្យរបស់ប៉ូលិសផងដែរ។ នៅពេលការព្យាបាលត្រូវបានបញ្ចប់ ប៉ូលិសនឹងចាត់វិធានការ និងផ្តន្ទាទោសជនសង្ស័យតាមច្បាប់៕
ប្រែសម្រួល៖ លឹម ហុង (ប្រភព៖ worldofbuzz)
