រដ្ឋាភិបាលប្រេស៊ីល កាលពីថ្ងៃពុធបានបង្ហាញគំនិតផ្តួចផ្តើមថ្មីមួយ ដើម្បីស្រាវជ្រាវការឆ្លងវីរុសកូរ៉ូណាក្នុងចំណោមប្រជាជនទាំងអស់។
តាមរយៈវិធានការនោះ ក្រសួងសុខាភិបាលប្រេស៊ីលនឹងដាក់ចេញនូវការតេដោយស្វ័យប្រវត្តិទៅកាន់ប្រជាជនចំនួន ១២៥លាននាក់ ដែលស្មើ ៦០ភាគរយនៃប្រជាជនសរុប ដោយសួរសំនួរជាច្រើនទាក់ទងទៅនឹងស្ថានភាពសុខភាពរបស់ពួកគេ។
“ពួកយើងនឹងធ្វើការតេចេញ ដូច្នេះកុំមានការភ័យខ្លាច ប្រសិនជាទូរស័ព្ទរោទិ៍។ វាដូចជាការពិគ្រោះជាមួយនឹងវេជ្ជបណ្ឌិតអញ្ជឹងដែរ ប៉ុន្តែតាមរយៈសំឡេងសិប្បនិម្មិត ដែលនឹងធ្វើការវាយតម្លៃ”។ នេះជាការបញ្ជាក់របស់រដ្ឋមន្ត្រីសុខាភិបាល Luiz Henrique Mandetta នៅក្នុងសន្និសិទសារពត៌មាន។
សំនួរទាំងនោះ អាចនឹងសួរអំពីឈ្មោះ អាយុ ទីតាំង និងថាតើពួកគេស្ថិតក្នុងក្រុមដែលមានហានិភ័យខ្ពស់ឬយ៉ាងណា ដូចជាអ្នកជំងឺទឹកនោមផ្អែម ប្រសិនជាពួកគេមានរោគសញ្ញាវីរុសកូរ៉ូណា និងសួរថាតើ មនុស្សប៉ុន្មាននាក់ដែលពួកគេមានទំនាក់ទំនងជាមួយដោយផ្ទាល់។
នៅពេលសួរសំនួរ កម្មវិធីស្វ័យប្រវត្តិនឹងកំណត់ថាតើពួកគេគួរត្រូវមានការយកចិត្តទុកដាក់ផ្នែកវេជ្ជសាស្រតឬយ៉ាងណា។
សូមបញ្ជាក់ថា រហូតមកដល់ថ្ងៃពុធ ប្រេស៊ីលមានអ្នកឆ្លងវីរុសកូរ៉ូណា ចំនួន ៦.៨៣៦នាក់ និងមានអ្នកស្លាប់ ២៤០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua